Oranjestad-Den un comunicado publica algun dia pasa nos a tuma nota cu lider di fraccion di AVP ta trece padilanti cu e prioridadnan di Gabinete Eman lo ta mas cla y e pasonan pa realisa esakinan. Contrario na e ponencia aki ta e realidad amargo cu e Gabinete Eman nunca por a cumpli cu e principionan di su propio acuerdo cual nos lo splica den e comunicado aki. Tur cos a cuminsa na 2013 ora cu e minister di finansas anterior a crea un acuerdo cu e intencion pa yega na un presupuesto balansa y consecuentemente un surplus na 2018. Den lineanan grandi esaki tawata encera un maximo di gasto 1.350 biyon pa cada aña (durante 4 aña largo) mientras e entradanan di pais Aruba lo tin 1.150 biyon como base cu expectativa pa esaki crece anualmente. Importante pa remarca ta cu e esencia di e plan aki ta si genera mas entrada no necesariamente mester nifica crea mas gasto y si dado caso tin menos entrada lo no nifica cu tin mas reduccion di gasto.
A resulta cu e “sistematica” aki a wordo desbarata totalmente door di e organo di conseho local Raad van Advies y College financieel toezicht.
Nos lo splica pa medio di ehempelnan concreto y hechonan dicon a desbarata y semper a cuestiona e supuesto cuadro financiero aki. E promer ehempel tawata e presupuesto 2014 cual na promer instante a mustra un total di gasto di 1.343 biyon pero despues a resulta cu a bin un ahustacion di 209 miyon florin den presupuesto 2014 hasiendo e total na gastonan bira 1.552 biyon! (surpasando e norma). Esaki ta excluyendo e hecho cu Gabinete Eman no a logra realisa e meta di 1.150 biyon na entrada tampoco.
Pa loke ta trata 2015 Raad van advies a pone enfasis riba e hecho cu e sistematica ta wordo kibra cu algun di e 24 medidanan. Pa splica mas cierto medida no ta genera entrada pa gobierno y tampoco ta crea e efecto di “spaar” riba gastonan gubernamental cual ta nifica cu automaticamente esaki ta bai contra di e sistematica di balanced budget akkoord. Den rapportnan di tanto Raad van Advies y College financieel toezicht nan ta señala cu ehempelnan concreto cu introduccion di un financial transfer tax, privatisacion di directie luchtvaart y bazv no per se ta hasi un efecto positivo riba desaroyo presupuestario. Pa bai mas den detayes un medida manera e financial transfer tax no ta yudando gobierno haya entrada pero tampoco baha gasto pasobra loke genera akinan ta bai na proyecto siendo cu den pasado a enfatisa cu lo mester a tuma un pausa cu e projectonan ppp door cu e mesunan aki ta pone presupuesto bou presion. Ademas di esaki RVA a por a conclui for di cifranan preliminar di presupuesto 2015 cu ya caba ta surpasando e maximo di 1.350 biyon cu 5 miyon florin.
Pueblo por conclui a base di e informacion ariba menciona cu Gabinete Eman tin 2 aña tras di otro cu nunca a cumpli cu propio balanced budget akkoord! Esaki no ta un sorpresa si teniendo cuenta cu hasta ley y reglanan presupuestario a wordo kibra durante full gobernacion di Gabinete Eman. Pero un gobierno cu no por logra di mantene su mes na su propio reglanan No ta uno di confia!
Johnnyhabibe-Anchorman 