Johnnyhabibe-Anchorman

Oranjestad-Un di e temanan central den e tratamento di presupuesto cu ta finalisa mayan, ta si e presupuesto ta cumpli cu e normanan y e tempo den cua ta bay cumpli cu e normanan. E tema aki a bira punto central di discucion e siman pasa door di cu den e consehonan di CFT y den e acuerdo cu gobierno a firma ta bisa cu e consehonan di CFT mester wordo traduci den desicionnan concreto den e presupuesto. E pregunta ta anto si e presupuesto manera e ta wordo trata ta cumpli cu e norma y consehonan di CFT. Segun gobierno e presupuesto ta cumpli cu e normanan palabra den e cuadro financiero di 2014-2017. E consehonan cu CFT ta duna ta sugerencianan con pa yega e meta ey.

NORMANAN

Den e acuerdonan di “Balanced Budget” y e cuadro financiero di mas aña pa 2014-2017, a fiha e tempo den cua mester yega e normanan palabra. E dos normanan principal ta e reduccion di e deficit riba presupuesto y e maximo na gasto di gobierno. Gobierno di Aruba mes a fiha e maximo di gasto cu ta inclui inversionnan ya na aña 2013. E tempo ey tambe a fiha como meta pa baha e deficit te na 0% na 2017/2018. Den e cuadro financiero di mas aña pa 2014-2017 a pone aserca cu na 2018 ya lo por tin un surplus financiero (= mas entrada cu gasto). Esaki ta e momento cu lo cuminsa paga e debenan di tur gobierno di e ultimo 30 aña den forma accelera. E pregunta ta pesey si e presupuesto 2015 ta cuadra cu e normanan y si e ta cumpli cu e cifranan cu e aña aki mester yega na dje. Esey ta e criterio final pa aproba e presupuesto of no.

DEFICIT & MAXIMO NA GASTO

E deficit y e maximo na gasto ta e dos normanan principal cu ta usa. Den Union Europeo e deficit riba presupuesto ta hasta e unico norma, di tur e otronan cu a palabra, cu ta usa na fin di dia. Pa 2015 e norma pa e deficit den presupuesto di Aruba ta 3.7%. Den e presupuesto y den e maneho financiero pa e aña aki, e deficit ta 3.7%. Ta pa e motibo aki gobierno por bisa cu, a base di e informacion cu e tin di e gasto y entradanan pa 2015 te awor aki, cu no tin motibo pa haci nada extra e aña aki, pa haya mas entrada of baha gasto mas. Esaki ta cuadra cu e maneho di yega e metanan den forma gradual, sin afecta crecemento economico, creasion di cupo di trabou of forsa di compra di pueblo. Tambe e maximo di gasto den e presupuesto a keda den e margen di 1350 miyon manera a fiha for di 2013. Durante di e ultimo dia di tratamento di presupuesto, sin duda e tema aki lo ta central den e debate prome cu vota riba e presupuesto 2015.

Oranjestad-“E desaroyo cu nos a inicia for di october 2009 den tur sentido a resulta manera nos a desea. E ta completamente diferente cu nos a conoce  bou di gobierno di MEP. Specialmente, pero no solamente, den asuntonan cu mas pueblo a rechasa di MEP. Den forsa di compra cu bou di e ultimo gobierno di MEP a bay atras cu mas cu 25%, bou di gobierno di AVP a bay dilanti cu mas cu 20% caba. Y esey ta sin conta con prijs di awa y coriente a baha pa tur hende dos aña pasa. Y ainda falta. Pasobra nos a haci esaki un prioridad di gobernacion di AVP. No solamente e empleadonan di gobierno a bay dilanti cu 5000 florin pa aña. Nan pensioen cu tabata bay bancarota, awor ta sigura pa benidero 25 pa 30 aña. Pensionadonan y trahadornan den sector priva pa prome biaha den historia di nos pais, a haya directamente for di caha di gobierno un ayudo substancial. Pero nos no ta cla. Ainda falta, pasobra nan mas cu tur otro grupo den comunidad mester di bay dilanti awor cu AVP ta den gobierno.” Asina Rene Herde’ a declara durante di preparacion pa e ultimo dianan di tratamento di presupuesto 2015. Den e ultimo dos dianan e lider di fraccion tabata traha mas tras di cortina y solamente tabata visibel pa calma cos den sala di parlamento ora ela bay for di man.

FUTURO

Rene Herde’ a splica cu e prome añanan di gobernacion tabata pa saca nos pais for di e buraco di desempleo, bancarota, corupcion, stagnacion di economia, persecucion personal y abuso cu placa di pueblo cu tabata sosode bou di gobiernonan di MEP. Rene Herde’: “Nos pais no tabata tin futuro pa niun hende. Ta dolor so tabata reina tur caminda. Apesar di e consehonan pa bin cu medidanan pisa y kita hende for di trabou na 2009, gobierno di AVP a scohe pa saca nos pais for di e crisis prome, pone nos hendenan bek na trabao, habri e refineria, mehora forsa di compra di tur hende, hasta esnan cu un “onderstand” y cuminsa sigura tur hende un miho futuro. Pasobra e caminda nos dilanti pa Aruba, no por ta manera e caminda cu nos a laga atras. Hamas nos por bay bek eynan.” Rene Herde a sigui enfatisa cu e problemanan cu finansa publico cu tin awor aki no ta bay kita  Aruba for di e caminda cu nos a scohe. E ta bay dura kisas mas tempo. Pero e caminda pa futuro ta fiha. Hamas nos lo por ni pensa di bay bek na e tempo di MEP. Nos a y ta traha pa mas oportunidad pa tur nos hendenan di tur bario pa miho oportunidad den y door di ensenansa, den mas trabou y mas seguridad den mercado laboral, den oportunidad pa habri un propio negoshi, den e seguridad di miho cuido medico y di e seguridad di un miho pensioen pa tur ora nos stop di traha. Esakinan no ta promesanan bashi. Esaki ya ta e caso pa por ehempel e pensioennan di  utr trahado. E otro plannan ya ta den ehecucion of cla pa wordo ehecuta. E futuro di Aruba ta sigura! Hamas nos por bay bek y atras!

Oranjestad-Pueblo di Aruba, den e mundo di awendia, tur asunto ta draai rond di escogencia. Bo persona ta liber pa escoge loke bo ta desea di ta of kere. Den Parlamento di Aruba tin un parlamentario di AVP cu ta escoge pa ta ignorante riba e asunto di e protocol firma pa sr. Mike Eman y Hulanda. Ainda falta pa sr. Herde bin bij, p’asina compronde cu ta pa controla su gobierno e acuerdo entreguista aki ta. Ainda falta pa sr. Herde compronde cu su gobierno ta na cadena. Esaki door di propio MAL MANEHO financiero.

Sr. Herde ta papia di normanan financiero cu gobierno awor ta bay adopta di CAFT. Kico esaki ta bisa bo? Cu e gobierno di AVP a goberna SIN normanan financiero, sin guia y sin supervision di Parlamento.

“Con cu ta” ta hopi mas miho, compara cu loke AVP su gobierno a maneha.

Ainda falta pa sr. Herde compronde cu su gobierno ta manera un “choller” gubernamental cu Hulanda a pone bow di curatela. Cu sr. Eman mes a indica, pa e colegio aki bin Aruba y haci control riba e presupuesto ta un echo. Pero, mas convincente ta e motibo di esaki,  esta “Ondeugdelijk Bestuur”.  Gobierno di AVP a crea un financiële ramp pa cual Hulanda MESTER a cay aden.  Hopi remarcabel pa lesa ta cu awor si Aruba tabata den un crisis na 2008. Segun campañanan político di AVP, na 2008 ta MEP por yuda cu e economia tabata bay malo. Pa sr. Herde awor 2008 tambe a perhudica gobierno di AVP. Con esaki por ta posibel si AVP NO tabata gobernando?? Otro berguensa ta e echo cu CFT y tur otro instancia financiero ta menciona cu ta te na 2034, Aruba por bay bek na e nivel sano di 2009. E nivel cu MEP a laga atras! Kiermen NO tabata tin un crisis na 2009? E situacion financiero tabata masha bon? Sr. Mike Eman a gaña Aruba su pueblo anto, djis pa yega na poder. Pa colmo yega na poder cu gañamento y despues DESGRACIA e pueblo tambe!

Alaves e protocol aki ta pone e trabow y e poder di Parlamento di Aruba na berguensa. Categorisando Parlamento su mayoria pa ta incompetente, di mal maneho y di incapacidad gubernamental. Door cu Parlamento NO a haci su trabow debidamente y solamente ta grita VOOR manera hende sin tino.

E mayoria den Parlamento na lugar di controla gobierno, tabata controla oposicion so. Prioridad robes!

Pa stop e berguensa pa Hulanda su cara internacionalmente, Hulanda MESTER a cay den. E protocol aki no ta minando e poder di Parlamento so, pero e ta kitando e poder di Parlamento tambe. Sr. Herde mester por contesta e pregunta dicon sr. Eman mester a firma e protocol aki. Kico kiermen sino fono y den bon of den malo pa sr. Eman? Sr. Herde por splica pueblo di Aruba kico lo a bin pa su gobierno si Mike Eman NO a firma? Mike Eman tabata tin e opcion di NO firma? Dicon aña pasa un impase asina a hiba na un huelga di hamber y awor e envolvimento di Hulanda ta pasa bay manera cos hunta cu lubricante? Ni grita sr. Eman no a grita! Manera: “over my dead body, Hulanda kier verkracht Aruba su gobierno”. Loke ta sumamente straño ta e echo cu algun luna atras sr. Eman y sr. Herde tabata para strak strak contra CFT y Hulanda, pero awor diripiente tur dos ta manera hende cu tabata bisti un carson grandi, anto sin faha! 

Ta un berguensa pa pais Aruba, kende no tabata tin un supervision financiero pa motibo cu esaki no tabata nesecario, awor si ta haya esaki forsa y obligatorio. E unico meta ta pa controla e malechornan, chollernan gubernamental, kendenan ta adicto na gasta placa di pueblo sin escrupulo contal nan keda na poder. Awor pueblo ta wak unda su placa lo bay y kico ta ainda falta! Sr. Baba Herde, dicon sr. Mike Eman MESTER a firma, e no ta stima Aruba mas?

Oranjeastad-Diamars e segunda tanda di e reunion cu Minister encarga cu Asuntonan laboral, social y hobennan a sigui. Den e tanda aki Fraccion MEP a enfatisa riba excepcionan hasi riba base repititivo pa permiso di trabou riba promer peticion. Parlamentario Dangui Oduber a declara lo siguiente: “ Minister Paul Croes ta hiba un maneho estricto y segun su maneho e ta nenga tur promer peticion cu wordo haci pa drenta nos mercado laboral. Cu prueba den man nos a trece dilanti con tin fiesta di permiso tumando lugar. Aparentemente na Aruba no tin hende pa haci trabou di security, no tin hardinero, no tin hende pa haci e trabou di IT support. Peticionan di permiso ta wordo haci despues cu minister mes ta accorda e permisonan”

Den e disertacion di Parlamentario Guillfred Besaril a reitera e importancia di e labor desplega pa Bureau Sostenemi den e cadena Social di nos Pais. Ademas e Parlamentario a elabora riba e maneho eroneo di Minister di Labor pa loke ta e otorgamentonan di prome Permiso pa trabownan cu nos propio hendenan biba riba nos Isla por hasi. Enbista cu tin un desempleo riba nos Isla, Besaril a termina su discurso cu e palabranan: “Cada un persona sin trabow, ta un problema social-economico mas pa nos Pais!

Tambe a hiba palabra den primera tanda parlamentario Xiomara Ruiz-Maduro. Remarcabel ta cu Minister Croes kier a laba su man di e excepcionnan duna pa permiso di labor, pero parlamentario Xiomara Ruiz-Maduro a sigi cuestiona e Minister riba e tema. A pidi claridad riba e caso na unda un persona cu ta 15 aña ilegal na nos pais ta bira haya un permiso cu urgencia y por medio di excepcion. A puntra Minister tambe pa splica kiko lo haci cu e recomendacionnan di SER riba permisonan di ‘geen bezaar’ y con lo evita e envolvimento politico na momento di duna excepcion.

Dialuna, 18 mei 2015

Santo Sacrificio di Misa den bario: (7.00 pm)

Famia Jacobs na Tanki Flip 20-A

Diamars, 19 mei 2015

Rosario (6.30 pm)

saliendo for di cas di famia Trimon-Figaroa, Tanki Flip 38-A, pa misa y despues sigui pa Santa Sacrificio di Misa (7.00 pm)

Diaranson, 20 mei 2015

Santo Sacrificio di Misa den bario: (7.00 pm)

Famia Lee, Catiri 5-C

Diahuebs, 21 mei 2015

Santo Sacrificio di Misa (6.30 pm)

Specialmente pa muchanan cu a haci of ta bay haci nan

prome Santa Comunion

Diabierna, 22 mei 2015

Santo Sacrificio di Misa den bario: (7.00 pm)

Famia Boekhoudt, Tanki Leendert 247-A

Diasabra, 23 mei 2015

Santo Sacrificio di Misa (6.00 pm) na Spaño

Diadomingo, 24 mei 2015

Santo Sacrificio di Misa (9.00 am)

Celebracion di e segundo aniversario di parokia San Juan Pablo II y sigui despues cu un brindis pa tur presente.

“Dios rico den misericordia drama bo bendicion ariba nos” (Juan Pablo II).

Oranjestad-Diamars mainta a tuma lugar apertura di e conferencia di ATCA, cual ta e conferencia di turismo pa nos partnernan di Norte America cu a conta cu presencia di 60 participante for di Merca y Canada.

E biaha aki a comparti cu e actornan importante aki den nos industria turistico na un forma diferente unda a pone extra atencion riba e parti cultural y e diversidad di actividadnan cu nos isla tin pa ofrece. E ultimo aki a wordo haci a traves di un presentacion di nos artista local Rosabelle Illis, kende a mustra un imagen a traves di e wowonan di un ‘first time visitor’cu danki na e experiencia incomparabel na nos isla no a resulta di ta un happy visitor, pero un ecstatic visitor.

Tambe tabatin presentacionnan di CEO di ATA, Ronella Tjin Asjoe-Croes, James Fazio, Director di aeropuerto y Ed Malone, Director di area pa Norte America.

E conferencia aki ta hopi importante mirando cu no solamente ta papia di negoshi y bende Aruba, pero tambe ta duna e participantenan e oportunidad pa reconecta cu e experiencia Aruba.

Ronella Tjin Asjoe-Croes a remarca cu ta hopi importante cu nos operadornan di tour principal ta presente, kendenan ta representa alrededor di 55 pa 60% di e negoshi cu ta bin for di Norte America. Ademas di esaki Aruba ta den e destinacionnan top 5 pa nan pa loke ta benta y negoshi.

Durante e conferencia a enfoca riba aspectonan cultural nobo, trece e experiencia di cultura dilanti cu ta wordo ofreci na nos bishitantenan y bishitantenan potencial a traves di e operadornan di tour.

Un punto importante cu a bin dilanti ta cu ta mustra cu ta inverti den Aruba su producto tanto fisico, di servicio, embeyecimento di nos centro di ciudad, desaroyo di San Nicolas. Esaki a wordo haci a traves di e presentacion di Rosabelle Illis, kende a bin cu un toke artistico y humoristico y cu a wordo usa pa ATA pa mustra e diferente proyectonan nobo cu Aruba tin.

Tambe tabatin presente artistanan local dunando un bista di kico e proyecto di Korteweg ta, cual a wordo introduci algun siman atras.

E parti principal di e presentacion di James Fazio tabata riba con ta mehorando e experiencia di e pasahero na aeropuerto y esaki ta algo importante mirando e trabounan exitoso di ATA pa trece mas turista a traves di nos aeropuerto. Tin diferente proyecto cu ta cla caba y otronan cu ta den proceso y tur esakinan lo contribui na mehora e experiencia na nos aeropuerto.

Ed malone di su banda a mustra e trabounan cu ta wordo haci pa sigui atrae e mercado Mericano y en especial e turistanan afluente, e strategianan di mercadeo y con e mehoracion di nos producto ta influencia e mercado cu nos isla ta enfocando riba dje.

Minister Otmar Oduber a manda e mensahe di gratitud na tur e partnernan di nos isla presente pa contribui na e crecemento substancial di e mercado Norte Americano, cual den e prome lunanan di 2015 a surpasa 7% compara cu 2014.