Archive for May, 2015

mep3

Oranjestad-Despues cu e reunion cu Minister di labor a termina parlamento a sigui cu e tratamento di presupuesto di Minister encarga cu asuntonan economico, utilidad y energia den e reunion aki temanan manera refineria, energia, costo di bida y medio ambiente tawata central. Parlamentario Chris Romero a elabora lo siguiente riba energia alternativo y tambe riba hedging : “ 100% energia alternativo no ta algo viable tampoco recomendabel. Apesar cu ta papia di alternativa bo por mira cu gobierno no a realisa ni  1 proyecto berde ainda! Pa loke ta trata e caida drastico di prijs heavy fuel oil mi por bisa cu Aruba a perde entre 50-60 miyon florin cu hedging te awor. Ta di lamenta pasobra tur famia lo por a beneficia grandemente di un alivio den prijs di coriente den e ultimo lunanan”

Parlamentario Glenbert Croes den su disertacion a pone enfasis riba e importancia di e refineria como pilar economico di nos pais. Den cuadro di esaki parlamentario Croes a presenta un mocion urgiendo gobierno entre otro pa para desmantelacion, hasi esfuerso pa re-apertura y pa tuma liderazgo di e esfuerzonan pa negocia e reapertura di e refinería y no lage den man di Valero so pa hasi esaki.

E reunion a continua unda cu parlamentario Besaril tambe a hiba palabra. Durante su disertacion di primera tanda, Parlamentario Besaril, a elabora riba e tema di medio ambiente. Den su preambulo, sr. Besaril a bai riba e intencion  di e Gobierno di conberti e dam di Sabanilla Abou (Sta. Cruz) den un dump. Sr. Besaril a subraya cu e dump na Gabilan tabata un bon ehempel cu Serlimar no tabata tin e capacidad pa controla un otro dump y e punto central ta, cu e bario di Sabanilla Abou no kier un dump y a acumula mas di 2500 firma contra e intencion di Gobierno. Pues a lansa e pregunta na Minister de Meza “Dicon!?”, dicon no tin oido pa e preocupacion di e bario? Por ultimo, sr. Besaril a lansa preguntanan specifico riba e parti operacional di e maneho di Medio Ambiente, entre otro con a para cu e cuestion di autoridad pa e polisnan ambiental y bureau City Inspector pa por actua contra delitonan cometi contra medio ambiente ya cu te aña pasa, esaki no tabata debidamente regla.

Lider di Fraccion di MEP Evelyn Wever-Croes a elabora riba e necesidad pa diversifica nos economia. “Nos economia awor ta draai riba turismo so, pero turismo so no por sigi carga economia di nos pais. Expertonan den e tereno aki ya caba a bari alarma cu turismo lo por burn out. Nos a urgi Minister de Meza pa no pura bai desmantela e refineria, pero tuma su tempo te fin di e anja aki pa purba habri e refineria. Tambe nos a urgi e minister pa tuma rienda, y pone presion riba Valero: sea bo ta bende, of bo ta duna nos e terminal bek. Esey nos ta spera di nos gobernantenan, pasobra ciere di e refineria no ta mescos cu ciere di un tienda. Ciere di e refineria kiermen full un pilar economico cu ta wordo destrui, y nos pueblo no por carga esaki aworaki. Nos kier alternativa, no medida”.

ADVERTISE 3

Arubahuis dodenherdenking op Waaldorpsevlakte

Oranjestad-Den Haag – Un delegacion di Gabinete di Minister Plenipotenciario, encabesa pa un grupo grandi di studiantenan Arubiano, a pone un krans na e monumentale na Waalsdorpervlakte ariba “Dodenherdenking” dialuna 4 di mei 2015. Tambe tabata presente personal di Gabinete di Aruba y studiementor di Tilburg Swinda Venhortst-Thijsen y e mentor di Utrecht Eddy Geerman.

Prome cu esaki a tuma lugar tabata tin un encuentro na Gabinete di Aruba na unda directora Shandra John a yama e publico bon bini y a bisa di ta contente cu asina hopi studiante presente na e programa aki. Sra. John a bisa cu e conmemoracion arina “Dodenherdenking” na Waalsdorpervlakte ta un lugar y un monumento cu un significacion especial, pasobra e monumento ta na e sitio unda durante di Segunda Guera Mundial hopi persona cu tabata forma parti di di e resistencia a wordo fusila. Entre man e horen Arubiano Boy Ecury cu huntomcuhunto otro miembronan a haya su morto pa medio di un peloton di balalaika 6 di november 1944. ‘Ta importante pa pa tene na bisa e memoria y e storia di bisa di Boy Ecury’.

Tambe sra. John a papia den su discurso ariba un parti di historia cu ta den olvido. ‘Esaki ta e parti importante cu Aruba a hunga den Segundo Guera Mundial. E refineria na San Nicolas tabata un distribidor importante pa comustible pa e trupanan di e forzanan aliado cu tabata bringa contra di Alemania. Tabata tin mail militair Americano na Aruba pa defende e refineria contra di atakenan cu submarino Aleman. Ariba 16 di februari 1941 un diez tanker a keda destrui. Tur horen entre 18 y 20 anja mester a drenta servicio militar pa defende e isla.’

‘Mi ta spera cu e programa di awe lo inspirara e generacion hoben tanto na Aruba Como na Hulanda, pa sinja mas di Boy Ecury y cuminsa na prensa kick Reino ta nifica pa nos tur. Pesey ta importante pa nos concentratie mas ariba loke ta uni nos y no loke ta dividi nos. Pa Boy Ecury esaki tabata di mes; e tabata un “koninkrijksburger” y te ainda e ta esaki,’ asina Shandra John, directora di Gaaninete di Aruba a bisa.

Despues Gisele Ecury, sobrina di Boy Ecury e tene un charla hopi impresionante, den cual ela referi na Segunda Guera Mundial y su nificacion ariba nos bida di awe. Naturalmente ela papia di Boy Ecury, pero a bisa cu tambe tabate tin hopi hende cu a lucha pa awe nos por ta disfruta di nos libertad; y hopi di nan a paga esaki cu nan bida. Gisele a bisa cu nos nunca mester lubida kico a pasa den e Segunda Guera Mundial.

94 Class

PLASTEKERK

ORANJESTAD – Lider di oposicion Evelyn Wever-Croes diasabra ultimo a reuni cu Minister Plasterk, y sr. Van Zwol tocante e situacion financiero delicado di Aruba y e papel cuestionable cu gobierno di Aruba a y ta hunga den esaki. Na final di e reunion sra. Wever-Croes a duna e siguiente declaracion.

“Mi no tin e libertad pa divulga e detayes di nos reunion ainda, sin embargo mi por bisa cu mi a hiba e mensahe cu pueblo di Aruba a pidimi hiba: Pueblo di Aruba no merese e castigo aki, pasobra no ta e pueblo a malgasta e placa. Mike Eman y su ministernan a gasta e placa, pues laga nan bai paga p’e. Mi a splica cu den e visión di MEP tin alternativa pa e medidanan di Mike Eman. MEP ta kere den re-apertura di e refineria, pasobra esaki ta trese cresemento di economía y crea cupo di empleo na nivelnan mas halto tambe. MEP ta kere den restructura finanzas, cuminsando di baha e cantidad di minister di 9 pa 7 y baha cantidad di coordinadornan, y mes momento re structura e sistema di belasting, pasobra e rebaho di BBO di 3% pa 1.5% cu Mike Eman a introdusi na 2010, tabata e decision mas devastador pa henter nos isla. MEP ta kere tambe den re-introdusi ‘checks and balances’ y investiga tur e actonan di corucpion di e gobierno aki. Tur esakinan ta ALTERNATIVA y no MEDIDA.

Tambe mi a  comparti cu Minister Plasterk mi opinion tocante e rumbo cu e tratamento di puesupuesto ta bayendo, despues di apenas e prome dia, cu a mustra caba unda AVP kier hiba e reunion. Pasobra tanto e Minister di Husticia como e Lider di Fraccion di AVP, en bes di debati con pa hasi Aruba mas sigur dentro di e fondonan limita cu tin disponible, a cuminsa tira cu lodo y hasi redashi. Mi a conta Minister Plasterk cu Arthur Dowers kiermeen cu ta sr. Plasterk a bis’e cu ami a pidi Partij van de Arbeid pa bin cu CFT, y e comentario aki naturalmente no a cai den mucho bon tera cerca sr. Plasterk. Te ainda ningun hende por kere cu net minister Dowers, di cual tur hende a pensa cu e ta un hende serio, ta esun cu a bin cu e redashi ey. Y si minister Dowers mes ta bin cu un comportacion asina, ta kiko ta resta di e demas ministernan cu normalmente caba ta comporta nan mes na forma bochornoso den Parlamento? Bisando esaki mi kier ilustra cu AVP no tin ningun intencion pa bin cu cambionan den e presupuesto pa por cumpli cu e exigencianan cu Mike Eman aparentemente lo a acepta di Hulanda.

Pero cualquier cu ta e palabracionnan entre Mike Eman y Hulanda, nos sa cu ningun lo funciona tanten cu Mike Eman ta na mando, pasobra ta mescos cu carga awa hiba lama.

Mike Eman, segun cierto medio di comunicacion, lo a firma un Koninklijk Accoord cu Hulanda, y awor mester duna cuenta na pueblo ta kiko ela firma y cuanto autonomia e mester a entrega atrobe debi na su mal maneho. Palabra ta awor na Mike Eman”, lider di MEP Evelyn Wever-Croes a duna di conoce.

NOTICIERO94 1

EVELYN10

ORANJESTAD – Despues di e prome dia di tratamento di presupuesto, lider di oposicion a expresa su desapunto. “AVP ta mes infantil cu semper, tira cu lodo y hasi redashi, en bes di atende cu finansas di nos pais na forma serio y responsabel. Ta obvio cu nan ta totalmente perdi, y cu nan no tin ningun intencion di atende cu e problema real: e bancarota financiero di nos pais y e supervision cu Hulanda kier impone”, Evelyn Wever-Croes a duna di conose.

Tratando e presupuesto di husticia e Lider di MEP a indica cu e situacion financiero di nos pais ta sumamente delicado, cu e Mega Debe di nos pais ta causando pobresa, desempleo, famianan libra, y esaki ta e rais di e problema. Un problema cu el’a compara cu un mata di inseguridad. “E rais ta e Mega Debe, y e ta creando criminalidad, ladronicia, hortamento di auto, violencia, asesinato. Y esaki ta sin conta e lista di 24 medida cu Gabinete Mike Eman a priminti Hulanda cu e ta bin cune. Nos ta hopi preocupa y pesey nos a verwacht cu e Minister di Husticia lo a pone mas atencion na combati criminalidad. Pero e minister tabata masha arogante y a mustra cu cosnan por keda status quo, no tin nodo di cambia nada. Es mas, ela corta mas di 6 miyon florin den e departamentonan encarga cu seguridad di nos pais, Cuerpo Policial, KIA, etc. Pero no por bisa kiko e ta bai hasi pa hasi Aruba mas sigur.

Actitud infantil

Mester remarca cu en bes di atende cu e temanan na forma serio, AVP a cai den su wega di manipulacion y tiramento cu lodo. Minister Dowers en bes di mustra seriedad, a haya necesario pa acusa MEP y su lider di ta esunnan cu a bai Hulanda pidi CFT. Algo cu ta pa cuminsa totalmente incorecto, pero mas alew ta ponebo pensa si di berdad e minister no tin nada otro di papia di dje.

Lider di e fraccion di AVP Baba Herde no a keda atras y kier a cuestiona e casa di lider di MEP tirando asina cu lodo, manera AVP ta bon conosi pe.

Por a nota cu e lider di MEP a contesta Herde bek na forma hopi skerpi: Berdad bo kier papia di mi casa, mientras e pais ta na borde di bancarota? Un bancarot di cual abo sr. Herde tambe ta responsabel? Si bo kier papia di mi casa, ban papia di mi casa. Pero bo kier pa nos papia tambe di bo casa y su envolivimento den e proyecto miyonario di Urirama? Bo kier pa nos papia di bo yiu cu ta traha na Ministerio Publico? Bo kier pa nos papia di bo ruman cu ta coordinador di minister? Nos no ta gasta nos energia riba cosnan infantil asina, nos ta dedica tur nos energia na e crisis financiero di nos pais, y con nos por alivia nos pueblo. Lamentablemente AVP no a mustra seriedad cu nos a spera cu nan lo mustra, nan no a mustra mes cu nan lo kier cambia rumbo di e pais aki”, Lider di MEP a contesta.

ADVERTISE 3

gerick5
Manera anticipa den e comunicado anterior e ta importante pa tira un bista den cada presupuesto individual pa pueblo por haya un idea con su placa ta wordo gasta. Den e comunicado aki nos lo enfoca den corto riba e analisis di cifra cual a base di esaki bo por forma un opinion general di e maneho di husticia actual.
Pa 2015 e presupuesto di ministerio di husticia ta ilustra un gasto total di 188.536.300 miyon florin cual ta representa aproximadamente 14.1% for di e total di gastonan di pais Aruba (presupuesto total ta 1.336 biyon). Ora di compara e suma cu e presupuesto di 2014 bo ta constata cu tin un reduccion di 9.4 miyon den su presupuesto cu ta ekivalente na 4.75%. Pregunta cu ta surgi ta den kiko bo ta bai corta? Cual gastonan a conoce un aumento? akinan ta na unda cu mester evalua si esakinan tin balor agrega. Ademas Mester fiha prioridad y tuma bou consideracion prome den kiko precies bo ta corta.
Den algún departamentonan manera cuerpo policial, inmigración y kia a reduci nan presupuesto cu 1.6 miyon, 1 miyon y 2.6 miyon. Notabel ta cu e reducción den e departamentonan aki caba ta representa 5.2 miyon cu ta mas cu e mitar di e reducción den total ministerio. Netamente e departamentonan aki mester a haya mas fondo aloca. Manera ta conoci ultimo tempo e departamentonan aki ta onderbezet y esaki ta hasi cu no por funciona optimal corda pa garantisa seguridad pa comunidad di Aruba. E reduccion den e presupuesto pa polis cu 1.6 miyon ta den tur sentido cuestionabel y inaceptabel siendo cu ta bisto cu e desaroyonan riba tereno husticial a bai mas atras y Aruba ta insigur! Den e caso specifico di Kia a corta alrededor di  1.9 miyon den overtime. Na promer instante bo lo por pensa cu esaki ta algo bon na otro banda e ta bira cuestionabel pasobra bo tin menos cuidador di preso na e instituto cual lógicamente tin su riesgonan. Remarcabel ta e hecho cu e nota di cambio presenta enbes di tawatin ahustenan na beneficio di husticia a hasi recortenan adicional den departamentonan.
Sin cu mester bai den mas den detayes ta importante pa pone enfasis riba seguridad en general. Djis purba contesta e preguntanan aki: “bo ta sintibo safe? bo barionan ta sigur?” Ultimo tempo tin un avalancha di actonan criminal di tur tipo ta tumando lugar. Enbes cu esakinan a mustra un caida e sucedidonan diario ta demostra lo contrario. Netamente esaki a pone cu oposicion pone hopi enfasis riba insiguridad riba nos pais durante tratamento presupuesto di husticia 2015.
RADIO SPOTS