BENNY  S.  HEFE  DI  E  BANDA  DEN  BAGAMUNDERIA  DEN  OTORGAMENTO DI PERMISO!

Posted: July 16, 2015 in Noticiero 94

Boshi Wever PPP

Oranjestad-Despues di a scucha Benny S. papia riba e topico di nombracion di su mucha manda como Adjunct Directeur di Dimas, nos preocupacion entorno e corupcion y bagamunderia den otorgamento di permiso ta bira hopi mas grandi.

E tono cu e mandatario ta papia, di ta nos ta manda y ningun hende tin nada di bisa, ta muestra di un arogancia hopi peligroso.

For di e entrevista por saca afo cu e nombracion di Mario Wever lo sigui, pa asina ey e fiesta por sigui tambe den Dimas.

Ta conoci cu den Dimas tin empleadonan cu hopi mas educacion cu Mario Wever, cu segun informacion ni un diploma di MAVO e tin, y e empleadonan aki sigur ta integro. Y ta conoci cu Mario Wever sigur NO ta integro.

E pregunta cu ta bin mesora padilanti ta, dicon un minister por hinca den su cabes pa nombra un persona sin un preparacion debido y cu NO ta integro, den un funcion asina importante, y cu ta exigi un integridad total.

Ya caba den varios articulo nos a haci mencion di e actonan di corupcion administrativo, cometi door e mesun Wever aki, y hunto cu un otro complice den henter e racha di corupcion cu ta un tal Rahdi Kahn. Tur e cosnan aki ta socede cu conocimento y aprobacion di Benny S.
Segun nos por a compronde, diripiente a bin cu e nombracion di Mario Wever, despues cu e directora di Dimas no kier a firma pa un “verlenging” di un “toeristisch verblijf” di un persona. E no kier a firma, pasobra e “turista” aki ta kedando na un adres; esun cu ta para garantia pa e turista ta biba na un otro adres, y e otro persona cu ta para garantia pa e verlenging, ta biba na un otro adres. Seguramente na totalmente un otro adres.
Con toch esaki a wordo regla?

Esun cu ta ehecuta e bagamunderia aki pa e minister, esta Radhi Kahn, a yama Mario Wever, cu por cierto tabata cu vacantie na cas, pa bin fix e cos aki. Y aki Mario Wever a vocifera cu si nan nombre como Adjunct-Directeur, e lo percura pa e fiesta di “verlenging” por sigui trankil.

Di e manera aki minister a bay di acuerdo cu e “organogram”, na unda Mario Wever lo keda encarga cu TUR loke ta concerni otorgamento di permiso.
Tur esaki, mientras e Mario Wever aki ta conoci di ta troce cu reglanan di Bon Gobernacion, djies pa keda den bon luz cerca e minister. Lo no ta straña nos cu e ta ricibi hopi placa pa e fabornan aki.
Banda di e caso aki tin varios caso cu ta cay bou corupcion, na unda e trio Benny S., Radhi Kahn y Mario Wever ta involucra.

*Asina tin varios caso di hendenan cu a comete un of otro delito, pero nan permiso no ta wordo “ingetrokken”, pasobra e minister a kita e derecho ey for di e directora di Dimas y a pase pa su mes. Es decir cu niun hende mas nan permiso no ta wordu revoca.


* Tambe tin diferente casonan na unda cu matrimonio ficticio ta wordo descubri, y inscripcion ta wordo nenga, pero e persona ta haya como recompensa un permiso di “inwonende dienstbode” cerca e mes hende cu e ta casa cu ne, of un familiar di dje. Ata e persona para na Censo toch pa inscribi su mes y haya AZV.

* Un otro caso ta e asunto di e persona cu a ser haya morto banda di lama, sefta cu bala. E persona aki ta conoci di tabata den baho mundo y cu por cierto a haya estadia liber na Aruba a base di un matrimonio falso. Instancianan a purba di revoca su permiso, pero despues riba instruccion di e minister, a ser otorga un permiso toch. Y esaki a socede pasobra e persona aki tabata un super bon amigo di Radhi Kahn.

Esaki ta djies 3 caso cu pa awor nos ta menciona. Y nos por a compronde cu tur instancia ta na altura di e bagamunderianan aki.

Nos ta preparando un carta cu nos lo bay manda pa Gobernador, Parlamento, Gobierno Hulandes, 1ste y 2de Kamer y Ministerio Publico pa pone nan na altura, UN BIAHA MAS, di e bagamunderianan aki.

Ya caba nos a mustra riba e consecuencia di un maneho di “open door”, “free for all” y “wheel & deal”, y e corupcion den e asunto di permisologia di e gobierno aki pa nos Arubianonan.

UPP lo recori tur medio cu ta na nos alcanse pa para e rumbo aki.

Y manera nos a bisa den un articulo anterior: “TA  E  ARUBIANO  SO  POR  SALBA  E  ARUBIANO”.

spots 2

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s