Oranjestad-Minister a usa ley pa regla uniformidad y habri mas oportunidad pa hobennan studia na havo.
Minister di enseñansa Michelle Hooiboer-Winklaar a usa e autoridad cu ley ta duna pa regla e normanan cu tur hoben mester cumpli cun’e pa e drenta un scol di havo. Minister a actua completamente dentro di e ley. Mas ainda. E no a impone un norma cu e mes a scohe. Ela laga un comision cu participacion di directivanan di scolnan secundario di mavo, havo y vwo mes palabra e normanan pa e aña di scol nobo. Ora e comision a entrega nan conseho na e minister, ela laga e directivanan di scol mes vota si nan ta di acuerdo cu e normanan cu e comision a propone. E majoria di directivanan di scol, cu excepcion di e directiva di Colegio Arubano, a vota na fabor di e normanan aki. E minister despues a laga pone e desicion comun aki di e majoria di directivanan di scol den un Decreto Ministerial, como e normanan regla pa ley pa e aña aki, minister a actua perfecto!
CRITICA
E lider di e partido MEP a dicidi di critica e desicion y e decreto di e minister, pasobra segun e lider di MEP, minister lo ta hala mas autoridad p’e mes. E critica aki obviamente ta totalmente infunda. No solamente pasobra ley di enseñansa secundario ta duna e minister e autoridad pa fiha e normanan di admision. E critica di e lider di MEP ta nifica cu e y MEP si ta di acuerdo pa scolnan di havo/vwo sigui exclui hobennn di scolnan di mavo. MEP si kier pa nos enseñansa keda uno selectivo y nos muchanan -specialmente esnan di habla papiamento- keda sin haya oportunidad pa bay havo/vwo y busca un estudio y un carera mas avansa. Esaki ta loke MEP kier pa nos hobennnan!
AINDA FALTA MAS CAMBIO
Den combersacion cu Rene Herde’ ela splica pakico loke e minister a haci ta asina importante. Rene Herde’: “Loke minister a haci ta aplica un instrumento legal pa habri porta di havo/vwo pa mas hoben. Sin e cambio aki hopi hoben no lo drenta havo y nan caminda pa futuro lo wordo corta. Na hopi pais di mundo gobiernonan progresivo mester a usa ley pa cambia e forma cu enseñansa ta organisa y funciona. Pa por duna hobennan mas oportunidad pa un estudio avansa mester trece cambio manera esaki. Pero esaki so no ta suficiente. Ainda falta hopi mas pa cambia. Pero sigur esaki ta un bon desicion cu lo beneficia hopi hoben cu awor si ta drenta havo.”
Johnnyhabibe-Anchorman 