Rene Herde’ MUCHO HOPI DI NOS HOBENNAN TA STUDIA, TRAHA Y BIBA BOU DI NAN CAPACIDAD REAL

Posted: July 16, 2015 in Noticiero 94

Cervais Rene1

Oranjestad-E porcentahe di hobennan na Aruba cu ta caba havo/vwo ta leu bou di e nivel internacional di paisnan cu un enseñansa mas democratico. Mucho hopi di nos hobennan ta studia, traha y biba bou di e nivel di nan capacidad real, pa motibo cu nos enseñansa no ta duna nan e oportunidad: e ta selectivo y discriminatorio. Esaki ta opinion profesional di Rene Herde’. Su profesion ta educador y planificador di cambio den enseñansa. Pa hopi aña caba e ta convenci cu nos enseñansa por y mester sirbi nos alumno y studiantenan miho. Rene Herde’: “Den nos enseñansa e alunmo y studiante ta wordo laga su so pa siña, pa compronde materianan nobo y dificil, pa domina materianan importante pa nan carera. Nos enseñansa tin un inflexibilidad enorme den e forma di siña y splica. Si un alumno no siña domina un materia ta su culpa. No di e scol. Pero e scol mes no ta haci suficiente pa sigura e dominio y miho siñamento. Nos enseñansa no ta duna suficiente guia y sosten structural na alumno y hobennan. E cantidad y calidad di guia y sosten directo na alumnonan ta un di e factornan mas importante cu scolnan por haci pa yuda nan studiantenan y hisa e efectividad di nan enseñansa. Esaki ta djis un di e areanan cu ainda falta hopi cambio. No door di djis pone mas asistente of maestro, pero door di siña e maestronan di organisa nan lesnan diferente, cu diferente forma di splica un topico y mas asistencia pa esnan cu mester didje. Ta e tipo di cambionan aki lo duna mas efectividad na nos enseñansa. “

CAMBIO BERDADERO

Sinembargo Rene Herde ta wak cu mas tin cu cambia den enseñansa pa tur nos muchanan y studiantenan por studia y usa nan capacidad real. E cambio berdadero segun Rene Herde’ mester bin cu un cambio den e forma di pensa con un hoben ta studia, con nos ta organisa les y scol, con nos ta stimula y yuda hobennan enbez di selecta, laga nan pa nan so wak con nan ta yega na siña. Esakinan ta limita e desaroyo di nan capacidad real y ta corta nan carera na scol, nan carera profesional y e oportunidad pa yega mas leu cu por den bida. E caracter selectivo di nos enseñansa ta un di e inhusticianan mas grandi cu nos mester combati. Pesey ta tristo pa tende cu e partido social democrata di MEP ta sostene e sistema bieuw cu ta selecta, exclui y corta caminda di nos hobennan den enseñansa.

SOSTEN STRUCTURAL

Minister di enseñansa a laga sa di kier finansia programanan di training extra pa yuda e hobennan cu tin mester di esey. E aña aki no tin e programa di “summer school” cu ta un forma chikito y temporal pa yuda. E motibo ta cu e scol no por a organisa esaki. E efecto positivo di e programa di “summer school” combina cu mas atencion di maestronan ta, cu e aña di scol cu a caba, mas cu 72% di alumnonan cu a drenta havo for di mavo a pasa nan aña cu exito mes ora. Prome cu a introduci e “summer school” ta 50% so tabata pasa e prome aña mes ora. Mas guia, mas sosten y miho splicacion riba un base structural como parti di e organisacion di scol, ta yudada mehora siñamento y efectividad di nos enseñansa. E ta yuda duna cada mucha e oportunidad pa un miho carera na scol, un estudio profesional y un miho calidad si bida den futuro. Ta pesey tin enseñansa!

THE ANCHORMAN 7

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s