Johnnyhabibe-Anchorman

Eagle beach — Durante e luna di April, La Cabana su Comision di Medio Ambiente y Salud, hunto cu e departamento di Recursonan Humano, a tene dos presentacion di lunch pa nan asociadonan, cu invitado special Lily Prins, Presidente di Koningin Wilhelmina Kanker Fonds. Durante e presentacionnan aki, Prins a papia tocante e historia di e fundacion; e tiponan di asistencia cu ta wordo ofreci na esnan afecta pa cancer y con e placa ta wordo recauda pa cubri e gastonan envolvi.  KWF no ta ricibi cualkier tipo di sosten oficial y tur miembro di e fundacion ta haci e trabou di boluntario. KWF no ta yuda solamente esnan cu un cierto tipo di cancer specifico, sino ta provee ayudo na cualkier persona cu ta sufriendo di cualkier tipo di cancer. Tin mas di 100 tipo di cancer cu diferente factor di riesgo, y e lucha contra cancer ta haci un impacto riba e pashent y henter e famia. KWF t’ey pa provee sosten pa e pashent y e famia. Si ta necesario, e fundacion por yuda regla ayudo psicologico. KWF ta provee protesis, silicon, BH y peluca pa asina por trece bek un apariencia di normalidad. E fundacion ta regla transportacion pa pashentnan cu no tin esaki, na momento cu e ora ta yega pa nan bai nan tratamentonan di chemo riba e isla, of pa radiacion na Corsow.

Debi na e tratamentonan largo den exterior, KWF ta cubri gastonan di viahe di un miembro di famia kende lo reemplasa esun cu ya caba ta cubri pa AZV pero cu mester regresa bek pa Aruba debi na nan responsabilidadnan di trabou.  E fundacion tambe ta provee camanan special, ekipo y cuido profesional pa pashentnan terminal. Ademas di esaki, e fundacion ta uza un ekipo di enfermeranan “freelance”, y ta ofrece tur servicio, articulo ekipo y tipo di cuido, completamente gratis.

Con KWF ta logra esaki? E gastonan ta astronomico. No ta un secreto cu mas y mas hende den nos comunidad ta wordo afecta pa cancer. Hopi esfuerso di recauda fondo ta tuma luga na April y parti di Mei, ora cu boluntarionan ta subi caya cu cahanan di coleccion.  Na September KWF, ta organisa e “Ride for the Roses” un caminata y careda di bicicleta cu ta yuda recauda fondonan adicional. E comunidad Arubiano ta generoso, sinembargo e fondonan recauda no ta cubri e gastonan anual. Aruba su crecemento y desaroyo a bini hunto cu cancer y su gastonan astronomico. Habitantenan mester pasa den un cambio di estilo di bida y tuma control di nan bida pa asina yuda den prevencion.

E Comision di Medio Ambiente y Salud hunto cu e departamento di Recursonan Humano a sinti cu tabata necesario pa asisti KWF den nan trabou noble door di uni forsa y yuda recauda fondo. E miembronan di Comision a bende cintanan traha na man entre nan asociadonan colega, a para banda di caminda cu nan cahanan di coleccion, a tene un bazaar y por ultimo a bende container di coi bebe y otro producto di concientisacion di cancer.

E esfuersonan aki a recauda mas di Awg 7,000.00, cual a wordo presenta na Lupina Croes, Tesorero, KWF.

E Comision di Medio Ambiente y Salud ta conciente cu e fundacion no a yega su meta di e aña aki apesar di e tremendo contribucionnan di e comunidad local debi na e aumento den gastonan envolvi. E Comision ta gradici KWF pa e oportunidad di yuda recauda fondo. E tabata un placer y el a wordo haci for di nan curason, como un manera pa gradici KWF pa tur loke nan ta haci pa e comunidad. E Comision asina tambe ta considerando pa organisa un otro bazaar pa recauda fondo den e lunanan benidero, pa asisti KWF y nan esfuersonan, y nan ta yamando tur organisacion, hotel y entidad comercial pa sigui nan ehempel y yuda recauda fondo pa KWF. E ciudadanonan di nos isla ta conta desesperadamente riba KWF y nan ayudo incondicional ora cu cancer ta bati na nan porta. Of den e palabranan di Mama Theresa: Duna di bo Mannan pa Sirbi y di bo Curason pa Stima.