Den apenas 15 aña soño di un pueblo a bira realidad! Diabierna awor, 1 di januari 2016 nos ta recorda cu 30 aña pasa pais Aruba a logra su Status Aparte

Posted: December 29, 2015 in Uncategorized

BETICO

Oranjestad-Diabierna awor, 1 di januari 2016 ta un fecha historico cu nos no por laga pasa sin mas, ya cu nos ta recorda cu 30 aña pasa nos pais a obtene su Status Aparte. Siguramente e fecha aki lo keda graba den historia di Aruba como culminacion di un lucha di un pueblo pa su libertad y cu esaki a ser realisa den apenas 15 aña. Pa por comprende e trayectoria cu Aruba a pasa aden pa por a logra su Status Aparte lo ta bon pa duna un descripcion breve di e lucha cu a ser hiba e tempo ey pa awe nos ta un pais liber den Reino Hulandes.

Inicio di e lucha sagrado

Dia 9 di februari 1971 Betico Croes a funda su propio partido, esta Movimiento Electoral di Pueblo (MEP) cu despues a resulta e vehiculo principal pa concretisa e libertad di e pueblo Arubano. Na 1972 durante un conferencia di Comision di Reino na Suriname, Betico Croes den forma sorpresivo a bandona e conferencia aki na momento cu e partidonan di Antiyas tabata boga pa un federacion Antiyano di 6 isla a base di ‘one man one vote’. Den e mesun aña ey un delegacion di e 3 lidernan di fraccion den Eilandsraad a bay Hulanda pa convence Hulanda di e deseo di e pueblo Arubano pa su libertad.

Manifestacionnan masal

Dia 18 di maart 1973 un manifestacion masal a wordo organisa den Wilhelminastadion y esaki dilanti di parlamentarionan Hulandes y Antiyano. Dia 18 di maart 1975 miles y miles di hende a subi caya pa e Marcha di Libertad cu flambeu y cu a pasa den e cayanan di Oranjestad. Alavez den e mesun aña ey un mocion di Eilandsraad a wordo acepta pa hiba misionnan pa exterior (e.o. pa Hulanda, Venezuela, Colombia, Panama, Costa Rica, Inglatera, Nacionnan Uni y OEA) en busca di apoyo pa e lucha di e pueblo Arubano. Tur e misionnan aki a wordo encabesa pa e lider Arubano Betico Croes, kende tabata goza di un inmenso aprecio, respet y reconocimento internacionalmente.

Dia 18 di maart 1976 Aruba a inaugura su simbolonan di union y libertad, esta su Himno y Bandera. Den e mesun aña ey a aproba den Eilandsraad e ortografia Arubano, esta nos ortografia etimologico.

Augustus Scur

Dia 25 di maart 1977 un referendum a wordo organisa y como resultado, 83% di e pueblo a opta pa un Aruba Independiente y a rechasa e federacion Antiyano. Den e mesun aña ey tabatin e accionnan di Augustus Scur cu a desemboca den un paro nacional cu a dura mas cu un siman. Ta danki na e accionnan aki Hulanda a dicidi di habri porta pa scucha realmente kico ta biba bao di e pueblo Arubano. Un delegacion consistiendo di tur partido politico, gremio comercial, sindicatonan y clero a wordo ricibi oficialmente door di gobierno Hulandes.

De kogel is door de kerk

Na maart 1983 e Conferencia di Mesa Rondo a base di 33 punto di consenso a bay di acuerdo cu e Status Aparte di Aruba na 1986 y Independencia na 1996. Premier Lubbers a declara na final di e conferencia ey: ‘De kogel is door de kerk’.

Na 1984, despues cu refineria Lago a anuncia su ciere, Betico Croes cu determinacion a declara ‘cu of sin Lago, Aruba lo bay pa su Status Aparte’.

E trabaonan di preparacion pa nos Status Aparte tabata inmenso. Nos lider honorario, sr. Nelson Oduber a ser nombra como coordinador pa prepara henter e proyecto pa realisa ehecucion di e resultado di Conferencia di Mesa Rondo di 1983.

Status Aparte a bira realidad

Den un tempo hopi corto mester a prepara e Constititucion di nos pais, con nos por bira un pais cu su propio Parlamento y Gobierno, un forma nobo di cooperacion cu e gobierno di Antiyas, con lo separa e bienesnan, con lo introduci nos propio Banco Central, nos propio florin, con lo bin cu un propio Corte, Ministerio Publico, Procurador General, Raad van Advies, Algemene Rekenkamer, Gobernador, propio Cuerpo Policial, nos propio SVB, con lo tuma tur e landsambtenaarnan na Aruba. A prepara tambe e organisacion y structura di e pais Aruba cu su ministerionan y cual ta e departamentonan y tareanan di cada ministro lo ser encarga cun’e y cual ta nan responsabilidad. Tur e preparacionnan aki tabata necesario p’asina Aruba den forma responsabel por a drenta su Status Aparte dia 1 di januari 1986. Lamentablemente dia 31 di december 1985, net algun ora promer cu Aruba drenta su status nobo, e arkitecto, constructor y realisador di nos Status Aparte Betico Croes a accidenta tragicamente, a bay den coma y consecuentemente no por a mira ni un seconde di e nacemento di pais Aruba. Un ideal cu el a biba y muri pe.

Pabien pueblo cu e 30 aña di Status Aparte, danki pa biba e momentonan aki hunto cu nos. Na tur cu a bay laga nos, nos ta spera cu den Reino di Dios nan por ta contento di a haci algo grandi y historico pa Aruba. Nos semper lo keda recorda nan como soldaatnan di e lucha Arubano y esnan cu a yuda corona esaki cu exito. En especial danki na nos Libertador Betico Croes pa tur loke el a haci durante 15 aña di lucha, sacrificio, sodor, sanger y lagrima pa awe Aruba tin su Status Aparte, un pais autonomo den Reino Hulandes.

Advertise4

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s