Johnnyhabibe-Anchorman

Oranjestad- Diasabra mainta Minister Otmar Oduber hunto cu Director y algun miembro di personal di Arubus acompaña pa miembronan di prensa tabata na waf pa asina inspecciona e busnan nobo cu e compania di transporte publico nacional a caba di ricibi.

E mandatario a bisa cu Arubus keto bay ta pasando den un periodo dificil, pero hopi trabounan a wordo haci durante e ultimo añanan y cu yegada di e prome 6 busnan di e flota nobo cu lo mester yega e aña aki ta bay ofrece un mihor servicio na usuarionan di Arubus.

E busnan cu a wordo cumpra ta di marca Marcopolo Volvo cu ta busnan cu tabata wordo usa anteriormente den Arubus caba y ta fuerte y ta bay e extra mile. Minister Oduber a expresa cu tin biaha lo barato ta sale caro y bou du e gobernacion anterior a adkiri e busnan di China, despues di esaki a bay over na e International y awor a step up y bay na e Volvo pa haci un diferencia.

Awor Arubus cu e strategia di tin un Aruparking, Arutram cu entrante e aña aki practicamente tur su gastonan ta keda cubri cu entrada di pasaheronan crucero y e ahuste di tarifa entrante 1 di februari, combina cu un flota nobo (lo busca otro flota nobo e aña aki mes) ta duna Arubus espacio pa un trayectoria nobo den e forma di haci trabou.

E adkisicion di e 6 busnan Volvo ta encera un inversion di aproximadamente 1 miyon Dollar y ta ofrece mas stul y standplaats cu loke conoce na e momentonan aki, mientras cu nan ta mas light y di aluminium pa mayor durabilidad.

E mandatario a pidi pa ban cuida e busnan y ta pendiente pa aproximadamente mitad di e aña aki ricibi e siguiente flota di busnan nobo. Ideal lo ta pa bin cu 10 bus nobo, pero lo wak e posibilidadnan pa haci esaki posibel, sino e lo ta entre 6 y 10.  Si logra yega na e 10 e lo haci cu lo tin un flota mas saludabel, e trahadornan lo por ta mas comfortabel y mas sigur di e busnan cu nan ta maneha, mientras cu ta baha e gastonan di mantencion.

Finalizando, Minister Otmar Oduber a indica cu e maneho y disciplina di empleadonan y e satisfaccion di empleadonan, combina cu baha gasto dor di tin busnan nobo cu entradanan extra cu ta wordo genera poco poco lo yega na un compania manehabel.