Parlamentario mr. Xiomara Maduro Gabinete Eman ta atacha integridad y credibilidad di Pais Aruba

Posted: January 11, 2016 in Uncategorized

xiomara 1

Oranjestad- E no por ta coincidencia of mala suerte pero mas bien e tin di haber cu e hecho cu Gabinete Eman mes ta gusta deal cu hende cuestionabel. Banda di esaki Gabinete Eman y muy en especial Minister Mike Eman no ta tene su mes na e acuerdonan y e supervicion financiero di CFT cu nan mes a boga pe. Cu e manera di goberna aki door di tene man cu hende cuestionabel y no tene su mes na acuerdonan, Gabinete Eman ta atacha integridad y credibilidad di Pais Aruba.

Integridad di gobernacion

No ta un biaha, pero ta diferente biaha caba ta sali na cla cu Ministernan di Gabinete Eman ta tene man y deal cu hendenan cuestionabel. Asina nos ta haya e relacion di Minister Eman cu Kiko Gomez, e gobernador di miedo di La Guajira cu ken Minister Eman kier a traha un hub aereo pa e negoshi di fruta y berdura. Pero despues di yen di brasamento y fiestamento na e fiesta di hacimento di aña di ex Minister Balkenende na Aruba, ata husticia na Colombia a encarcela Kiko Gomez bou sospecho di asesinato, contrabanda y narcotrafico. Tambe nos ta haya e negoshi di strawberry na unda cu Minister Oduber a deal cu e criminal Span Ospino, kende a tira atraco den dia cla den zona turistico y kende a bay sera pa contrabando di arma. Condenabel ta cu Minister Oduber a manda paga e criminal aki 11 mil dollar di placa di Pueblo pa un proyecto cu nunca a mira luz di dia. Djey nos ta haya El Pollo Carvajal kende mester a bira Consul di Venezuela na Aruba y tabata wordo busca pa husticia Mericano bou sospecho di narcotrafico liga na FARC. Y ultimo aki ta e escandalo cu Roberto Rincon, amigo di El Pollo, y menciona den prensa internacional como bon amigo di Mike Eman y Mike de Meza kende husticia Mericano ta busca bou sospecho di labamento di placa y soborno. Tur e casonan aki ta atacha e integridad di e Ministernan di Gabinete Eman y cu esaki ta atacha e integridad di gobernacion y e bon nomber di nos Pais.

Credibilidad financiero

Mal gobernacion di Gabinete Eman a pone cu nos finanzas publico a bay full for di balansa y cu esaki e credibilidad financiero di nos Pais ta bay perdi. E situacion a bira asina malo cu hasta bou di supervicion financiero di Hulanda nos Pais mester a bay pa no perde cara internacional y core cu inversionista potencial. Ta Minister Eman mes a boga pa e supervicion financiero door di sera acuerdo cu CFT y bin cu norma financiero den Ley di CAFT y awor no kier cumpli cu su mesun palabra. Gabinete Eman ta haci deshaci y laga tur conseho di CAFT un banda, coriendo e risico di haya un otro KB di Conseho di Minister di Reino. E manera di anda aki di Minister Eman ta atacha e credibilidad financiero di nos Pais y ta pone Pueblo su cara na berguensa.

Pueblo mester boga pa hende integro den gobernacion

E ta simpel, pa nos Pais por progresa, Pueblo mester boga pa vota pa hendenan integro drenta gobernacion di nos Pais. Pasobra tanten cu Gabinete Eman keda na mando, e bon nomber di Aruba lo keda wordo atacha door di dealnan cu hendenan cuestionabel y nos credibilidad financiero lo bay perdi na mal gobernacion di Gabinete Eman.

94 Class

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s