Archive for January, 2016

Boshi Wever PPP

Oranjestad- Den e ultimo dianan di aña 2015 y den e prome dianan di aña 2016, nos por a tuma nota cu e makinaria di propaganda di e gobierno di AVP a bin cu un avalancha di “bon noticia”.

Ta parce cu gobierno ta den un desesperacion total.

Prome ta bin cu e noticia di un asina yama “Heads up Agreement” cu casi no ta diferente cu e MOU cu a ser firma un paar di siman pasa.

Y pa completa e obra maestro di manipulacion, ta notifica e pueblo durante e ultimo dianan di 2015 den un conferencia di prensa yamá cu caracter di URGENCIA – y na unda un solo periodista comprometi a wordo invita – e gran noticia cu lo bin cu un descuento di 10% riba tarifanan pa coriente. Tur esaki sin menciona cu for di 2009 continuamente tabata aumenta e tarifa di awa y coriente.

Remarcabel aki ta cu un paar di siman pasa tanto WEB como Elmar a bisa cu nan situacion financiero no ta mucho di gaba.

Y awor diripiente ta bay duna un regalo cu lo bay costa e companianan estatal 15 miyon florin pa luna (180 miyon pa aña).

Rara, con esaki ta posibel?? E directornan di tanto WEB como Elmar debe pueblo un splicacion.

Alabes gobierno a anuncia cu e aña 2016 lo ta uno super positivo pa Aruba y pa e pueblo Arubano. Ohala esaki ta berdad, pa asina ey, nos pueblo por wordo alivia di e medidanan cu ta masacrando nan.

T’asina anto cu nos mester sinta man cruza pa loke ta trata e Mal Gobernacion di e gobierno aki? Nos ta kere cu awor mas cu nunca nos mester haci nos maximo esfuerso pa yega na un Union cu e intencion pa firma un Compromiso Nacional na unda lo mester introduci reglanan estricto di “Good Governance”!

Hopi lo puntra dicon mester bin cu reglanan di “Good Governance” si cos ta bon?? Nos refineria a habri, nos tin gas den nos subsuelonan, nos turismo ta creciendo enormemente, tur esaki segun e PR di e gobierno di AVP.

Wel, e motibonan ta obvio.

Nos mester djis mira kiko ta sosodiendo 17 miya pazuid di nos isla. Ta conoci cu nos bisiña ta un di e paisnan mas bendiciona cu rikesanan natural, y nos tur sa kiko ta e situacion cu e pais ta pasando aden y con e pueblo ta sufriendo.

Gobiernonan a haci y deshaci y a kere cu nunca placa lo caba cu nan y cu nan por a sigui hunga “sinterklaas” pa eternidad.

Pakiko esaki por a yega asina leu?

E contesta ta hopi facil: NO tin reglanan di “Good Governance”. NO tin transparencia; corupcion ta na ordo di dia; patronahe politico ta algo comun; organonan y empresanan ta ser usa pa metanan exclusivamente pa faborece esnan cerca di e gobernantenan.

Organonan cu ta suposed di ta independiente, ta totalmente politisá. Prioridadnan ta ser poni robes, cu e consecuencia cu entre otro pobresa ta aumenta, enseñanza ta wordo neglisha y criminalidad ta azotando e pueblo, etc. etc.

Na Aruba ya caba nos ta sintiendo e mesun cosnan aki caba.

Ta p’esey ta esencial pa prome cu ta laat, bin cu e reglanan di “Good Governance”. Nos ta consciente cu e trayecto lo no ta facil, pero si realmente nos kier papia di “SOSTENIBILIDAD” den desaroyo humano, anto nos mester cuminza traha riba esaki.

Y nos no mester bay inventa e wiel. Ya caba Nacionnan Uni tin tur cos “in place” pa yuda na yega e ideal aki.

E unico ingrediente necesario ta “BOLUNTAD” di e propio politico pa mara man di e politico. Nacionnan Uni tin un cuadra pa duna contenido di kiko ta un situacion ideal pa yega na “Good Governance”.

Esakinan ta;

* Transparencia.

* Responsabilisacion tanto den e sector publico como den esun priva;

* Participacion di tur hende;

* Reglanan di ley y enforzamento di esakinan;

* Igualdad y inclusion;

* Reactivo;

* Mester busca consensus;

*Efectivo y eficiente;

Cada un di e 8 puntonan aki lo garantisa e sostenibilidad humano, cu na su turno lo percura cu e pueblo den su totalidad lo wordo beneficia, y no djis un grupito.

Y si realmente nos kier ta merecedor di tin nos Status Aparte original back, nos mester yega na e UNION pa den un Compromiso Nacional garantiza cu nos rikesanan lo ser reparti na un manera husto, y cu e pueblo den su totalidad lo por goza di esey, sino ta un grupito atrobe lo ser beneficia.

Haciendo esaki, nos lo caba tambe cu e discusionnan eterno riba friends & family, riba tanchi y ompi, etc. etc.; e ora ey e discusionnan lo ta riba “issues”!!

Den nomber di Union Patriotico Progresista – U.P.P.

Candelario A. S. D. – Booshi – Wever

Brazil, januari 3, 2016

NOTICIERO94 1

bandera

Oranjestad – Como candidato politico di MEP mi ta wak 2016 como un reto Democratico. Nos pais a cumpli 30 ana como uno Autonomo y Liber den Reino Hulandes bao guia di nos Libertador Gilberto François “Betico” Croes na January 1, 2016 pero nos lucha ta mas fuerte cu nunca mirando e estado di nos pais hoben. E Gobierno actual lo sigui cu nan rumbo destructivo di hiba nos deba nacional riba 105%. E MEGADEBE crea pa Mike y su gobierno ta bisto den tur servicio di Gobierno. Nos por wak varios departamento: Douane, Polis, Ambulance, Arubus y instituto IMSAN, Hospital, KIA, CAD, RvA hast BC cu no tin suficiente placa pa haci nan trabao debidamente. Nos di MEP a lucha incansabel pa gobierno cambia su prioridadnan pero e 13 parlamentarionan di AVP a buta interes di nan partido prome cu esun di nos patria. Cu gobierno a haci cos bon, nos no por bisa cu no pasobra esaki no ta cuadra cu realidad tampoco. E punto cardinal pa e decadencia di nos pais ta con Sr. Eman a yega na poder y sigui abusa di fondonan publico manera e no tawata tin fin di caba. Awe nos ta den un clima politico sumamente tenso unda nos tin un Gobierno bao Supervision\KB\CFT di Hulanda. Ni con e partido na mando purba bende esaki pa un bon trabao e lo bay den nos historia como e gobierno mas irresponsabel y antipueblo desde 1986. Sr. Eman a mustra un incapacidad astronomico riba tur tereno. Tur su promesanan no a wordo cumpli alcontrario awe BBO\BAZV\ABB ta existi ainda cu tur posibilidad cu lo subi te 7%. Su gobierno a mustra un falta di por traha na un manera responsabel, tur su ministerionan ta desfuncional cu tantisimo issues sea administrativo of coruptivo. Nos parce un pais tercer mundista cu no ta den Reino Hulandes un pais sumamente rico y prospero compara cu locual Sr. Eman a brinda nos pueblo ta nada mas cu manipulacion y mentira. Tur rapport ta mustra cu lo tuma Aruba MINIMO 20 ana pa trece bek unda e tawata na 2009. Esnan cu ta apoya e maneho di gobierno ta bisa cu ta tur pais tin debe anto kier compara nos pais cu gigantenan manera Merca. Aruba tin un economia chikito y dependiente anto no por tin un debe nacional mas cu 65%. Gabinete Michael G. Eman no por bende nos digno pueblo un 6 pa un 10. Esaki no ta cuadra cu nos inteligencia y informacion objetivo cu nos tin. Si kier a traha Hospital sin Operatie Kamer, Green Corridor (Bottleneck), Ringweg III (carisimo) algun di e proyectonan cu lo hiba nos debe nacional riba 100% mester a haci esaki den e percentage di 40 pa maximo 65% di nos debe nacional. Esaki ta e realidad di su gobierno anto pueblo mester ta critico y manda su gobierno cas pa masacra e futuro di nos y nos yiunan cu e mal maneho aki cu tawata haci concientemente pa gana voto sin importa e consecuencianan. Esaki no ta prome desaster nacional di AVP esaki a sosode tambe cu dos Gabinete di su ruman homber Ex Premiere Henny Eman. Den desesparacion ta hisa minimumloon cu fls. 41,- anto ta baha coriente cu 10% pero esaki no por tapa e dolornan di nos pueblo cu a sufri bao su gobierno pa 7 ana largo gastando miyones den Europe Meets America y Green Conference sacando dividendo di nos companianan estatal enbes di duna nos digno pueblo un alivio den su cartera. Un gobierno burdugo den tur sentido. Mester ta objetivo cu e tipo di maneho aki, ki bal e bombeonan di LED su mi no tin coriente, ki bal un tram si mi no tin placa pa cumpra nada den caya Betico Croes. Ki bal un Hospital di casi un billin si nos hendenan ta muri den parkinglot pa falta di cuido medico. Ki bal un Green Corridor si nos frigidairenan ta bashi y nos yiunan no por sigui school y pracitica deporte y come saludabel pasobra e prijsnan den supermercado ta haltisimo. E reto lo ta grandi pa nos tur den 2016 pasobra mas hende cu hamber lo sigui aumenta e criminalidad cu ta asotando nos pais anto esnan den poder mester realisa cu nan percepcion di un Aruba prospero ta nada mas cu manipulacion y mentira. “Grandesa di nos pueblo ta su gran cordialidad, cu Dios por guia y conserva su amor pa libertad.”

RADIO SPOTS

GERARD CROES

Oranjestad- Bispo di Aña Nobo partido MEP a tene su tradicional cendemento di pagara na su Cede na Santa Cruz. Candidatonan, presidentenan di directivanan di MEP, miembronan di Forza Femenino Grace a bin hunto pa yama aña 2015 ayo y desea otro tur cos bon den e aña 2016. Un aña cu lo no ta uno facil y cu lo bay tin su retonan cun’e. A toca honor na lider di partido sra. Evelyn Wever-Croes y Presidente sr. Gerrit Croes pa cende e pagara cu no solamente tabata un señal di inicio di aña 2016 pero tambe cu MEP ta recorda 30 aña di e logro di Status Aparte riba 1 di januari. Despues di cendemento di pagara a sigui cu e grupo di Dande di Tipico Macuarima cu a canta y entretene e publico presente cu e tradicional Dande. Sin duda cu MEP por mira atras riba un evento sumamente exitoso na final di aña 2015.

ADVERTISE 3

Jerick Croes
Oranjestad – E la para bira un custumber cu Gabinete Eman ta impone medida solamente riba pueblo y ora yega su turno pa cumpli cu su responsabilidad e ta ignora y core pe. Hustamente esaki te caso di AOV cu tanto nan a gaba cu a scapa e fondo. Gabinete Eman no a implementa 1 sino 3 medida den un riba lomba di pueblo y den presupuesto supletorio 2015 si ta haya un “free ride” pa keda sin paga SVB 60.5 miyon florin. Den e comunicado aki nos lo repasa e ahustacionan aki. Tambe lo nos splica pakiko e dispensacion cu gobierno a haya ta di condena!
Tur cos a inicia cu e promer dialogo social hasi na 2010 unda cu a stipula
cu entrante 1 januari 2011 e premiegrens di AOV lo subi di Afl. 54.600 (2010)  pa Afl. 65.052 cu ta nifica un aumento di 10.452 (19%).
y cu e maximumgrens pa parehanan casa lo no ta aplicabel mas. Despues den 2013 a dicidi cu lo tin aumento di prima di AOV entrante 2014 cu 1% hasiendo esaki 14.5%. Sigi pa un aumento di prima di AOV entrante 2015 cu 1% atrobe hasiendo esaki 15.5%.  Tambe a hisa e premiegrens entrante 2014 di Afl. 65.052 pa Afl. 85.000 (19.948 cual ta 30.6%) cu por cierto a target e 2e klasse di Aruba. E ahustacionan aki tawata demasiado severo paso e ta 3 medida den 1 . Un desicion drastico di aumenta e edad di 60 pa 65 aña sin promer hasi un estudio extensivo riba esaki. Loke ta di lamenta ta e hecho cu na Aruba e grupo di 40-59 ta haya contratiempo pa por bini na remarca pa haya trabou.
Dispensacion 60.5 miyon florin !
Mientras cu pueblo si a haya sota y confronta su mes cu medidanan feros pa supuestamente drecha e fondo di Gabinete Eman ta coi e shortcut y core pa su responsabilidad. Durante e ultimo reunion cu a trata e presupuesto supletorio 2015 a dicidi cu gobierno lo haya un “kwijtschelding” (dispensacion) di 60.5 miyon florin! Logicamente bo ta puntra bo mes con e por ta posibel cu pueblo so ta e unico pa sacrifica mientras Gabinete Eman si kier “un comienso nobo” y ta keda sin paga placa na e fondo na SVB algo cu nan a propaganda cu nan kier salba? Obviamente ta trata di un gobierno cu kier carga titulo di heroe pero cu ne mesun momento ta contribui na destrui e fondo pasobra no kier cumpli! Pero akinan ta na unda e rol di parlamento ta keda falta principio pasobra un biaha mas e consehonan duna door di CAFT y Raad van Advies a wordo ignora siendo cu a indica bon cla cu gobierno no por hasi esaki.
CAFT a señala bon cla cu e dispensacion di 60.5 miyon florin  ta trece e situacion financiero di SVB den peliger. Tambe a indica cu aunke ta spera resultadonan positivo no mester lubida e hecho cu tawatin un periodo di 5 aña cu resultadonan negativo. Apesar di e sin fin di argumentonan toch parlamentarionan ta aproba e barbaridad aki! Pa despues tende cu SVB di baina tin 19 miyon florin y ta leu di yega un situacion ideal. Pakiko exonera un suma di 60.5 miyon anto?! Por wel di bisa cu ta trata algo bieuw di  hopi aña pasa pero no ta kita e hecho cu di un banda ta exigi y impone riba pueblo yen medidad pa salba un fondo mientras gobierno cu tin un responsabilidad pa cumpli cune ta cana liber y keda sin paga 60.5 miyon florin! Un gobierno cu di berdad ta responsabel lo a admiti cu e suma ey e no por paga di golpi pero si lo a presenta un plan pa sali for di e retraso ey paso a paso pero a opta semper pe caminda di mas facil. Un biaha mas ta wordo demostra cu gobierno no ta lider pa ta un ehempel sino ta ignorante y sin compromiso.
Advertise4