Oranjestad-Dia di Tur Defunto, den oranan di atardi, un cantidad grandi di parokianonan di Noord a bishita santana pa resa rosario bao guia di pastor Santiago y sra. Lourdes Figaroa. Pa prome biaha e aña aki parokianonan di Noord a haya oportunidad pa cende bela den e grafkapel pa descanso di alma di nan defuntonan.
Algun luna pasa e Comision di Santana Noord a logra termina e restauracion di e grafkapel aki.
Ora e comision a cuminsa na 2010 cu e trabou pa mantencion di e Santana Noord, a encontra un grafkapel deteriora cu tabata wordo usa como un cuarto pa warda herment di hardin aden. Tabatin garetia, chapi, harka, scop aden. Cu cooperacion di e hardinero a logra haya e e grafkapel bashi pa por a cuminsa cu restauracion.
E presidente di Comision Santana Noord sra. Noris van Lis-donata ta bisa cu e comision a duna valor na e grafkapel teniendo cuenta cu e grafkapel aki ta aparece riba lista di monumentonan. A dicidi di pidi conseho na sra. Yvonne Webb, directora di Monumenten buro. Siguientemente architecto sr. Bert Kamsteeg a bin entrega un bunita plan di restauracion. E construccion tabata den man di Hubert Oduber di Dajibi Contractor y Mario Oduber di compania Maecon. Awe parokianonan di Noord ta contento cu e resultado di tin un grafkapel bunita restaura den cual por cende bela pa haci oracion.
Importante ta cu den e grafkapel ta reposa restonan di pastor Pirovano desde 1821, kende tabata e prome pastor fiho cu a bin traha na Aruba. Comision di Santana Noord ta haci un suplica pa cuida e parti aki di historia di parokia Noord. Den e grafkapel a pone un diseño cu ta simboliza Spirito Santo y cu e palabranan “Paz na tur Alma”. E grafkapel ta habri durante e prome siman di November den cuadro di Dia di Tur Defunto. Comision di Santana Noord ta pidi cooperacion di tur parokiano pa hunto sigui cuida e grafkapel aki como parti di historia di Iglesia catolico den Noord.
Johnnyhabibe-Anchorman 