ORANJESTAD – Parlamento den un reunion solemne diamars ultimo a tuma despedida di sr. Freddis Refunjol. Lider di fraccion di MEP, Evelyn Wever-Croes, a duna un discurso na e ocasion ey cu a toca hopi curason.
“Den nomber di pueblo di Aruba en general, di e famia di Movimiento Electoral di Pueblo en especial y muy en especial den nomber di e pueblo di Savaneta, mi ta gradisi y felicita sr. Refunjol pa e forma digno y excelente cu el’a ehecuta e cargo di Gobernador.
Un carera sirbiendo comunidad di Aruba, cu a cuminsa desde su entrada den mundo di enseñansa algun aña pasa, sigui pa su entrada den politica na aña 1983, cu a permiti’e ocupa varios funccion, den Parlamento di Aruba y den Gobierno di Aruba. Tambe atravez di deporte el’a sirbi comunidad, den su tempo liber, practicando deporte, y tambe yudando y guiando hobennan den deporte, siendo asina un ‘role model’ pa nan.
12 aña y 8 luna pasa sr. Refunjol a wordo proponi pa sr. Nelson Oduber, prome minister e tempo ey, como candidato di Gobierno di Aruba pa Gobernador. Algo sigur historico mirando cu sr. Refunjol tabata den e mundo politico. Sinembargo, debi na e persona di sr. Refunjol, un hende di tur hende, un hende di integridad intachable, y un Arubiano di curason, e proposicion aki a wordo carga pa tur partidonan politico di Aruba, y a wordo acepta pa e tempo ey, Reina Beatrix como e representante di Reino na Aruba y esey ta algo hopi grandi.
E forma con sr. Refunjol a desplega su cargo di Gobernador tabata un forma digno y excelente. Tur hende ta pasa, durante su carera, den momentonan bon, bunita y momentonan menos bon, bunita; y ta e forma con bo ta reacciona ta defini bo, como ser humano y como profesional, como representante di Reino aki na Aruba. Indudablemente e momento cu a defini e carera di sr. Refunjol, tabata na momento cu e mester a atende cu e crisis den Reino na juli 2014, cu a desemboca den e Koninklijk Besluit, y mes momento atende cu e crisis nacional cu e welga di hamber y protesta di manifestantenan rabia dilanti di su oficina. Na e momentonan ey sr. Refunjol a demostra grandesa y clase, y a ehecuta su responsablidadnan cu dignidad di cual awe henter Aruba ta hopi orguyoso di dje.
Esaki ta locual ta defini sr. Refunjol su trayectoria como Gobernador, y tambe su legado. Sr. Refunjol a sa di conberti un carera politico, culmina cu e trayectoria como Gobernador, den algo hopi bunita. Esaki ta e legacy di sr. Refunjol, y ta un inspiracion pa mi persona, y pa mas politico.
Mi ta gradisi tambe sra. Refunjol, y famia pa e permiti sr. Refunjol dedica su bida na sirbi nos comunidad. E respet y aprecio cu tin den henter nos comunidad pa sr. refunjol y su famia, sigur ta algo di ta hopi orguyoso di dje. Cu Dios bendicion’e y su famia den futuro”, tabata palabranan di sra. Evelyn Wever-Croes, lider di MEP.
- Pueblo Ta Papia ta start dia 3 di Januarie 2016.
- Scucha pueblo duna su opinion-Tur dia for di dialuna pa diabierna for di 1.30 – 3.00 P.M.
- Atravez di Hit 94 y Cyber Fm Boneiro.
- Pueblo Ta Papia e Programa di puebo.
Johnnyhabibe-Anchorman 