Oranjestad-Rumannan,
E fiesta di Pasku di Nasementu ta introdusí nos den e misterio di Dios su miserikòrdia. Ora nos kontemplá e lugá di nasementu di Hesus na Bètlehèm, nos ta keda asombrá riba e manera inkreibel i maravioso ku Dios a skohe pa bin bishitá nos. E ambiente, e personanan, tur elemento ta mustra sensies i humildat. No tin lugá pa “mundanidat”. No tin nada ku ta kita nos atenshon. E silensio i hasta e skuridat di anochi ta invitá nos pa pone nos mirada riba Esun ku ta drumi den e lugá kaminda bestianan ta kome. “Dios a mustra su miserikòrdia i su bondat dor di ofresé salbashon na tur hende” (Tito 2,11). Asina San Pablo ta bisa. Si Dios a skohe e manera aki pa bin salba nos, p’esei nos tambe ta yamá pa bira humilde i disponibel pa asumí e mes un aktitut i forma parti di su reino. El a mustra nos e kaminda pa bai serka esnan ku tin mas nesesidat.
Obispado di Willemstad ta deseá un Pasku di Nasementu yená ku e amor miserikòrdioso di Señor Hesus ku lo hasi nos misionero di legria i speransa den nos famia i komunidat.
Un Felis Pasku di Nasementu di nos Señor Hesukristu pa un i tur!
+ Luis A. Secco, SDB
Johnnyhabibe-Anchorman 