Oranjestad-Pueblo di Aruba, ora algo no ta original of no ta funciona manera mester ta, esaki ta wordo yama pa algo cu ta ‘nep’. Den caso di Parlamento di Aruba, a base di e echonan cu ta tuma lugar ey den, pueblo por bisa cu Aruba tin un nep parlement? Un parlamento cu ta parce di ta funciona corecto pero cu ta laga hopi di desea. Esaki no solamente ta mi opinion personal, pero mi ponencianan ta haya rason door di expresionnan di e propio ex Gobernador. Den su discurso di despedida, sr. Gobernador a declara cu Parlamentarionan mester controla Gobierno y di ta critico pa aproba of desaproba legislacion. Cu otro palabra, e parlamentarionan actual y muy en particular fraccion di AVP, NO a haci asina! E parlamentarionan di AVP NO a controla y ni tabata critico cu Gobierno su maneho. Esey sr. Gobernador tabata bisando. Contrario na esaki, e parlamentarionan di AVP a controla y tabata critico riba oposicion den Parlamento pa 7 aña largo y ta siguiendo asina. Tambe sr. Gobernador a declara cu como representantenan di pueblo eligi, ta boso tarea pa independientemente, a base di boso propio formacion di huicio, criterio y a base di boso consenshi, pa haci escogencianan. Aki sr. Gobernador ta referi na e echo cu pa 99.9% di tur e leynan y mocionnan pasa den Parlamento, fraccion di AVP a vota manera Zombi. Djis vota pro e proposicion, si esaki ta bini di e skina Berde. Tambe cu aparentemente fraccion di AVP no tin consenshi. Di lo contrario e lo no a bisa asina. Ta hustamente pasobra e forma di hiba maneho den Parlamento ta uno sin norma, sin balor y sin consenshi, sr. Gobernador a menciona e parti aki. Otro declaracion negativo tabata cu si parlamento, por ehempel, unanimamente, y los for di color politico, acepta un mocion, anto ta nan tarea pa percura tambe pa esaki wordo ehecuta. Kiermen cu parlamento ta nonchalant. Nan no ta follow-up riba continuacion di dicho leynan aproba. Tur cos ta keda den lachi toch? Un dikke vette NUL sr. Gobernador a duna e Parlamento di Aruba. Berguensa! Anto nan ta hari tambe durante e ocasion di despedida di sr. Gobernador. Esey ta musta pueblo di Aruba con hopi ta interesa e parlamentarionan di AVP, con sr. Gobernador a evalua nan funcionamento. Awor un parlamentario cu un consenshi di klinker no por sinti si. E resultado di e declaracionnan ta un berguensa pa esnan (manera cu e propio sr. Gobernador a bisa) cu a eligi e parlamentarionan di AVP pa controla y pa sigui den forma critico, e maneho di gobierno y pa aproba of desaproba legislacion. Pueblo tin e oportunidad di drecha cos otro aña cu su voto di coreccion.
Johnnyhabibe-Anchorman 