Oranjestad-Curtis Fraser (POR) – Nos ta yegando mas y mas serca di 4 Augustus, dia cu publico lo ser conoci cu diferente lista politico y ken a haya cua number.
Ya caba nos a mira diferente problema surgi a consecuencia di numeracion di candidatonan.
Dus dicon keda cu un ley anticua cu ta causa asina hopi problema tur temporada di eleccion.
Mas ainda, dikon keda cu un ley cu ta laga e poder pa dicidi ken ta sirbi pueblo como parlamentario den man di politiconan enbes di pueblo?!
Mi pensamento ta lo siguiente…lidernan politico NO kier mira e ley di kiesverordening cambia paso esey lo kita poder for di nan.
Kiko mi kiermen cu kita poder for di nan?
Lidernan politico ta usa e ley di kiesverordening pa nan beneficio den e siguiente maneranan:
(1) Si un candidato tin un curason activista y lo berdaderamente traha na bienestar di pueblo enbes di partido, y pa es motibo no tin siguransa di por controle, lo partido NO dune un number preferencial.
Lo ta mihor pa tene net pafo di un number cu lo lagele sinta den Parlamento, unda e lo por bringa pa cambionan pa su pueblo, y como alternativa complace cu un trabou di advisor, coordinador, etc.
Asina por controla e mayoría cu ta representa e partido den Parlamento y garantisa cu e functionamento di “Stempel Parlement” sigui.
(2) Lidernan politico tambe ta usa e ley actual di kiesverordening manera un herment di poder dor di priminti un number clave na un ciudadano cu e lider kier convence pa subi lista; esakinan ta e “Power Plays” cu ta pasa tras di cortina cu ta trece discordia den partido y pueblo.
Enbes di confia den un sistema cu ta pone e decision di ken ta representa pueblo den Parlamento den man di lidernan político, mi ta pensa cu a yega tempo pa pone e poder aki den man di pueblo via voto.
Si como politico bo no por demonstra un amor pa sirbi bo pueblo, nos mester por tin e derecho di mustra nos mal contento via votonan electoral; no por cu un candidato su votonan ta baha te 400 y un otro su votonan ta subi te 600+ y ainda esun cu 400 ta keda cu su stoel den parlamento dilanti otronan cu a crece bay lage.
Ya cu AVP a demonstra di no ta interesa den berdaderamente pone e poder di nos democracia den man di pueblo, y MEP a bin cu un “stunt” cu nan sa lo a fracasa na man di nos Stempel Parlement, partido POR si ta pone accion tras di e dicho “ta e cambio cu bo kier mira” y ta bin cu un protocol cu lo pone e candidatonan di POR cu mas voto den Parlamento. Si di berdat MEP tabata apoya e cambio di ley lo nan tambe a tuma e paso pa firma un protocol interno.
Tin solamente un hefe, PUEBLO!
Pueblo mester tin e poder pa manda tur hende cas, for di prome minister te parlamentario, solamente dor di deposita nan vota un caminda diferente!
Ban pone e curason di nos democracia bati atrobe, vota Curtis Fraser, vota e Forsa Nobo. Hunto Nos POR.
Bo tin deseo di anuncia den Johnnyhabibe.net
tuma contacto cu nos na telefon mainta despues di 10 or na 5828904
————————————————————————————
Johnnyhabibe-Anchorman 