Rudy Richardson di MEP: Den Union Nacional nos lo crea un Aruba mas husto den siglo 21

Posted: March 28, 2018 in Uncategorized

RUDY RICHARDSON

Oranjestad -Den mi compromiso pa contribui den gobernacion di mi dushi Aruba mi ta bolbe expresa algun cos. Gobierno actual no tin arte, ni parte di e debe astronomico cu Mike Eman y su partido AVP a crea. A goberna desde 2009-2017 malisimo. Mi ta nenga di acepta cu e digno pueblo di Aruba no sa esaki. Mi no por acepta cu cierto hende kier sigui manipula e realidad amargo cu ta toca nos pa e siguiente añanan nos dilanti. Pero laga mi bisa esaki. Tanten cu e deficit no baha, e debe no por baha. Ora nos crea un crecemento economico den sector priva Foreign Direct Investment (FDI), nos debe nacional ta cuminsa baha y por trece esaki bek na normanan aceptabel den Reino Hulandes. Logico ami ta kere cu e crecemento aki mester pasa pariba di brug pasobra no ta aceptabel mas pa nos sigui desaroya Aruba den e mesun area. Gobierno su aparato ta yen, na unda cu no por papia mas di sostenibilidad den e sector aki. No tin logica basa riba interes general cu lo acepta cu nos desaroyo ta sigui den e rumbo aki. Tanten nos sigui kere den un politica cu no a hiba nos na mas prosperidad real, nos no lo alcansa pa saca nos pueblo di e desaster nacional aki. Nos ta bayendo pa di 4 aña cu no tin crecemento economico. Pues dimes no por paga e debe astronomico riba nos cabes y tambe futuro generacion.
Estado di bancarota
Actual Minister President Evelyn Wever Croes a presenta un plan multi-frontal di rescate siman pasa: E situacion ta mas malo cu nos a pensa. Practicamente tur departamento di estado ta den rood. Tin hende ta bisa cu Sra. mr. Evelyn Wever Croes a bisa cu no lo bin cu medida of ahustacion. Segun Mike Eman, cu el a bisa cu e por soluciona e problemanan di e gobierno anterior.  Con esaki lo ta posibel si Arubus, ATA, Postkantoor, Arutram, Aruparking, Serlimar, Utilities N.V., Elmar, WEB a wordo masacra cu e famoso Green Conference/Europe Meets America cu NO a trece crecemento economico, AZV, SVB, APFA, proyectonan di Bo Aruba, PPP sin control debido manera Hospital, Green Corridor, Watty Vos Blvd y edificionan di MFA’s. Practicamente tur cos ta den estado di bancarota. Aah prome cu mi lubida, e “BON DEAL” di nos refineria di Mike Eman, Mike de Meza y Richard Arends a laga RdA tambe cu 70 Miyon den rood. Un San Nicolas na suela den tur sentido. Ex-Minister President Mike Eman nunca a presenta un plan structural y real na nos situacion. Tur locual el a haci ta crea debe y mas debe cumprando tur hende na un manera dictatorial y anti-constitucional. Nos di Movimiento Electoral di Pueblo a hiba un oposicion fuerte contra e maneho neoliberal di AVP, pero pa nos mala suerte pueblo a dicidi otro na 2013. Na e momento ey pueblo no a realisa kico Mike Eman tawata kiermen cu “Ainda Falta” pa kita honor y dignidad di tur hogar aki na Aruba.
E clase trahador merece mas
Paisnan manera Hapon 200% di debe, Grecia 160%, un tiki mas cerca den nos region ta Puerto Rico y Jamaica tambe cu debenan nacional astronomico cu tur e consecuencianan negativo pa cu nan pueblonan. Cada pais ta diferente den recurso y desaroyo, p’esey no por compara niun pais cu otro. Por haya un idea si con por soluciona problemanan similar. Grecia no tawata tin un plan y esaki a complica cos mas aun. Minister President actual a presenta un plan di rescate/crisis. Tambe a mustra e curashi pa bin cu reforma fiscal mas tarda pa 2019. Esaki lo ta e solucion pa Aruba a largo plaso si TUR hende coopera. Mi ta sostene e plan 297 pa trece Arubanonan bek Aruba, algo cu mi a expresa den pasado en conexion cu reapertura di nos refineria cu a fracasa totalmente. E clase trahador merece mas di nos economia despues di 32 aña di Status Aparte combina cu mas oportunidad pa desaroyo academico mas pagabel. Banco Central di Aruba mester bin cu un maneho pa baha interes pa por brinda mas na nos pueblo. Nos mester crece e economia di Aruba pasobra nos a yena e isla aki te unda cu awe nos ta e di dos isla mas pobla na Mundo despues di Barbados. Nos tin problema cu salud publico combina cu envehecimento di nos poblacion. Nos mester nos hubentud. Nos no por perde nan: E atraconan, dropouts, adiccion, formacion di gang esaki no ta yuda nos pais den absolutamente nada. Gobierno tin e tarea di goberna pa tur hende riba e isla aki por yega na un bida sostenibel. Gobierno di MEP/POR/RED ta bezig cu esaki butando e ser humano central den tur e retonan cu Aruba ta enfrentando. No ban lubida e situacion cu Venezuela cu ta alarmante y ta perhudicando nos region.
Union ta haci forsa
Tin hopi trabao pa haci pero tur esaki nos por logra den UNION solamente. Nos no tin tempo mas pa argumentonan sin base y sigur nos no tin tempo mas pa erornan den pasado manera ora MEP tawata bezig cu reforma fiscal na 2007 cu no a bay manera planea. Ban stop di crea un pais unda cu mas di 85% ta e clase trahador cu sueldonan cu no ta yega den un economia importador, 10% clase media y 5% super rico. Ban crea un Aruba unda cu e clase trahador, 30% ta nivel (1), 30% nivel (2) cu ta participa mas husto posibel den crecemento di nos economia, un clase media di mas o menos 30%: profesionalnan ta nivel (1) y entreprenuers nivel (2), y e resto “rico”. Nos por crea un isla Caribense cu realmente ta contribui na democracia participativo den nos region den siglo 21!

spots 2

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s