Johnnyhabibe-Anchorman

Oranjestad – Den presencia di Secretario di Ministerraad señora Grace Koolman y di Griffier suplente di Staten señora Jacqueline Williams, Minister di Finanzas, Asuntonan Economico y Cultura Xiomara Ruiz-Maduro, diahuebs atardi a entrega Presupuesto 2018 den nomber di Gabinete Wever-Croes na Vice-Voorzitter di Staten Señor Alan Howell. Esaki ta e prome Presupuesto cu Gabinete Wever-Croes ta entrega na Parlamento. 

Minister Ruiz-Maduro a gradici tur esnan cu a traha incansablemente pa Presupuesto 2018 por a wordo entrega. E mandatario a pidi cooperacion di Parlamento di Aruba pa Presupuesto 2018 wordo trata mas lihe posibel respetando e espacio necesario pa esaki wordo studia. Y ta spera cu pronto por tin e debate publico na Parlamento pa asina Presupuesto 2018 bira un realidad y nos pais por conoce un presupuesto pa aña aki. 

E mandatario encarga cu finansa di nos pais a gradici Parlamento pa e pasenchi cu esaki tabata tin cu Gobierno cu bou di tur presionnan cu tabata tin a drenta gobernacion y cuminsa traha di biaha na e Presupuesto Supletorio 2017 y na mesun momento na Presupuesto 2018.

Gobierno di Aruba ta keda en espera e fecha na unda Presupuesto 2018 lo wordo trata na Parlamento y tur preguntanan cu Parlamento y pueblo tin por wordo contesta debidamente.

—————————————————————————————————————————-

    Bo kier anuncia den Johnnyhabibe.net-jama nos na

582 8094 – 582 0694

——————————————————————————————————————————–

Oranjestad-Siman pasa diaranson Staten di Aruba a trata e LIM, esta e Landsverordering Instelling Ministeries. Momento cu un gobierno cambia y dado caso cambia e carteranan bao di e constelacion nobo, e ora mester acudi na Staten pa haci esaki mediante un ley. Esaki ta di 8 biaha desde Status Aparte, pues desde 1986 cu a acudi na Staten pa haci dicho cambionan. E reunion aki supuestamente no lo mester tabata un reunion largo sinembargo a dura un total di 13 ora non stop.

Ningun conocemento di finansas
Durante e reunion publico aki e orador Mike De Meza a cuminsa splica Parlamento cu e no ta kere cu Energia mester cay bao di Minister Presidente, pero e ta conseha pa Glenbert Croes of Chris Romero tuma e cartera aki como cu nan tin experticio riba e tereno aki. Sin por a argumenta e pakico exactamente e ta pensa asina Mike De Meza a ripiti esaki como 8 biaha den su disertacion. Parlamentario Endy Croes mesora a reacciona cu Mike de Meza parce e auto Renault di antaño, esta un “Lelijk Eend” pega den prome speed. Segun Croes, net De Meza ta esun cu menos mester duna conseho cual cartera cada Minister mester haya. Mesora a recorda Mike De Meza cu e prome 4 aña di Gabinete Mike Eman 1 su persona a wordo complaci cu e cartera di Finansas sin ningun conocemento financiero. De Meza no tabata domina e materia y no sa ni un pataca di Finansas y tempo a mustra e eror grandi cu Mike Eman a comete dunando De Meza e cartera ey.

Politica anticua di AVP
Mike De Meza a haya un Aruba cu un debe nacional di 49% di GDP na 2009, den cuadro cu tur standardnan internacional. Awe nos tur sa e resultado final, esta un Aruba cu un debe nacional di 93% di GDP. Pues di cada florin cu drenta caha di gobierno awe, 93 cen ta comprometi pa paga debe. Awor e persona di partido AVP kende a causa e desaster financiero aki, kende alaves tempo e tabata Minister di Finansas durante un reunion den Parlamento a bruha den assetts y income, ta esun cu kier bin duna conseho con Coalicion mester “match” cada cartera di cada minister. Endy Croes a sigui splica durante su disertacion cu hustamente pa e motibo di e erornan grave cometi pa Mike de Meza y Mike Eman awe Aruba ta den su “moer” y cu nan ta sinta den e stoel otro banda ey. Pueblo a castiga AVP cu 10 mil voto y a bisa “NO” na e politica anticua cu AVP a bin ta practicando. A kere cu Mike de Meza y AVP a siña nan les pero aparentemente esaki no ta asina mirando e politica barata cu De Meza a bin ta hunga durante dicho reunion.

Croes a termina bisando De Meza: “Schoenmaker blijf bij je leest”. Esaki ta tipifica un persona cu kier duna conseho alrespecto algo cu e no tin conocemento di dje.

Oranjestad-Diahuebs 5 di april, lo tuma luga e reunion di Reino KOBBS (Koninkrijksoverleg Buitenlandse Betrekkingen) na nos hermana isla Corsou.

Bou invitacion di Minister di Asuntonan di Exterior, señor Stef Blok, Prome Minister señora Evelyn Wever-Croes lo asisti na e reunion importante aki.

Minister Blok kier conoce mas di e interesnan comun di tur cuater pais di Reino y establece un miho relacion den Reino. KOBB ta un bon momento pa revisa y mantene acuerdonan di cooperacion.

E puntonan di agenda pa e reunion ta encera tur tema relevante y strategico cu ta concerni e paisnan di Reino. Pero tambe ta duna espacio pa trata otro temanan. Prome Minister den e reunion di Reino aki lo trece e preocupacionnan di Aruba riba e situacion di Venezuela.

Presente na e reunion aki lo ta Minister President di Corsou, Eugene Rhuggenaath, Minister President di Sint Maarten, Leona Marlin-Romeo y Minister President di Aruba, Evelyn Wever-Croes. Y di Hulanda, Minister di Asuntonan di Exterior señor Stef Blok.