ORANJESTAD – Aruba a yama bonbini na un total di 540.377 bishitante ‘stay-over’ pa e prome mita di 2018. Esaki ta 2.6% (+13.634 turista) mas compara cu e mesun temporada pa 2017. Si exclui e bishitantenan di Venezuela, por mira un aumento di 6.9% (+33.734 turista) cual ta igual na un total di 522.853 bishitante pa nos isla. E cifranan ta indica crecemento den mercadonan clave pa Aruba, manera Merca, Canada, Brazil y Hulanda entre otro. Pa juni, Aruba a ricibi un total di 91.877 bishitante stay-over, cu ta 7.7% (+6.589) mas compara cu e mesun luna aña pasa. Excluyendo bishitantenan di Venezuela, por mira cu esaki ta 11.1% (8.709 turista) mas cu ta igual na 87.362 bishitante pa nos isla pa juni 2018.

E entrada pa camber di hotel conforme AHATA su resultadonan ta mustra pa e prome mita di 2018 un aumento di 12.4% – US$ 252.08 – den e entrada pa camber di hotel (RevPar). E anochinan ocupa (ORN) pa camber a aumenta cu 2.5%. Di januari te cu juni 2018, e prijs averahe pa camber (ADR) a subi cu 9.6% cu ta ekivalente na US$ 287.23.

Turismo ‘stay-over’

Aruba ta wordo representa den tres diferente continente. Compara cu juni aña pasa, pa 2018 e turismo procedente for di e continente Norte Americano a aumenta cu 12% (+7.130 turista/total 66.757 turista) y a trece 72.7% di total di turismo pa nos destinacion. Na juni, Merca a aumenta cu 11.8% (+6.823 turista/total 64.726 turista) y Canada a aumenta cu 17.8% (+307 turista/total 2.031 turista) compara cu e mesun luna na 2017. Pa e prome mita di 2018, Norte America a trece 413.633 turista pa Aruba, cu ta un aumento di 8.1% (+30.773 turista).

E continente Latino Americano a baha cu 4.3% (-683 turista/total 15.302 turista) unda Venezuela a baha cu 32% (- 2.120 turista/total 4.515 turista) compara cu juni aña pasa. Colombia a aumenta cu 16.2% (+653 turista /total 4.683 turista) y Brazil a baha cu 4.5% (-49 turista/total 1.031 turista). E continente di Latino America a trece 16.7% di e total di turismo pa luna di juni na nos isla. Pa e prome mita di 2018, Latino America a trece 70.751 turista pa Aruba, cu ta 19.6% (-17.234 turista) menos compara cu e mesun temporada aña pasa.

Pa loke ta Europa por nota cu turismo a baha cu 6.8% (-469 turista/total 6.381 turista) compara cu e mesun luna aña pasa. Reinonan Uni a baha cu 47.9% (-1.183 turista/total 1.289 turista). Manera informa anteriormente door di e asina yama ‘BREXIT’ na Inglatera, TUI a haña nan mes obliga di cancela un di e dos charternan for di e destinacion aki, pa Aruba. Por mira cu e perdida di 7.500 asiento y e caida di e mercado di Reinonan Uni ta wordo compensa cu crecemento for di otro paisnan. Mayoria di esaki ta cu e di 7 vuelo adicional pa siman di KLM cu A.T.A. a logra confirma na november aña pasa. Ademas, TUI Hulanda a subi nan cantidad di asiento pa Aruba pa asina A.T.A. Europa ta keda contribui na crecemento di turismo di calidad pa nos destinacion.

For di otro paisnan Europeo; Hulanda a aumenta cu 18.2% (+424 turista/total 2.755 turista), y Alemania a aumenta cu 7.7% (+31 turista/total 436 turista). E continente Europeo a representa 6.9% di turismo pa Aruba pa luna di juni. Pa e prome mita di 2018, Europa a trece 38.731 turista pa Aruba, cu ta 2.7% menos (-1.068 turista) cu e mesun temporada aña pasa.

Turismo Crucero

Durante juni 2018, 32.565 pasaheronan crucero a bishita nos destinacion riba un total di 9 diferente barconan crucero. Compara cu luna di juni aña pasa, turismo crucero a baha cu 17% (-6.672 turista crucero): na juni 2017 Aruba a haya 39.237 bishitante for di 13 crucero. Pues 4 barco crucero menos cu aña pasa, di cual 3 crucero mester a bay e asina yama ‘dry-dock’ inesperadamente, loke a contribui na cancelacion inespera cu a percura pa menos bishitante crucero durante luna di juni.

Pa e prome mita di 2018, un total di 437.245 pasahero crucero a bishita Aruba (un aumento di 0.5% +2.108 pasahero mas) riba un total di 182 diferente crucero (un bahada di 0.5% -1 barco menos).

Tourism Receipts / Central Bank of Aruba

Di acuerdo cu Banco Central e asina yama ‘Tourism Receipts’, pa aña 2017 a contribui cu AWG 3.078.5 miyon na nos economia, cu ta un aumento di 6.5% compara cu e mesun temporada na 2016.

Hotelnan / AHATA

Segun Aruba Hotel and Tourism Association pa e luna di juni 2018, e ‘Average Daily Rate’ (ADR) a aumenta cu 16.8% compara cu juni 2017 -US$ 200.80 na 2017 compara cu US$ 234.47 na 2018. E entrada pa camber disponibel, e asina yama RevPAR a aumenta cu 17% di US$ 165.91 na juni 2017 pa US$ 194.06 na juni 2018. E anochinan ocupa (ORN) pa camber a aumenta cu 0.6% pa juni 2018.

E resultadonan pa Juni ta cubri 13 hotel mayor y ta exlui Hilton y Holiday Inn. E resultadonan pa promer mita di 2018 ta exclui Hilton y inclui Holiday Inn durante e promer 4 lunanan.

Bo Spot Radial Na Hit 94 Semper Lo pone Bo Empresa Su Benta Crece y Crece.Join Bo Tambe E Clientenan Contento Cu Tin E Servicio Radial Di Daily Spots Di Hit 94 FM Stereo.Jama 5820694 Of 5828094 Despues di 10 Or di mainta y ricibi tur informacion.

Of Manda un Email na hit94fm@Gmail.com

——————————————————————————–

Oranjestad – Cu hopi orguyo Camara di Comercio y Industria Aruba (KvK) ta otorga certificado na e cursistanan cu a termina e curso Empresario Independiente Chikito/Mediano. Esaki ta di 4 aña cu e curso ta wordo duna y e biaha aki a trece algun adaptacion pa asina brinda un curiculo mas completo y alinea cu situacion real. E curso cu a inicia na oktober aña pasa no tabata uno facil pero cu sigur ta brinda e herment necesario na e (futuro) empresario cu kier cuminsa su propio negoshi. E curiculo diseña pa Camara di Comercio y Industria Aruba (KvK) ta special pa e formalisacion di un empresa chikito/mediano (SMEs).

E cursistanan a sigui pa 7 luna intensivo diferente les seminal riba diferente materia consistiendo di un cantidad amplio di topico. A amplia conocemento di e cursista riba marketing, legislacion, finanzas y administracion, impuesto, recurso humano y varios otro aspecto di negoshi manera diseña y presenta un business plan. Hunto cu esaki nan a haya e oportunidad pa promove nan mes pa haya un financiamento via Qredits. 

KvK kier logra via e curso pa informa y educa e (futuro) empresario pa ta miho prepara na momento di establece y maneha su negoshi. Pa e cursistanan e periodo di curso no tabata algo facil pero un periodo extenso cu a rekeri hopi dedicacion y trabou duro pa por pasa nan examen cu exito. Algun persona tin un negoshi caba y otro tin nan trabou diario pues e estudio y preparacion pa cada les den oranan liber sigur ta un sacrificio. 

Ta remarcabel con anima e cursistanan ta y alabes cu e curso ta brinda nan e oportunidad di cera amistad nobo via cua nan ta amplia tambe nan network comercial.

E curso ta basta intensivo y largo, y e ta exigi tempo di e cursistanan. E percentahe di presencia ta 80%. Sin cumpli cu esaki e ta bira dificil pa completa e curso cu exito. Esnan cu a logra a ricibi nan certificado pa completa e curso cu tin un balor comparabel cu un “middenstands-diploma” na Hulanda. 

Entrega di certificado a tuma luga diaranson, 11 di juli 2018 na KvK, sigui pa un celebracion ameno cu familiar y amistades. Entrega a ser haci pa Presidente di KvK, sr. Ernst Mohamed kende a elogia cada cursista pa e esfuerso y logro. Director Ehecutivo, sra. Sonja Velthuizen, tambe a felicita e cursistanan y a bisa algun palabra di estimulo pa sigui dilanti y cu KvK lo ta semper na nan disponibilidad. Dave Martinus, como coach y trainer di e curso aki, tambe a hiba palabra.

E certificado cu ta di nivel di un ‘middenstands-diploma’ di Hulanda tin gran balor tanto pa e persona como pa su negoshi y e logro aki di e cursista lo wordo registra tambe na Camara di Comercio na momento cu e negoshi wordo inscribi.

 Palabranan di gratitud ta bay na tur esnan cu a coopera na realisa e curso aki: Dave Martinus, Leo Maduro, Patrick Melchiors, Charisse Hoen-Daly, Bruce Harms, Benjamin Romero, Guido Picus, Emerson Vilcapoma, Dick Rikkengaa, Herbert Diaz, Frank Snijders y e team di WTS, Robert Kelly y Maria Ridderstaat, Boy Ecury, Roberto Lejuez y Olivier de Jong. 

Preparacionnan ta andando caba pa e di cinco edicion di e curso. Esnan interesa por cuminsa registra di awo caba pa e curso nobo aki. E siguiente periodo di curso lo ta di october 2018 pa juni 2019. 

KvK ta spera di por sigui brinda e apoyo y educacion necesario pa un y tur cu kier cuminsa cu su empresa por ta bon prepara pa esaki. Tur esnan cu kier participa den e siguiente curso, of haya mas informacion por tuma contacto cu sra. Sue-Ellen Farro-de Freitas Sousa na businessinfo@arubachamber.com of yama na 5821566 ext. 30.

Pone bo anuncio crece riba Hit 94 nos prijs ta comodo tremendo servicio di radio

y atencion personal na momento di produci y graba bo anuncio comercial

yama nos entre 10.00 A.M – 3.00 P.M. na 5820694 – 5828094  of manda nos un Email na hit94fm@gmail.com

Hit 94 FM Sintonia Nacional.

 

 

 

 

Oranjestad-E marca di producto femenino Always y su distribuidor na Aruba, Compra Ltd hunto cu ASA-Aruba Soccer Academy ta organisa e prome Always Girls’ Soccer Camp, un iniciativa pa encurasha mucha muhernan na Aruba di 6 pa 16 aña pa purba un deporte nobo of perfecciona nan tecnica di futbol.

E iniciativa aki ta parti di e programa di Always yama #LIKEAGIRL, cu ta motiva mucha muhernan pa sinti comodo cu nan mes y e hecho cu como hende muher bo por logra cualkier meta cu bo pone bo dilanti cu pasion, determinacion y esfuerso.

 E Soccer Camp ta exclusivamente pa mucha muhe di 6 pa 16 aña y ta tuma luga dialuna 16 & 17 di Juli na Centro Deportivo Franklin Bareño di 8am pa 12pm. E camp ta conta cu participacion di coachnan certifica di ASA-Aruba Soccer Academy y ta costa solamente Afl. 25.00. Tur mucha muhe cu registra ta ricibi nan t-shirt dry fit di always, nan certificado, refreshments, fruta y un goody bag cu otro productonan di P&G manera Herbal Essences y Secret.  Ainda tin algun cupo pa participa, por registra na 5925235 of bishita e pagina di Facebook di Always Aruba pa mas informacion.

 Always kier a gradici directiva di Britannia y Centro Deportiva Franklin Bareño pa nan contribucion na e camp aki y tambe na ASA cu pa añas caba ta promove futbol cu un team di mucha muhernan local, cultivando nan talento y pasion pa futbol.

 Always tin un relacion cu hende muher rond di mundo pa mas di tres decada, cuminsando den e etapa di pubertad, uno hopi bunita pero cu tambe tin hopi reto. Pa e motibo aki always ta comprometi pa sigui cu e lucha pa evita e drop den confidence cu hopi mucha muher ta experiencia den nan pubertad y stimulanan pa haci loke nan gusta, specialmente deporte, cu confiansa, #LikeAGirl.

 Contact:

Ana Maria Ramirez

anamaria@gethoohoo.com

+ 297 5941933