Johnnyhabibe-Anchorman

oranjestad-Awe pa prome biaha den historia di nos pais, Gobierno, bou liderazgo di Sra. Mr. E.Wever-Croes, a bin duna un update con presupuesto 2018 ta wordo ehecuta. Esaki a base di un mocion cu a wordo aproba door di MEP,POR y RED. Lamentabelmente fraccion di AVP a vota contra e mocion aki e tempo ey.

Lider di fraccion di MEP, sr. Tjon a splica cu e ta para awe den Parlamento cu sentimento mixto. E motibo di esaki ta cu un banda instancianan imparcial, a base di cifranan honesto, ta prueba cu e maneho ta honesto y responsabel. Pero apesar di esaki por deduci tambe cu CAFT, es decir Hulanda, kier impone mas norma riba pais Aruba.

CAFT

Den e rapport di CAFT por deduci cu CAFT kier impone con cierto proceduranan na Aruba mester cana. Nan kier exigi por ehempel pa introduci un norma riba nos maneho di personal. Tambe den e rapportnan por saca afo cu nan kier pa tur fondo adicional (meevallers) wordo aloca  pa cubri debe. Manera ta conoci e protocol 2015, firma y aproba door di AVP, a mina nos autonomia y tawata e base pa e ley di LAFT. Ful e proceder tawata contra nos estado di derecho y nos constitucion.

Futuro di pais Aruba

Sr. Tjon a splica cu como Arubiano e ta convenci cu riba tur nivel, Gobierno, Parlamento y Departamentonan Gubernamental, tin e profeshonalnan y e responsabilidad pa fiha e rumbo nobo pa nos pais. sr. Tjon a bisa: “ Nos mes por y ta responsabel suficiente pa drecha nos pais. Mescos cu Hulanda ta bisa nos cu Aruba mester gana e confiansa bek, mi ta puntra Hulanda ki confiansa ami como Arubiano por tin den nan”.

Pa termina sr. Tjon a bisa cu si Hulanda ta haya cu si un Arubiano ta kere den su pais y su hendenan, esey kiermen mes ora cu e ta contra Hulanda, laga nan defini esey asina e ora. Kere den Aruba y nos hendenan, no kiermen cu nos ta contra Hulanda. Ki bal cu nos maneho ta wordo hiba corectamente y nos ta drechando e rumbo di nos pais, pero Hulanda kier mina nos autonomia. Awo nan kier dicidi riba maneho di nos personal y con mester aloca nos fondonan. Mañan nan lo kier dicidi ki color di uniform nos por bisti y con y den kico nos por inverti?

E desaroyo aki ta preocupante y sr. Tjon a duna di conoce cu, contrario na Parlamento 9 cu un mayoría absoluto di AVP, fraccion di MEP no lo aproba niun ley cu ta mina nos autonomia y cu ta bay contra nos estado di derecho.

Oranjestad-Alan Howell, Parlamentario di POR, durante reunion publico di Parlamento unda Gabinete Wever-Croes completo ta presente pa duna un informe riba e prome mitad di aña 2018 segun presupuesto a bisa cu “awe ta un dia special y diferente den Parlamento di Aruba. Awe ta prome biaha den historia cu un Parlamento ta manda yama gobierno pa bin responsabilisa su mes den e prome 6 lunanan di gobernacion”.

El a indica cu e mocion #63 cu a pasa ta uno cu a bin di parti di coalicion, y cu e ta purba compronde con oposicion por a vota contra pa yama gobierno pa controlanan. “Mi no por compronde. Unico cu ta ponemi pensa ta cu nan no tin custumber di controla, nan no sa kico ta controla y kisas ta dificil pa nan lesa compronde, pasobra nan a haye skirbi y djis voor nan mester a bisa, pero…ni esey”.

Howell a pone enfasis cu ta pa prome biaha den historia un colacion ta yama su propio gobierno pa bin responsabilisa su mes, algo cu normalmente oposicion lo mester a haci, pero un biaha mas, ni esey.

El a bisa cu nan si sa con ta yama gobierno y pone nan para straight ora tin mester, pero tambe bisanan ora nan ta haciendo un tremendo trabou. “Mi ta hopi satisfecho cu e manera cu Prome Minister ta hibando su maneho. E gabinete aki no a haya un situacion facil, djis pa forma gobierno mes e tabata dificil debi na e situacion den cual nos pais tabata. Danki na e profesionalismo grandi y deseo di mehoracion di Prome Minister, cu a forma un tremendo ekipo cu algun a pensa cu e no lo a nace, pero ora e la nace, nan a bisa cu e no lo cana. Contrario na esaki por mira un gobierno solido, firme cu ta tuma decisionnan na bienestar di nos pais”, Alan Howell a expresa.

Mustrando riba e echo cu e mandatarionan ta scucha Parlamento y no viceversa, Parlamentario di POR a bisa cu minister di Infrastructura kier a bin cu un tarifa di Serlimar cu lo tabata bon pa pais, pero Parlamento a bise si e por bin cu otro alternativa y esaki e mandatario a haci y presenta otro opcion cual Parlamento a aproba tambe. Mescos por wak den e ministerio di Asuntonan Social, unda tin un minister cu curason y deseo pa mehora e situacion social di nos hendenan. Minister di Finansa tambe ta tumando decisionnan cu por ta no ta popular, pero ta decisionnan cu ta na bienestar di nos pais.

Por mira un Minister di Salubridad cu ya caba a bin cu e Arubig, un Minister di Husticia cu ta haciendo lo posibel pa bin cu un KIA nobo, un Minister di Enseñansa cu ta wak pa tur mucha tin un lugar na scol y Minister di Transporte cu ta trahando fuerte pa realisa e proyecto di ferry. 

Igualmente Alan Howell a bisa cu ora bo ta un gobernante of parlamentario bo mester sa ki ora un decision ta popular y ki ora no, pero tambe ora mester tuma e decisionnan cu no ta popular, tumanan y sali for di dje. Esey ta loke e gobierno aki ta haciendo, trahando na bienestar di nos pais.

Finalisando el a pidi cada minister pa splica cual ta e situacion den cual a haya nos pais, kico nan a haci te na e momentonan aki y kico ta e plannan pa sigui pa futuro. 

Oranjestad-Marisol Lopez-Tromp durante e reunion publico den Parlamento unda tur minister ta presente pa raporta na miembronan di Parlamento loke a wordo haci durante e prome mitad di aña basa riba presupuesto tabatin pregunta riba e miembronan di e huntanan di supervision di e diferente NVnan di gobierno, fundacionnan y otro organisacionnan den cual Gobierno ta conta cu miembronan.

E parlamentario di POR a puntra cual ta e proceso di screening ora ta nombra dicho miembronan, con ta elegi nan y cual ta e tareanan cu nan mester ehecuta. E pregunta aki a bin specialmente debi na e maneho di gobierno anterior unda algun ex minister a pusha cierto di e cosnan cu ta nan responsabilidad pa haci y cu lo mester ta den begroting, pa cierto di e companianan aki carga financieramente pa nan, unda ta papia tin biaha hasta di miyonnan. 

E ta considera cu e personanan cu tabata forma parti di e huntanan di supervision ta wak cu algo no ta corecto, nan lo mester a bisa no. No por ta asina cu awe ta wak den prensa documentonan cu por ta no ta ni completo cu ta mustra cu miyonnan a bay pa cosnan cu ta laga hende boca habri.

Teniendo na cuenta esaki y cu tur respet pa esnan cu a cubri of ta cubriendo e funcionnan aki cabalmente, a conciencia y cu tur profesionalismo, e ta considera cu pa evita e casonan cu a bay robes, ta importante pa tin un perfil determina pa e funcionarionan aki y pa por tin control cu e personanan cu ta wordo nomina ta cumpli cune. 

Finalisando e tema aki el a pidi cada minister pa duna un splicacion di e huntanan cu ta cay bou di nan, con pa percura pa forma y maneranan pa evita e cosnan robes cu a pasa den añanan anterior no ripiti.

ORANJESTAD – Ultimo por a nota cu gobierno kier cuminsa cobra pa recohe sushi di cas entrante 1 di januari 2019 ,e suma di 25 florin tur luna pa adres.

Nos di partido CURPA ta kere cu e sistema aki no ta justo. Dicon ?

1. Tin hopi hende cu ta doño di un tereno cu no tin cas ariba dje y no tin mester di e servisio aki. Pero lo tin di paga 300 florin pa anja.
2. Hopi adres na Aruba tin apartement tin biaha mas cu tres, como resultado cu e doño lo bai paga solamente 25 florin pa recoje sushi en bes di 100 como e cas tambe ta riba e mesun percela. Esaki no ta justo.
3. Pagamento via grondbelasting no ta e forma corecto, pasobra ta un biaha pa  anja ta paga grondbelasting y Serlimar ta keda cu problema di cashflow.

Pesei partido CURPA ta kere, pa ta mas eficiente mester cobra e servisio di recoje sushi di cas den e cobransa di awa, asina tur persona cu ta hasi uso di un meter di awa lo tin e obligashon di paga esaki tur luna, dje manera aki Serlimar lo no bai tin problema administrativo pa cobra  of core tras di placa, creando asina un manejo sano pa cumpli cu su debernan mensual, E manejo aki ya ta conosi caba na Merca y na nos hermana isla Corsow, y ta traha excelente.

Aplicando e sistema aki, hasta lo por pensa pa pone esnan cu ta conecta ariba e sistema di riolering paga un suma, ya cu pa anjanan caba ta usando e riolering SIN PAGA PE, mientras cu si tin cas cu tin di paga tur luna pa chica pos.

Dje manera aki nos di partido CURPA kier a mustra e pueblo di Aruba un bes mas cu ARUBA por wordo goberna …SIN MEDIDA…

Oranjestad-Biblioteca Nacional Aruba ta presenta otro edicion di su Festival di Buki pa Mucha. Actividadnan di Festival di Buki pa Mucha 2018 ta den luz di e tema ‘Amistad’. E aña aki e lema ta ‘Amistad! Traha storia hunto. Ta pidi scolnan pa registra pa un bishita di un autor of ilustrador na scol. Tambe ta pidi docentenan pa registra pa e tayernan na biblioteca. Esaki mas pronto cu ta posibel.

Comision di e festival ta produci un buki pa mucha specialmente pa e festival. Un buki cu lo bay na e scolnan participante. E aña aki ta produci un compilacion di 15 storia. Cada storia a keda ilustra pa artista visual Vanessa Paulina. Vanessa a crea tambe e imahen di e festival cu ta expresa e tema ‘Amistad’. Esaki a keda presenta na prensa. 

Ideanan y inspiracion pa haci algo cu e tema ‘Amistad’ tin hopi y biblioteca ta duna tayer na maestronan di scol basico con pa traha cu e tema aki den buki, Contamento di storia y otro expresion. E tayernan ta den siman di 17 di september pero registracion ta necesario. 

Autornan di buki pa mucha cu ta participa e aña aki ta: Hulanda: Mariska Hammerstein, Jeroen Hoogerwerf, Evelien van Dort y Danielle Schothorst. Di Corsou: Tio Ali, Crisen Schorea y Levi Silvania. Di Boneiro: Denise de Jongh-Rekwest, Surnam: Indra Hu-Ramdas, Colombia: Pedro A. Vargas Alvarez. E grupo di Aruba ta wordo forma dor di Gino Vrolijk, Richard Dabian, Sergio Jie-A-Loi, Rosabelle Illes, Liliana Braamskamp-Erasmus, Diana Marchena, Robert Reeberg y Vanessa Paulina como ilustrador.

Pueblo Ta Papia Ta Cuminsa pa 1.30 P.M. 

Scuche Riba 94.1 Di Hit 94 FM

Cu The Anchorman 

Johnny Habibe

Oranjestad-Diamars merdia, e tres scolnan di taekwondo, Brazil Taekwondo Stichting, Impact Taekwondo Aruba y Tiger Taekwondo a biaha pa San Jose, Costa Rica unda nan lo ta participando na e campeonato di taekwondo mas grandi di Centro America. E Costa Rica Taekwondo Championship ta premira di bira un grandisimo e anja aki atrobe y pa e motibo aki tambe varios atleta di Aruba lo forma parti di e magno evento di taekwondo. E atletanan cu lo midi forza den e XI Costa Rica Taekwondo Open ta Záhyon Klabér, Jourdé Klabér, Rasheed Lowe, Hakeem Lowe, tur di Brazil Taekwondo Stichting. Tambe nos tin e rumannan Nathan Fradl y Maelynn Fradl hunto cu Monica Pimentel di Impact Taekwondo Aruba y Nassip Bislip di Tiger Taekwondo. Pa su majan diaranzon a biaha e atleta Chiara Petrocchi. 

Presente na airport nos por a mira presidente di Aruba Taekwondo Bond Dr. Guaicaipuro Jimenez hunto cu director di Fundacion Lotto pa Deporte, Di Stefano Wernet cu den presencia di famia, amigo y conocirnan a hiba palabra deseando henter e delegacion di taekwondo di Aruba tur clase di exito na Costa Rica.

Oranjestad-Conoce Angelys Porto cu ta interpreta Jenny Tromp, prima di Jelitza. Jenny ta un hoben cu curashi y fuerte, e no tin miedo di hende y e no ta laga hende tum’e haci. Angelys ta e antagonista, e oponente di e protagonista.

Angelys tin 22 aña di edad. Actualmente e ta studia na Hulanda na Hogeschool Rotterdam. Den su tempo liber e ta gusta lesa, wak television y scucha musica.

Juan Fransisco Pardo, productor y director di Ciudad Oraño, a acerca Angelys despues cu el a wak Angelys su actuacion den un pelicula cortico durante un film festival. Angelys a atende e audicion y di ey el a haya e rol di Jenny den Ciudad Oraño. Jenny tabata un personahe interesante pa Angelys. E personahe di Jenny lo por mustra mal hende na prome instante, pero loke ta haci e prersonahe di Jenny unico tabata cu e por a wak y sinti e cosnan malo cu por pasa, cosnan cu otronan no tabata premira. Na final tur hende ta realisa cu Jenny tabatin rason. Jenny tin su caracter fuerte, sinembargo e ta stima y cuida su famia y amigonan. Angelys ta identifica su mes cu Jenny den su amor pa famia y amigonan.

“E tabata un experiencia hopi bunita. Mi lo kier sigui den e mundo di actuacion. Tambe mi a siña hopi di e team di Ciudad Oraño incluiendo loke ta actuacion pa camera.”

Na La Salle College ta unda Angelys a cuminsa actua. Despues na Colegio Arubano el a haya lesnan di actuacion, den cual el a profundisa mas den e arte di actua y el a descubri cu esey ta loke e ta gusta haci mas. E ultimo obra cu el a actua aden tabata titula St. Joseph’s Asylum. Tambe el a haci un pelicula cortico cu Gabriela Croes titula Sin Rastro, cual a gana e miho pelicula durante e Aruba Short Film Festival na 2015.

“Encuanto e actuacion mi ta kere mas dificil ta pa laga bo mesun personalidad un banda y echt drenta den e personahe y bisa of haci cosnan cu kizas bo mes no lo bisa of haci, pero e ta un rol y bo tin cu ta e personahe ey den ful su ser.”

Den e serie Ciudad Oraño lo por mira hopi situacion cu ta pasa den nos comunidad encuanto hubentud, specialmente den e temporada na scol secundario. E ta un tempo cu tur hoben ta siña conoce su mes. Angelys ta admiti cu cierto di e situacionnan den Ciudad Oraño, e mes a yega di pasa aden.

Angelys ta spera cu publico lo sostene nos hobennan, arte ta parti di nos cultura y apoyando nos hobennan ta algo positivo cu por hiba e hubentud dilanti. Ciudad Oraño a wordo interpreta door di hobenan Arubiano pa tur hoben.

Oranjestad-Ayera den Parlamento nos a ricibi bishita di representante di Departamento di Enseñansa y miembronan di comision Ortografia di Papiamento 1997 en conexion cu tratamento di e ontwerp-landsverordening houdende regels met betrekking tot de schrijfwijze van het Papiamento (IS/538/16-17, d.d. 30 maart 2017)(ZJ 2016-2017-863) cu dentro di poco lo keda trata pa Parlamento.

Parlamento a haya un presentacion di Sra. Audrey Tromp caminda el a duna un introduccion cortico (produccionnan existente na Papiamento, campaña di conscientisacion, buki blauw etc), djey a sigui cu un historia cortico di nos ortografia (1976-2018), a trata kico ortografia ta y kico e no ta, a haci un comparacion cu e ortografia di 1976, a trata e importancia di aprobacion di e ley di ortografia y a termina indicando kico mester tuma lugar pa futuro.

Parlamentario Tromp-Lee ta indica cu desde un principio el a enfatisa e echo cu Parlamento tambe mester y por aporta na e celebracion di Aña di Papiamento. Y mas importante ainda mester aporta na e parti di salvaguardia existencia y bon uzo di nos dushi Papiamento.

Sigur door di percura pa trata y aproba e ley aki, nos ta contribuyendo grandemente na finalisacion di un proceso cu tin añanan ta tumando lugar y cu te awe ainda no a logra keda finalisa.

Banda di aprobacion di e ley cu ta trata e ortografia di Papiamento, Parlamento sigur lo urgi, conforme conseho ricibi awe, pa Gobierno pone atencion na:

• Conscientisacion y informacion
• Ampliacion di e lista di palabra
• Diccionario (splicativo) di Papiamento
• Institucion di un Instituto di idioma
• E demas areanan di atencion pa loke ta trata nos lenga materno

Sigur di su banda Tromp-Lee lo keda accentua e necesidad pa Gobierno bin cu un maneho pa nos Lenga Materno. Tarea di Gobierno ta pa conserva, proteha y cuida nos idioma nacional Papiamento y stimula pueblo pa respeta y haci bon uzo di nos idioma. Segun Tromp-Lee na Aruba nos tur mester ta orguyoso di por papia Papiamento.

Pa finalisa Tromp-Lee ta indica di ta contento di e informacion ricibi door di Minister Lampe cu Aruba conhuntamente cu Curacao lo bay traha mas estrechamente ariba nos dushi idioma. Alabes e ta contento cu recientemente e por a tuma nota cu conhuntamente cu Curacao, Aruba lo bay traha pa Papiamento por keda poni riba e lista di herencia cultural intangibel di UNESCO.

Oranjestad-Comienso di e siman aki Parlamento di Aruba a cuminsa trata e tema di Serlimar. Un tema cu a causa hopi reaccion den pueblo, particularmente na momento cu a haci e anuncio di cambionan di tarifa entrante 1 juli 2018. Durante reunion publico tocante Serlimar, Fraccion di MEP a entrega Mocion No. 5, cual a wordo sosteni unanimamente, cu ta urgi pa esnan cu ta ricibi mesun servicio di otro compania no mester paga dos biaha pa e mesun servicio.

“Mi kier a gradici minister encarga cu Infrastructura pa entrega na parlamento e documentonan relaciona cu nos preguntanan manda por escrito, y tambe pa considera locual ta biba den nos comunidad relata na locual a wordo anuncia pa 1 juli 2018, y pa duna nos un presentacion cu posibel alternativa”, Parlamentario Daphne Lejuez di fraccion MEP ta comenta. E parlamentario ta haya cu nos tur ta responsabel pa maneho di desperdicio, semper y cuando esaki ta wordo refleha na un manera husto unda tur hende ta contribui. E compania responsabel pa maneha esaki na nomber di gobierno, mester pues haci e na un forma eficiente y efectivo pa asina por mantene su costonan di operacion na un nivel cu por cobra tarifanan socialmente responsabel. 

Parlamento por medio di Mocion No. 3, a pidi minister pa bin bek parlamento cu su plan, mirando cu e minister a presenta su intencion y ainda falta pa formula e detayenan, pa asina por haya aprobacion di parlamento, mirando cu esaki lo por tin efecto riba presupuesto di nos Pais y siguramente un efecto financiero riba nos comunidad. “Tambe a pidi minister pa duna un tempo amplio pa por conscientisa comunidad di su maneho, y pa e motibo aki minister a informa cu su intencion ta pa cuminsa cu su maneho nobo, unabes aproba, na maart 2019,” segun Parlamentario Lejuez.

Parlamentario Lejuez a trece dilanti durante e reunion publico cu e compania en cuestion lo mester a bira ‘self sustainable’ financieramente desde 2005, pero e ultimo 13 añanan ta ricibi subsidio di gobierno pa por opera.  Pues e pregunta cu a surgi ta si e maneho di e compania aki, cu mester hiba un maneho financiero sin ganashi, tabata uno optimal, eficiente y efectivo, y como tal e parlamentario a dirigi preguntanan tocante e maneho financiero di e compania durante e prome tanda.  

Maneho financiero socialmente responsabel

“Minister a contesta mi preguntanan pa locual ta e aumento di e costo pa e Raad van Toezicht cu a aumenta di 250 florin pa miembro pa reunion, awor pa 2.000 florin pa miembro pa luna”, Parlamentario Lejuez ta bisa. El a sigui splica cu: “Mirando cu segun e mandatario tabata tin hopi trabou pa trece e cuentanan anual retrasa di Serlimar na ordo – cu el a presenta tambe ‘ter inzage’ na parlamento pa 2012-2015, y ta sinti cu un suma fiho pa e miembronan di Raad van Toezicht lo yuda maneha e costo di e hunta aki.” 

Pa loke ta trata e reduccion di entrada di 2016-2017, esaki ta pa motibo cu no tabata cobrando agresivamente. Y pa loke ta Seroe Teishi, segun e mandatario, e ta un post cu ta perde placa y ta hustamente gobierno por medio di landsbijdrage ta contribui pa asina e costo aki ta mas pagabel. E alternativanan cu gobierno a presenta ta un tarifa fiho di 25 florin pa residencial y 35 pa comercial di cual pa residencial 17.50 lo bay pa colecta y 7.50 pa procesa desperdicio.  

Mocion pa no cobra cliente di otro compania dobel

Mocion No. 5 entrega por medio di fraccion MEP a tene cuenta cu tin un grupo di ciudadano cu ta haci uzo di otro companianan cu no ta Serlimar pa recogemento di sushi. Cu e intencion actual di gobierno, manera delinea pa Minister di Desaroyo Teritorial, Infrastructura y Medio Ambiente den parlamento, ta pa cobra tur ophaalpunt residencial, sin diferencia si nan ta cliente di Serlimar of no, pa e servicio di colecta y procesa desperdicio. Fraccion MEP a trece dilanti cu parlamento su interpretacion di e ley Landsverordening instelling Servicio di Limpiesa di Aruba, di acuerdo cu e principio di igualdad, ta cu actualmente tin base legal den e ley actual sin necesidad di cambio, pa un ciudadano haci uzo di e servicio di recogemento y procesamento di sushi di otro companianan cu no ta Serlimar sin tin mester di paga dobel.

Presentacion di alternativa
Tambe minister a menciona intencion pa cobra turista 2-3 dollar adicional den e passenger tax, y lo kier extende esaki tambe na pasahero di crucero, como tambe introduci tarifanan ora di importa vehiculo pa asina contribui na final di e bida di e vehiculo ora e mester wordo procesa como desperdicio. “Nos ta consciente cu mester contribui na un solucion pa desperdicio di Aruba y cu gobierno tin como tarea pa percura pa nos biba den un ambiente limpi, sano y saludabel den harmonia cu nos medio ambiente y naturalesa.  Pero un solucion asina mester ta uno husto y pagabel, pa duna un servicio eficiente, y efectivo. Unda  cu e compania estatal encarga cu e servicio ta hiba un maneho financieramente responsabel mirando cu su meta no ta uno pa produci ganashi,” parlamentario Lejuez ta splica.

ORANJESTAD- Expectativanan ta halto pa loke ta Cumbre’18 di partido AVP: E Compromiso cu Pais, Pueblo y Partido. Na Cas di Partido hende ta drenta sali pa confirma nan presencia diadomingo awor, dia 2 di september na e Cumbre importante aki. Lider di parttido Mike Eman a reitira cu pa partido Cumbre’18 ta un momento hopi grandi. “Esaki pasobra e inspiracion di nos partido semper ta e mandato di pueblo. Edeseo di pueblo ta e fundeshi di nos motivacion.”

Eman a conta con partido AVP a nace a base di un deseo comun cu tabata biba den pueblo for di inicio di siglo pasa. E anhelo pa un dia Aruba ta baas den su mes cas.  “Semper e deseonan cu ta biba den nos comunidad a traduci nan mes den meta, vision y misionnan politico cu a forma e forsa, e inspiracion y fuente di energia cu partido semper a pone como e obhetivo di locual e kier logra como punto di salida di loke ta biba den curazon di nos hendenan.”  Durante e ultimo lunanan dirigentenan di partido AVP a ocupa nan mes internamente cu organiacion di partido y externamente den bishita den barionan. Durante e simannan aki mes e partido berde a tene reunionnan den varios bario cu a wordo masha bon mes atendi. Un punto cu a bin hopi dilanti durante e reunionnan den barionan ta e efectonan di e medidanan. Tambe partido a tene un reunion grandi na Noord y un na San Nicolas. Eman: “Esaki pa a recoge di comunidad e sentimentonan cu ta biba pa asina partido por fiha su prioridadnan.” Dirigentenan di partido por haci uzo di e informacionnan aki y na mes momento sinti e deseonan cu ta biba den comunidad y wak con partido por fiha su compromiso cu pueblo di Aruba. 

Mike Eman a sigui bisa cu e ultimo lunanan el a scucha personalmente kico ta e deseo di pueblo pa loke ta e funcionnan y e rol cu partido y su dirigentenan tin cu asumi den comunidad. “Na Cumbre’18 cada candidato, cada miembro di partido lo ta presente cu tur e rikesa di e reflexion aki cu a bin dilanti durante e ultimo lunanan pa por presenta nan na nos Pais y na nos Pueblo. Esaki ta e compromiso cu cada un di nos tin cu pueblo di Aruba. Esaki ta wordo presenta durante e Cumbre na unda tur hende ta invita pa tey.”