Johnnyhabibe-Anchorman

Den Haag  – Durante un ceremonia na Bestuurskantoor, Minister Plenipotenciario sr. Guillfred Besaril a rindi honor na e baluartenan cu 35 aña pasa a establece e prome representante di Aruba na Hulanda. E recepcion a tuma lugar den presencia di henter e conseho di minister di Gabinete Wever-Croes I. Riba 26 di maart 1983 sr. Betico Croes (dfm) a inaugura e representacion di Aruba na Hulanda den presencia di diferente dignitarionan di e tempo ey e teritorio insular Aruba.

‘Mescos cu recientemente mi a para keto cu e personal actual di Arubahuis, empleadonan di ATA Europa, varios ex-empleado y mentornan di Arubahuis, awe mi ta na Aruba pa reconoce e fecha historico aki pa Aruba cu algun di esnan cu 35 aña pasa tabate presente na e momento grandi aki den historia estatal di Aruba. Of hunto cu famia di e funcionarionan di e dia ey, pero cu lastimamente awe no ta cu nos mas. Aruba ta agradecido na boso tur cu a para tras di e vision pa establece un representante di Aruba cu a hunga un rol masha importante den e anhelo di Aruba y e lucha pa su Status Aparte, asina Minister Besaril a bisa.

E mandatario a sigi bisa cu durante e decadanan cu a sigui despues di Aruba su Status Aparte a opta na concentra mas riba e celebracion di “Arubadag” en coneccion cu e dia nacional di Aruba na Maart. ‘Esaki a trece cune cu no a duna e fecha importante di 26 di Maart e lugar cu e merece den nos historia. Pa es motibo aki mi a hasi mi maximo esfuerzo pa no laga 2018 pasa bai sin duna e fecha di 26 di maart 1983 e respet y balor necesario. Desde awe en adelante Cas di Aruba na Hulanda, staff y personal tin nan dia cu lo tuma lugar tur aña riba e prome diabierna di april. Di es forma aki por sigui duna e celebracion di nos dia Nacional na Hulanda su debido atencion sin perde di bista e bunita momento di refleccion pa Arubahuis di 26 di Maart 1983.’

Despues di su discurso Minister Guillfred Besaril a haci entrega di un plakkaat como reconocimento na e baluartenan di e fecha ey: sr. Glenbert Croes den nomber di su tata sr. Betico Croes (dfm), sr Nelson Oduber, sr. Ludwig Lacle, yui homber di sr. Roland Lacle (dfm), sr. Daniel van der Kuyp, yui homber di sr. John van der Kuyp (dfm), sra. Astrid Kelly y sr. Miro Dabian.

Tur esnan cu a ricibi un plakkaat a gradici Minister Plenipotenciario sr. Guillfred Besaril inmensamente pa e reconocimento aki y tambe a expresa nan aprecio na sr. Besaril, cu ta e prome Minister Plenipotenciario na Hulanda cu a duna e fecha historico aki pa Aruba y pa Arubahuis como organisacion e reconocimento nesesario.

• Anuncia na Hit 94 FM Stereo

• Sinti e diferencia y crece bo empresa

• Jama 5828094 of 5820694

• Email nos na hit94fm@gmail.com

       ——————————————-