Johnnyhabibe-Anchorman

Oranjestad – Parlamentario Endy Croes ta splica cu den temponan hopi dificil e gobierno aki ta logrando cosnan grandi. Figurabo si Mike Eman y AVP no a desgracia Aruba na e manera cu nan a haci’e con mihor nos lo por ta awe. Mike Eman y AVP a percura pa un Mega Debe y un desaster financiero nunca bisto mientras momento cu pueblo a core cu nan, nan a baha na awa lagando dos mensahe pa pueblo cual porcierto ta prohibi pa lubida. Uno tabata ta cu Mike Eman y AVP ta orguyoso di e debe y e debe t’ey pa nos tur pag’e pa futuro. E di dos: Benny y AVP den nomber di Mike Eman a splica cu “Nan, esta AVP no ta give a damn” cu locual nan a haci cu e pueblo! Esaki ta refleha e responsabilidad y e stimacion cu Mike Eman y AVP tin pa e pueblo aki.

Desaster laga atras pa AVP

No solamente nan a desgracia e pais aki financieramente pero tambe a laga un desaster social atras. Por ehempel, e ex-minister Social di AVP tabata mucho ocupa ta bende permiso y cu su negoshi di 2000 onheffingen, enbes di tabata atendiendo problemanan social di pais  Aruba. Pues cu cambio di gobierno tur e bagamunderianan aki a pasa pa pasado. Gobierno actual – bao di condicionnan sumamente desfaborabel – mester a busca formula pa saca Aruba dilanti. No mester  perde for di bista e hecho cu banda di e desaster cu AVP a laga atras nos tin un Hulanda cu ta pone hopi presion y condicionnan despropocional pa Gabinete Wever Croes. Hulanda ta co-culpabel di e situacion actual. Alabes e situacion delicado di Venezuela.

Logronan positivo

Den tur e turbulencia aki Gobierno a percura den menos di dos aña pa diferente cos positivo sosode. Uno a percura den 2018 pa un presupuesto budget neutral y no a bin presta extra placa den luna di december manera cu AVP a haci pa 8 aña largo. Gobierno a percura pa amplia canasta basico buscando e alivio pa pueblo. Gobierno a aumenta minimunloon y a baha loonbelasting. Tras di trabaonan duro di Ministernan por mira cu Aruba tin por ehempel un Turismo creciente cual porcierto den un publicacion recien Aruba ta na number 4 den e top mundial pa cu RevPAR esta Revenue per Available Room (entrada pa kamber disponibel) pa locual ta trata e promer 6 lunanan di aña na un balor di $259.47 dollar. Pa locual ta trata economia tambe a cuminsa duna tendencia di mehoracion y ta creciendo. Last but not least, trabaonan duro riba e tereno di labor. Nos por a tuma nota di un rapport recien publica unda a confirma cu desempleo na Aruba a conoce un rebaho substancial den comparacion cu aña 2017 y esaki hustamente ta refleha bek riba e trabaonan cu ta wordo desplega. Sigur nos no ta ainda unda nos lo kier ta y sigur esaki lo tuma mas tempo promer cu por tin Aruba riba rails atrobe despues cu AVP a “ontspoor” Aruba. Nos lo percura pa sigui traha dia y anochi pa rescata Aruba y garantisa e trankilidad y felicidad bek di nos pueblo.

Gabinete Wever Croes haciendo lo imposibel bira posibel den corto tempo. Croes ta termina pidiendo pueblo e comprension necesario pa hunto nos persevera pa lo mihor, anto Sin Miedo!

Oranjestad -Recientemente a tuma lugar e prome reunion di planificacion pa e proyecto di
SISSTEM (Sustainable Island Solutions for Science, Technology, Engeneering and Math) cu lo
inicia na september proximo na Universidad di Aruba. SISSTEM a wordo financia pa e 11 fondo di
Desaroyo Europeo cu 13 miyon Euro.
SISSTEM Steering Committee
Minister Ruiz-Maduro ta informa cu a forma un Steering Committee di SISSTEM cual su meta ta pa
monitor e desaroyo di e proyecto y e fondonan cu Union Europeo a pone disponibel. E Steering
Committee ta consisti di e siguiente personanan: sr. David Akopyan UNDP Resident Representative
a.i. y sra. Sharifa Ali-Abdullah Assistent Resident Representative di United Nations Development
Program (UNDP), Professor Buys, Professor Gielen y sra. Karine Op de Beeck di Katholieke
Universiteit (KU) Leuven di Belgica, sr. Glenn Thode, sr. Patrick Arens y sr. Eric Mijds di
Universidad di Aruba. Ademas nos tin como miembronan di e Steering Committee, e
representantenan di Departamento di Asuntonan Economico (DEACI), Sra. Maria Dijkhoff-Pita
Directora di DEACI y sra. Vivian Loopstok-Geerman Hoofd Afdeling Sustainable Development
Planning na DEACI.
Proyecto SISSTEM
E proyecto SISSTEM ta consisti di dos parti:
1. E programa academico cu ta wordo prepara den cooperacion cu KU Leuven y Universidad di
Aruba. E parti aki a inicia y e prome aña di e ‘Bachelor Program’ ta cla pa cuminsa na september
awor na Universidad di Aruba.
2. E parti di renovacion di Maria Convent patras di misa San Fransisco na Playa. E renovacion a
wordo programa pa por cuminsa na aña 2020. Monumenten Bureau y DOW tambe lo ta envolvi
cu e proyecto aki como cu e edificio di Maria Convent ta un edificio monumental. E parti di e
proyecto aki ta inclui tambe laboratorionan modular, ekiponan pa laboratorio, muebles y IT. Parti
B di e proyecto lo wordo maneha door di UNDP su oficina na Trinidad & Tobago.
E financiamento di e proyecto ta bini di Union Europeo y ta costa aproximadamente 25 miyon
florin.
Bishita cerca Minister Presidente
E representantenan di UNDP a usa e oportunidad cu nan ta na Aruba pa haci un bishita cerca
Minister Presidente Sra. Evelyn Wever-Croes pa asina por a informe tocante di e desaroyo di e

proyecto di SISSTEM. Alabes a hiba combersacion riba e anvancenan y implementacion di e
Comision di Sustainable Development Goals di Gobierno.
SISSTEM ta cuadra den e Maneho di Inovacion y Maneho Economico
E mandatario ta subraya cu e proyecto SISSTEM ta pas den e programa di inovacion di Gabinete
Wever-Croes y den e Maneho Economico 2019-2022. Ministro di Finansa, Asunto Economico y
Cultura encarga cu e cartera di e fondonan Europeo ta sostene e proyecto di SISSTEM y ta
sumamente contento cu e planificacion di e proyecto a inicia.

Oranjestad – Den studionan di Hit 94 awe mainta tabata presente E joven Ray Ann Hernandez directora di Unoca hunto cu SrNelson Gonalez di Studio Nelson Gonzalez,awe den e departamento di prensa di Hit 94 y Noticiero 94 nan a bin informa nos riba e exposicion cu lo tuma lugar diabierna dia 9 di augustus na Unoca e exposicion su nomber ta Between 2 Waters,corda bin mira e exposicion valioso aki y duna bo porte pa nos culura Arubano.

Aki ta sigi e entrevista realisa cu Ray Ann Hernandez y Sr.Nelson Gonzalez:

Den Haag-Oranjestad –Minister Plenipotenciario Guillfred Besaril – den su afan pa encontra cu algun grupo di studiantenan pa a caba di yega Hulanda – a bishita e grupo cu a bin pa studia na Utrecht. Esaki a tuma lugar na comienso di nan programa di opvang na Centro di Conferencia Woudschoten. Tambe tabata presente coordinador di Enseñansa na Arubahuis James van der Linde, acompaña pa Rosalinda Croes-Kelly y Sharine Croes di Departamento di Enseñansa di Aruba (DEA).

E mandatario den su discurso na e studiantenan a entafisa riba encontra e balansa entre estudio y tempo liber. ‘Purba saca lo maximo di bo estadia na Hulanda. Estudio ta sumamenta importante, pero banda di esey bo mester hiba un bida social pa asina trece balansa den bo bida. Esaki ta hopi bon pa bo desaroyo mental,’ asina minister Besaril a bisa e studiantenan.

Sr. Besaril tabata hopi cla den su aviso pa e prome aña no bai Aruba cu vakantie. ‘E prome lunanan ta momentonan crucial pa bo estudio; bo enfoke mester ta riba esaki. Banda di esaki na e mesun momento bo mester cuminsa adapta na e bida na Hulanda.’

‘Disfruta di e opvang y purba na cera hopi amistadnan cu por ta hopi positivo den e prome aña. Hopi biaha esakinan ta amistadnan cu por ta duradero. Mi ta papia di mesun experencia dia cu ami a bin studia na Hulanda. Cu algun ainda e amistadad tei,’ tabata e comentario di minister Besaril.

E mandatario a bisa e studiantenan cu nan mester ta conciente di e hecho cu nan a caba un EPI, HAVO of VWO y esey ta nifica cu nan tin e potencial pa sigi un estudio avansa na Hulanda. Besaril: ‘Aruba a deposita confiansa den boso; saca probecho di esaki. Na otro banda tene cuenta cu boso lo encontra retonan riba boso caminda. No keda cana rond cu pregunta of problema, pero acerca bo mentor, miembronan di boso POC of Arubahuis. Bin padilanti cu bo problemanan pa bo por haya e ayudo nesesario y na tempo.’

Finalmente Minister Besaril a gradici e mentor di Utrecht Omar Besaril y su POC pa e opvang na e studiantenan nobo y a desea e studiantenan tur clase di exito den nan estudio.

Oranjestad – Den fin di siman un incidente lamentabel a sosode na KIA, caminda un detenido a logra huy. Awe nos lo manda pregunta por escrito na Minister di Husticia pa mas liher posibel Parlamento wordo informa di e resultado di e investigacion interno. Esaki cu e solo meta pa Parlamento, si ta necesario por aloca fondo adicional pa nos Instituto Coreccional y evita un incidente asina den futuro.

INVESTIGACION INTERNO

E sucedido cu a tuma lugar por tin di haber cu falta di tecnologia, scarcedad di personal, of kisas infrastructura. Nos no kier bay specula awor pero kier wordo informa mas liher posibel door di Minister di Husticia riba e resultado di e investigacion interno. Esaki cu e solo meta pa evita cu esaki por tuma lugar den futuro.

FORMATIEPLAN

Na mes momento nos ta haci un apelacion na Minister di Husticia pa mas liher posibel  formalisa e reorganisacion di KIA. Esaki ta un proceso cu tin andando pa basta tempo caba. Na 2017 tin te hasta un comunicado interno a wordo emiti cu lo inicia e proceso di solicitud a base di e “formatieplan” nobo. Nos ta compronde cu kisas kier a trece algun cambio den e plan cu a wordo laga atras, pero ta necesario pa aworaki tuma un decision riba esaki. Nunca no por complace tur partido, pero a base di un regla di evaluacion y den bon dialogo, mester tuma decision aworaki.

PA CONCLUI

Den un siguiente articulo lo mi elabora riba un Instituto Correcional nobo, su implicacionnan financiero y su necesidad. Pero na mes momento si e memorandum financiero indica cu un KIA nobo no por wordo realisa aworaki lo amplia riba otro metodonan pa mitiga diferente di e riesgonan actual.

Oranjestad – Recien a sali publica den noticia nacional di e destinacion Hawaiii, como tambe otro fuente internacional di informacion turistico, cu Aruba a sali den e top 5 pa loke ta trata e prome 6 luna di 2019 ora ta compara e entrada pa camber disponibel, e asina yama RevPAR, cu otro destinacionnan competitivo pa loke ta e categoria di “sun, sand & sea”.

RESULTADONAN DI REVPAR

Si nos compara e mercadonan internacional pa loke ta trata entrada pa camber disponibel pa e prome 6 luna di 2019 por mira cu hotelnan na Maldives a sali den top di RevPAR cu US$ 414.-, sigui pa French Polynesia (region Oceania) cu US$ 351.-.

Maui (estado Hawaii) a sali na di tres luga cu US$ 316.- sigui pa Aruba na di cuater luga cu US$ 259.-

Na di 5 luga a resulta Kaua’i (estado Hawaii) cu US$ 213.-.

Maldives tambe ta na cabez pa loke ta trata e ADR (Average Daily Rate) cu US$ 590.- sigui pa French Polynesia cu US$ 539.-. Maui a sali na di tres luga cu US$ 402.- y Cabo San Lucas (Mexico) a sali e di 4 cu US$ 388.-. Aki Aruba a sali na e di 5 luga cu US$ 301.-

E informacion a ser compila pa Hawaii Tourism Authority, usando informacion di entre otro STR Inc.

ENCUESTA TRAVELSAT

Awendia e bishitantenan pa Aruba kier mas cu solamente e lama bunita y un clima dushi. Nos isla ta conoci pa ta un isla competitivo cu un variacion amplio di eventonan cu e turista por scoge for di dje.

Naturalmente esaki mester refleha bek entre otro den nan experiencia. Pa midi esaki, Aruba Tourism Authority continuamente ta haci encuesta. TRAVELSAT ta un compania renombra internacionalmente cu ta asisti A.T.A. cu diferente research. Durante 2017-2018 a haci un encuesta riba mas cu 60 diferente punto, den diferente categoria, manera experiencia general, experiencia di nos acomodacionnan, transportacion, cultura, shopping, actividadnan cu nos ta ofrece pero tambe nos medio ambiente etc.

ARUBA MESTER SIGUI ELEVA CALIDAD DI EXPERIENCIA Y PONE ATENCION NA “VALUE FOR MONEY” 

A resulta cu pa loke ta trata e experiencia di nos acomodacionnan por mira cu Aruba ta score halto, compara cu otro destinacionnan den Caribe. Sinembargo, nos mester ta consciente cu Aruba como un destinacion tin competencia fuerte eyfo. Tambe cu e bishitantenan ta mas exigente y sigur kier mira balor pa nan placa, principalmente ora ta paga relativamente mas pa un vacacion. Bon calidad, bon servicio y hospitalidad ta algun di e componentenan cu a hiba un destinacion manera Aruba na e top, y cu ainda ta scor relativamente bon. Sinembargo encuestanan ta mustra un caida pa loke e bishitante ta score den e balor cu nan ta ricibi pa nan placa. Nan ta paga mas pa nan vacacion pero ta sinti cu nan no ta haya pa loke nan a paga p’e. Esaki ta algo cu sigur mester ta consciente di dje y traha riba dje como tambe sigui monitorea for di serca. E no ta un tendencia alarmante, pero si algo cu A.T.A. a tuma nota di dje como un punto cu consistentemente ta bin dilanti como un punto di atencion.

Nos isla ta score halto pa cu e hospitalidad di e personal trahando den e diferente acomodacionnan cu nos ta ofrece. Pa loke ta trata nos gastronomia, por mira cu –atrobe- Aruba ta score halto compara cu otro islanan den region. E bishitante ta score Aruba halto pa e calidad, e diversificacion y e cordialidad di nos hendenan. Aruba ta score hopi halto pa loke ta trata e limpiesa di nos isla, den centro pero tambe pafo di nos centro Oranjestad. Nos destinacion semper a score halto y ta sigui score halto pa nos playanan bunita. E bishitantenan ta encanta nos beachnan cu su awa cristalino pero tambe cu nos playanan ta sigur y cu bon actividadnan di awa (watersports). Turistanan ta sinti nan mes sigur na Aruba- compara cu otro destinacionnan, nos ta score hopi halto den esaki.

Nos mester sigui pone e accento riba e calidad di e vacacion cu e bishitante ta ricibi, cu enfoke riba eleva e sentimento di ricibi e balor pa locual ta paga.