Archive for the ‘Aruba News’ Category

A transforma edificio na Wayaca den un Centro di Control di Cacho

Posted: July 2, 2020 in @johnnyhabibe, Aruba News, Johnny Habibe
0

MARISOL TROMP

ORANJESTAD – Den cuadro di e Plan Nacional pa atende cu e problema di cacho riba caya, Diaranson mainta a tuma luga e inauguracion di Centro di Control di Cacho (CCC) na Wayaca. Unda antes tabata conoci como e sitio unda cu tabata hiba mascotanan no desea pa ponenan ‘drumi’.

Minister Marisol Lopez – Tromp a splica cu Ministerio di Desaroyo Teritorial, Infrastructura y Medio Ambiente, desde 2019 ta forma parti di e comision encarga pa duna conseho y diseña un plan pa atende cu e problema menciona.

Ademas, e problematica di cacho ta amplio door cu mester atende cu e “kill cage” y cu e ley di cacho, cual ta rekeri un acercamento multi-disciplinario. Tras di e prome paso aki, tin cuater Ministerio envolvi.

A base di diferente reunion cu a tuma luga, a institui un comision di accion pa ehecuta e plan cu a diseña. Pa cual entre otro a tuma e decision pa renoba e edificio na Wayaca. E trabounan a inicia na februari 2020 pa cual DOW a keda encarga pa renoba y adapta esaki y Serlimar a percura pa e trabou di limpiesa na e sitio y den e area.

Banda di esaki, comunidad por spera cu City Inspector tambe tin personal disponibel pa sigui asisti cu e trabou di control manera cu a bin ta haci. Lo continua cu e control aki unda cu ta necesario conhuntamente cu ‘dog catcher’ di acuerdo cu e Plan Nacional.

Pa conclui, Minister Lopez -Tromp a enfatisa cu pa atende cu e problema di cacho riba caya e ta rekeri esfuerso no solamente di Gobierno, pero tambe hopi trabou y conscientisacion di cada ciudadano. E cambio aki ta cuminsa na cas, na e forma con nos ta cuida cu nos mascotanan y percura cu nan trato ta mane debe ser.

Photo_BENTA 94

Ken nos ta Cuanto nos ta Con nos ta biba Na unda nos ta biba

Posted: July 2, 2020 in @johnnyhabibe, Aruba News, Johnny Habibe
0

C B S

Oranjestad – Pa medio di e comunicado di prensa aki, Oficina Central di Estadistica kier a informa y alabez invita e pueblo di Aruba pa e exposicion “E historia di Censo 1960-2020”. E expo aki ta conta e historia di Censo. E Censo ta duna nos e historia di e poblacion di Aruba y con esaki a desarroya den transcurso di decadanan.

Manera ta conoci cada 10 aña un Conteo General di Poblacion y Vivienda ta wordo haci, mihor conoci como Censo. Un Censo tin como proposito principal pa haya contesta riba cuater pregunta cardinal:

Den e expo e desaroyonan cu a tuma lugar den e poblacion di Aruba for di aña 1960 te cu 2010 ta wordo ilustra cu datonan di e Censonan cu a tuma lugar cada pasa 10 aña. E expo a wordo parti abase di e 4 preguntanan cardinal cu a wordo menciona ariba. Cada pregunta a wordo parti alabes den diferente temanan cu ta wordo presenta, entre otro, e grandura di e poblacion di Aruba, pais di nacemento, nacionalidad, educación y empleo, pa menciona algun.

Tambe un parti di e expo ta wordo dedica na e Metanan di Desaroyo Sostenibel (SDG’s). Den e parti aki ta duna un corto introduccion di e 17 metanan y ta ilustra algun dato relata na e metanan aki.

Tambe lo tin diferente video documentario cu CBS a traha cu ta ilustra cambionan a tuma lugar durante e ultimo decadanan y algun projeccionnan di e poblacion di Aruba.

Archivo Nacional Aruba tambe ta forma parti di e expo y a keda encarga cu ilustra con den pasado, otro tipo di “conteonan” di poblacion tabata wordo haci. Esakinan ta ilustra den forma di material y potretnan di antes.

Archivo Nacional tambe ta expone informacion tocante scalivitud na Aruba pa cual awe 1 di juli ta conmemora 157 aña di e fin di sclavitud na Aruba.

E participación di ANA na e exposicion tabata posibel door di e cofinanciamento cu nan a ricibi di Fundacion Amigonan di Archivo y di UNOCA. Un danki ta bay na e instancianan aki pa nan contribucion valioso.

CBS kier a duna un danki tambe na Archivo Nacional Aruba pa e uso di nan edificio pa e exposicion di e historia di Censo.

E expo lo ta accesibel pa publico entrante awe diahuebs 2 di juli te cu fin di aña 2020. E expo ta tuma lugar na e edificio di Archivo Nacional Aruba (Sabana Blanco 60) durante oranan di oficina: 8:00-12:00 pm y 1:30-4:00 pm.  E exposicion aki ta completamente gratis.

E exposicion tambe lo ta habri pa publico diasabra awo dia 4 di juli 2020 for di 10 or di mainta te cu 2 or di merdia. Henter pueblo di Aruba ta bon bini.

Photo_BENTA 94

Prome Minister Evelyn Wever-Croes: Reflexion: NOS LO RECONSTRUI NOS PAIS BEK CU CURASHI Y TRECE E PROGRESO Y BIENESTAR CU NOS MESTER PA ARUBA

Posted: July 2, 2020 in @johnnyhabibe, Aruba News, Johnny Habibe
0

EVELYN WEVER-CROES

Oranjestad – Prome Minister Evelyn Wever-Croes, den Conferencia di Prensa di diaranson anochi pa trece informacion di maneho di Gobierno pa cu desaroyonan di Covid-19, a duna un reflexion riba e importancia pa tin curashi den momentonan dificil, mescos cu e generacionnan prome cu nos cu a logra hopi pasobra nan no tawata tin miedo. Nan tawatin curashi y a logra cu trabou duro y awe nos por mira atras riba nan logronan. Nan ta nos inspiracion pa sigui y logra.

“Nos a cuminsa un etapa nobo, un etapa hopi importante pa nos tur na Aruba. E etapa aki ta cuminsa cu un poco nerviosismo y duda. Nos ta scucha duda cu si di berdad nos mester habri nos fronteranan, of si nos mester habri frontera cu Merca. Gobierno di Aruba ta monitoriando y evaluando e situacion y nos lo tuma decisionnan den bienestar di cada ciudadano di pais Aruba. 

Tambe tin duda si por viaha of den e temporada di vakantie cu ta den porta. Ta posibel pa viaha pero e ta keda algo hopi riesgoso. Mester corda cu si un persona bira malo den exterior y mester bay den cuarentena of isolacion, e lo cay riba propio gasto y lo mester keda mas largo den exterior. Tambe tin e risico cu tur pais por dal frontera cera pa motibo cu e casonan a escala. No lubida tambe cu ora di regresa Aruba, mester haci e test di Covid y bay un par di dia den cuarentena. 

Viahamento no ta facil e temporada aki y ta trece nerviosismo. Tin hende ta pro otro ta contra. Tur hende tin nan opinion y nunca bo por complace tur hende. Pero mi kier garantisa pueblo di Aruba cu nos ta scucha boso opinionnan y preocupacionnan y nos ta tene cuenta cu tur aspecto den interes di e ciudadano y pais Aruba. 

Tin biaha bo mester evalua kico ta mas importante y cu abo ta duna mas prioridad pero alfinal nos ta tuma nos decisionnan riba conseho di nos expertonan dunando prioridad na bo interes. 

Tur hende por tin nan preocupacion y duda pero nunca mester tin miedo. Laga nos pensa un rato riba e generacionnan prome cu nos cu a logra hopi pasobra nan no tawata tin miedo. Nan a mustra curashi. Si nos corda esnan cu tawata traha den mina di fosfaat/mina di oro, nan tawata tin nan preocupacion pero nan no tawata tin miedo. Nan a lora manga y bay traha cu curashi. Nos a conoce plantacion di aloe cu tampoco tawata facil. E refineria y e lucha pa nos autonomia. Si nos wak atras, tur a logra y nan a logr’e cu curashi y cu trabou duro. 

Laga nos wordo inspira door di nan den e etapa nobo aki na unda nos ta bay reconstrui nos economia bek, crea cupo di empleo y yuda esnan cu a perde nan empleo y entrada pa haña nan empleo bek y trece e progreso y bienestar cu nos mester pa Aruba”.

Photo_BENTA 94

Glenbert Croes: Gobierno ta extende FASE cu 3 luna mas

Posted: June 21, 2020 in @johnnyhabibe, Aruba News
0

GLENBERT1

Oranjestad – 13 di maart Aruba a wordo confronta cu su prome caso di COVID19. Desde e dia ey e pesadiya a cuminsa. Un pa un nos tur tabata testigo con e negoshinan, restaurantnan y hotelnan na Aruba a paga nan luznan. Tur mester a dal porta cera cu e consecuencia cu alrededor di 37 mil hende a perde di un dia pa otro nan entrada mensual.

19 di maart sin ria, Minister Glenbert Croes a anuncia Fondo di Asistencia Social di Emergencia – FASE. Sin sa con, sin sa di unda, pero un cos pa e mandatario tabata sigur: mester sali na ayudo y vanguardia di nos hendenan cu a perde entrada sin expectativa di recuperacion.

20 di maart http://www.fasehelpdesk.com a bay den operacion. Y desde e dia ey continuamente a bin ta evalua, reevalua, adapta, suavisa pa por acomoda lo mas hopi hende cu ta posibel cu e ayudo y asistencia di FASE.

20 di maart mes Minister Glenbert Croes a anuncia cu ta crea un proceso adapta y mas lihe pa tur hendenan di nacionalidad hulandes cu no ta bin na remarca pa FASE, por aplica pa Bijstand.

E prome aplicacionnan pa FASE a cuminsa drenta dia 20 di maart mes, di cual mayoria na principio tabata incompleto. Mirando cu ta den practica tabata acumulando experiencia con miho atende cu esaki, e mandatario ta reconoce cu den e proceso algun cos a bay robes causando tardansa enorme. Pero ta subraya tambe cu ta pa prome biaha den existencia di nos Pais cu Aruba ta pasa den un crisis di magnitud aki unda cu sigur 90% di nos poblacion trahado ta perde trabou y/of entrada. FASE no a bin cu un manual di instruccion. Y na caminda nos a bin ta prescribi e proceso.

“Nos a siña di locual a bay robes na comienso y ta drechando esaki den un proceso cu ta dinamico y adaptabel na condicionnan nobo tur dia”, e mandatario a expresa.

19 di juni despues cu Minister Glenbert Croes a anuncia cu 10 mil hende a haya e ayudo di FASE un of dos biaha, el anuncia cu Gobierno di Aruba ta extende FASE cu 3 luna mas.

Photo_BENTA 94

Prome Minister Evelyn Wever-Croes: Reflexion: E AGENDA DI ARUBA TA E RECUPERACION ECONOMICO DI NOS PAIS

Posted: June 21, 2020 in @johnnyhabibe, Aruba News
Tags: , ,
0

EVELYN 1 2020

Oranjestad – Den conferencia di prensa di Gobierno di Aruba diabierna anochi, Prome Minister Evelyn Wever-Croes a enfatisa cu Aruba ta bon prepara pa cuminsa cu e recuperacion economico di nos pais cu e sosten di confiansa y positivismo di cada ciudadano. Aruba ya caba desde comienso di e crisis aki a demostra cu nos por pasobra nos tawata bon prepara. Awor nos ta miho prepara pa drenta e siguiente fase pa habri nos frontera.

“Nos a cera un siman cu tawata bastante turbulento. Tawata tin disturbio, protesta y esaki ta comprendibel pasobra e crisis aki a dal nos y henter mundo sin sa kico su enbergadura tawata. Y ainda nos no sa su enbergadura. Bo ta mira rond mundo tin descontento, manifestacion di preocupacion y algun hende hasta di ansha.

Mi ta kere mester trece trankilidad na Aruba. Nos ta drentando un etapa importante y grandi pa Aruba. Un etapa cu nos ta habriendo nos fronteranan bek. Nos mester a corta e ader di nos economia ora e crisis a dal y poco poco nos ta cuminsando cu e operacion hopi dificil, delicado y complica di habri e ader principal aki bek y conecte na e curason cu ta Aruba. Nos mester den e temporada aki hopi trankilidad y pa cada ciudadano di nos pais ta positivo. Contribui cu positivismo den e espacio cu nos tin aworaki pa yama nos bishitantenan bon bini.

Nos sa cu e chens cu e virus aki por bin bek ta hopi grandi unabes nos habri nos frontera. Nos no mester ansha ni bay den panico. Nos tawata bon prepara pa e prome parti di e tempestad y awor cu nos ta den e wowo di horcan nos ta preparando miho ainda pa si e di dos parti mester bin e no bin cu asina hopi decision critico manera nos a tuma e prome biaha. Nos mester trankilidad y no laga niun hende bruha e agenda. Ta un agenda tin y esey ta e agenda di Aruba, recuperacion economico di nos pais y pa cu esey nos ta conta riba sosten di cada ciudadano.

Un biaha mas mi ta comprende e preocupacion pero nos mester tin e fe y confiansa. Nos a demostra caba cu nos por. Nos tawata prepara y awor nos ta miho prepara y cu bo sosten y cu positivismo y e confiansa cu bo tambe ta sinti, nos ta bay drenta e siguiente fase aki”.

Photo_BENTA 94

Computer nobo pa publico SETAR cu donacion pa Biblioteca Nacional Aruba

Posted: June 4, 2020 in @johnnyhabibe, Aruba News
0

SETAR 2

Nos compania nacional di Telecomunicacion, SETAR, a haci un donacion di 30 computer nobo na biblioteca diaranson mainta. Entrega oficial a bay den presencia di SETAR su representante sra. Kimberly Boekhoudt y directora di Biblioteca Nacional Aruba, sra. Astrid Britten.

SETAR como un partner importante pa Biblioteca Nacional Aruba, semper a traha hunto cu biblioteca pa modernisa y mehora servicio na comunidad. SETAR, entre otro, a yuda realisa e Centro di Informacion Digital como tambe ta sponsor Wi-Fi gratis na e edificionan di biblioteca y conexion di Internet.

Como parti di e partnership aki, SETAR ta haci un donacion di 30 computer nobo pa e usuario di biblioteca por uza pa busca informacion, adkiri conocemento y tene contacto cu famia, amigo y relacionnan di trabou. Muchanan di scol ta haci hopi uzo di computer na biblioteca pa traha riba tarea di scol y busca informacion. Otronan ta haci investigacion riba diferente topico of ta lesa corant y revista riba computer y ta busca informacion riba Internet. Tin ta sigui curso online pa por siña algo nobo y diferente.

Acceso na computer y Internet ta hopi importante den comunidad di awe y Biblioteca Nacional Aruba ta ofrece tur dos na esnan cu no tin acceso. E computernan ta wordo instala den diferente espacionan di biblioteca su edificionan na Playa, San Nicolas y e Departamento Arubiana, p’asina brinda comunidad di Aruba lo ultimo den tecnologia.

Miembro di Comision Europeo ta confirma e aporte financiero di Union Europeo (EU) pa Aruba relaciona cu e crisis di COVID-19

Posted: June 4, 2020 in Aruba News
0

Samira Rafaela y Eddy Paris

Oranjestad – E siman aki Gobierno di Aruba a ricibi un carta (copia adhunto) di Sra. Jutta Urpilainen –  Miembro di Comision Europeo directamente encarga cu e relacionnan entre EU y e 25 paisnan miembro di OCTA- Association of Overseas Countries and Territories of the European Union.

Dia 24 di april 2020 Gobierno di Aruba a dirigi un carta pa Commissioner Urpilainen caminda cu Promer Minister di Aruba ta enfatisa e impacto severo di e COVID-19 crisis riba e economia di Aruba y e pasonan urgente cu Gobierno a tuma pa mitiga e efectonan di e crisis.  Tambe Premier Wever-Croes a elabora riba e pasonan pro-activo pa baha gastonan operacional di  Gobierno di Aruba pa por apela tambe na Hulanda como e “member state” corespondiente di EU pa aporte financiero.

E carta di Comision Europeo ta confirma cu enbista di e emergencia relaciona cu e COVID-19 crisis EU a adopta “exceptional flexibility rules” pa asina Aruba por yega na aporte financiero di un manera lihe, adapta y practico.

Por ultimo Premier Wever-Croes a expresa e aporte di parti di Aruba pa cu e resolucion di Parlamentario Europeo, Srta. Samira Rafaela, kende a apela na EU pa crea un “dedicated exceptional support fund” pa e paisnan miembro di OCTA. Pa esaki Comision Europeo ta evaluando e posibilidadnan segun e structura financiero di EU.

Den corto, den margen di e structura financiero vigente cu ta termina fin di aña 2020 Aruba lo ricibi apoyo financiero for di diferente programanan existente, inluyendo parti di e suma di € 10 miyon cu lo wordo reparti entre diferente paisnan miembro di OCTA. 

Sr. Eddy Paris como representante di Aruba na EU y Vice-Voorzitter di OCTA ta coordinando e esfuersonan aki na Brussels y cu DEACI (Department of Economic Affairs, Commerce and Industry) na Aruba pa asina e fondonan aki por yega directamente na diferente NGOs na Aruba.

Anuncia riba Hit 94 FM

 Oferta special  2 spot tur dia – Afl 350,- pa luna

Sintonia total  bo benta automaticamente ta crece y sigi crece.

ARUBA MESTER SIGUI ELEVA CALIDAD DI EXPERIENCIA Y PONE ATENCION NA “VALUE FOR MONEY”

Posted: August 11, 2019 in Aruba News
0

CACTUS

Oranjestad – Esaki ta locual A.T.A. a presenta como un mensahe clave siman pasa. Cu mester sigui pone atencion na “value for money”, no kiermen cu Aruba ta mucho caro den bista di e bishitante, ni cu esaki ta un punto di preocupacion alarmante. Esaki no obstante cu ta reconoce cu e por ta parti di dialogo di bishitantenan y cu semper lo tin un grupo di bishitante cu lo regarda Aruba como mucho caro. Aruba su costo total, historicamente, semper tabata uno mas eleva compara cu otro destinacionnan. Aruba a sa di desaroya exitosamente, manteniendo e posicion aki y asina presentando cu mes como un destinacion cu ta bal e prijs eleva, y pues cu ta brinda e calidad di un vacacion cu ta bale la pena y cu ta bal e costo.

A base di investigacionnan cu A.T.A. a laga conduci na varios ocacion; ora compara otro destinacionnan cu ta considera competidonan den Caribe, Aruba no ta e destinacion mas caro. Nos ta cay ‘memey’ den e pool di 5 a 6 destinacion. Pero si, Aruba semper tabata parti di e pool di destinacionan mas costoso den e region.

Mester sigui eleva e calidad di experiencia, manera a bin ta hacie, y sigui pone atencion na brinda “value for money”. Hecho ta cu, esun cu bishita nos isla ta wordo pidi pa paga mas contrario cu otro opcion cu e por scoge pe. Y ofertanan di otro destinacion cu e bishitante por scoge for di dje ta hopi; den Caribe mes e competencia ta fuerte. Tin hopi destinacionnan cu entre otro hotelnan nobo cu ta wordo ofreci pa prijsnan abou pa asina yena cuponan di camber cu mester wordo yena.

Hecho ta cu Aruba a sa di sigui atrae e bishitante cu ta dispuesto pa paga e prijs eleva, un prijs cu a sigui subi e ultimo añanan. E aumenta aki ta consecuencia di entre otro e demanda fuerte cu tin pa Aruba como destinacion. Pues e bishitante di e perfil desea a sigui bishita Aruba y a sigui scoge pa Aruba, no obstante otro opcionnan. Esaki ta refleha den entre otro e siguiente crecementonan ‘averahe pa aña’ durante e periodo di 2011-2018: +3.7% “stay-over visitor arrivals”, +5% “cruise visitor arrivals”, +5.1% “tourism credit” (registra pa Banco Central di Aruba), +7.2% “revenue per available room” (RevPar) (registra pa AHATA).

Otro hecho ta cu e grado di satisfaccion cu A.T.A. ta midi bou di bishitantenan ta halto, incluso ora compara cu otro destinacionnan. Nos isla ta score halto pa cu entre otro, e experiencia cu ta ricibi na acomodacionnan, pa cu e hospitalidad di e personal trahando den e diferente acomodacionnan cu nos ta ofrece, pa cu nos gastronomia, e cordialidad di nos hendenan, e limpiesa di nos isla, nos playanan, y e bishitante ta sinti su mes sigur na Aruba- compara cu otro destinacionnan.

A.T.A. ta para pa sigui eleva calidad di e producto y servicio y pa sigui pone mas atencion na “value for money”. Considerando cu e vision di turismo ta pa crece den “value” mas cu crece den “volume”, den linea cu locual A.T.A. ta yama e modelo di crecemento turistico “High Value, Low Impact”, tambe considerando competencia fuerte y ofertanan competitivo eyfo y cu e consumidor ta mas exigente – principalmente ora e ta wordo pidi pa paga mas –, y considerando cu turismo lo keda e ingreso principal pa pais Aruba, e deseo lo ta pa turismo sigui trece mas economicamente. Asina e ta esencial pa sigui traha riba e “value” cu nos ta ofrece e turista pa locual nos ta pidi’e pa paga, y pa eleva esaki.

Esaki lo sigui yuda pa mantene e posicion di Aruba como un isla cu ta bal e prijs eleva. Tambe esaki lo yuda na incrementa locual cada bishitante ta laga atras; si e consumidor ta haña locual e ta spera y locual ta interese (por ehempel tipo di actividad / cuminda / producto etc.), asina e chens ta mas grandi cu e lo opta pa gasta mas y laga mas atras den nos economia.

Por ultimo mester corda cu eleva e experiencia kiermen tambe pone mas atencion pa nos medio ambiente y naturalesa, pero tambe mas control unda ta necesario.

Pues cu mester sigui pone atencion na “value for money”: no kiermen cu Aruba ta caro, of cu Aruba a bira caro pero cu mester sigui monitorea y eleva e bon calidad cu nos ta brinda nos bishitantenan.

Si bo tin deseo di anuncia den nos edicion manda un email na hit94fm@gmail.com

Reconstruccion trayecto Sabana Grandi pa Macuarima

Posted: March 18, 2015 in Aruba News
0

ARUBA BANDERA

ORANJESTAD – Departamento di Obra Publico ta informa pueblo di Aruba en general y specialmente nos automobilistanan, cu Dialuna 23 di Maart proximo lo cuminsa cu trabounan di reconstruccion di trayecto Sabana Grandi pa Macuarima entre Sabana Grandi 29 y Papilon 15.

E caminda lo ta cera di 8’or di mainta te cu 6’or di atardi. Rutanan alternativo lo ta indica cu baricadanan, verkeershekken, tekstwagen y borchinan di aviso. E trabounan tin un duracion di 5 dia.

Ta pidi tur automobilista, negoshinan y otro usuarionan pa tene cuenta cu e inconveniencia nan cu lo por surgi pa cual nos ta pidi nos disculpa.

JOHNNYHABIBE

Plaza Padu lo duna honor na icononan di nos cultura

Posted: January 16, 2015 in Aruba News
0
PADU
Oranjestad-Diahuebs atardi Prome Minister Mike Eman  hunto cu Minister di Cultura Otmar Oduber tabatin e honor pa duna inicio na e construccion di Plaza Padu.

Minister Oduber a splica con un par di dia pasa e tabata para na e terenonan di APA, caminda a papia di consistencia di papia algo y percura y sigui cu loke pone padilanti.
‘Nos a para un par di aña pasa na e mesun plein aki pa presenta loke ta bay tuma lugar y awe nos ta para cu e mes un consistencia ey pa e parti final cu mester wordo ehecuta’,e mandatario a bisa.
Ora para cu e bista desde cocolishi y mira riba e lugar unda lo bay ubica y honra nos artistanan, icononan di nos historia, cu a significa asina hopi pa nos antepasadonan, por ta sigur cu esaki no por a scohe un mihor lugar.
Mas cu tur e sentido di ta Arubiano orguyoso di esnan cu a traha y a percura cu awe nos tin un himno, minister Oduber a bisa.
E mandatario a indica cu si mira rond caminda construccionnan ta tumando lugar ; un zoutmanstraat gebouw cu ta practicamente cla y lo wordo entrega prome di maart. Banda di dje diaranson mainta a haci e acto oficial di traspaso di e ARA gebouw cu tambe ta un edificio monumental cu e aña aki lo conoce un renovacion completo.
Banda di dje nos ta haya Stadhuis cu un tempo tabata un ruina y bou di e signatura di partido AVP a percura pa e Stadhuis por ta den su mihor forma awe.
Fortzoutman tambe ya caba a haya e aprobacion pa e inversionnan cu mester tuma lugar pa cu e mantention di e landmark historico aki.
Un edificio cu practicamente tabata cla pa wordo bendi, nos a percura pa ubica nos mes den dje per nos ta testigo tambe cu fondonan di pueblo percura pa tin un edificio di cocolishi cu ta complimenta loke lo bira Plaza Padu, cu lo carga e aspecto total di loke ta cultura cu nos ta asina orguyoso di dje, Minister Otmar Oduber a finaliza bisando.
TOP40 RADIO
Older Entries