Johnnyhabibe-Anchorman

Oranjestad-Awe 14 di juli ta un fecha riba cual nos ta recorda e di 16 aña di fayecimento di un gran politico/gobernante y dama ehemplar den nos comunidad, esta sra. Grace Heronimo-Bareño. Grace a nace na Aruba dia 22 di maart 1945. Na un edad hoben caba Grace a tuma e decision pa drenta arena politico y tabata na e eleccion di Eilandsraad di 1975 cu Grace Bareño – como e promer dama cu a yega di aparece riba lista di nos partido – den su promer salida a obtene 455 voto, cual ta un cantidad considerabel e tempo ey. Te cu e eleccion di 1989 Grace fielmente a aparece riba lista di MEP.

Grace tabata tambe e promer dama na Aruba cu a asumi e encargo di diputado di Teritorio Insular di Aruba. Durante di su trayectorio como gobernante Grace a dedica gran parti di su trabao den e area social y a percura specialmente pa esnan cu limitacion den comunidad ya cu den pasado como profesional su persona semper a traha incansablemente pa e grupo special aki, e.o. na Bibito Pin school na Piedra Plat. Grace tabata tambe miembro di Eilandsraad. Como politico activo Grace a lucha schouder cu schouder cu nos Libertador Betico Croes y tabata danki tambe na su perserverancia y contribucion valioso awe Aruba ta un pais liber den Reino Hulandes.

Como muestra di aprecio y reconocimento, MEP a duna e hala femenino di partido e nomber di Forza Femenino Grace. Su lealtad incondicional na su partido MEP y su stimacion pa Aruba lo keda semper wordo recorda.

Oranjestad-Parlamento ta tratando e presupuesto di pais Aruba pa 2015, y no ta mustra cu Gobierno ta serio den su maneho financiero. Gobierno tin cantidad di gasto di luho den e presupuesto, y hopi post masha irealistico.

Pero di otro banda nan ta laga si e gastonan di 9 minister. Si nan baha di 9 pa 7 minister ta scapa pueblo 17 miyon florin pa anja! Pero aparentemente Gobierno kier mantene e 17 miyon ey pa nan por sigi gosa y fiesta, y ta scohe pa klap pueblo un medida di aumento di BBO te na 3.5%, mas cu tempo di MEP mes.

MEP ta cla cu e presupuesto aki. E ta un farsa completo. Ministernan en bes di atende cu e crisis financiero, a papia cantidad di cos bunita, y a insulta miembronan di Parlamento. Pero ningun a atende cu e problema real di nos pais ni con nos ta bai solucione: e MEGA DEBE.

Ta momento pa yega na votacion y mira kiko ta bai pasa cu e presupuesto 2015, cu e CFT, y cu e posicion di Hulanda den tur esaki.

Un y tur ta wordo invita pa sigi e reunion aki desde 11or di mainta via Canal 46, radio 107.5 FM of http://www.parlamento.aw

ORANJESTAD – Minister Otmar Oduber den Parlamento siman pasa a causa cu henter e reunion a Sali for di man. Ningun otro minister ta comporta su mes asina malo, ta Otmar Oduber so. Otmar Oduber a bai asina leew te cu el’a coba mama di Dangui Oduber, algo totalmente inaceptable.

‘Pero no ta solamente su comportacion ta laga di desea, sino e ta papia hopi mentira tambe. Lagami desenmascara 5 di su mentiranan:

MEP a busca CFT: Laga nos no lubida cu CFT a bin pa dos motibo. Prome ta pasobra Mike Eman y su gabinete a redobla e debe di nos pais, y di dos, pa e tantísimo escandalonan den e ministernan di AVP. Ademas, mi a puntra e minister, ken a firma tur e protocolnan desde 2011, 2013, cartanan di ‘geen bezwaar’ y e protocol di 2 di mei? Mike Eman mes a firma nan despues cu el’a biaha bai Hulanda mas di 100 biaha. MEP no tabata participe na nada di esey, pues ta un mentira grandi cu ta MEP a busca CFT

Lider di MEP a bisa cu Turismo ta bai bon: Locual cu ami a expresa ta mi preocupacion cu tursimo, e único pilar di nos economía, por ‘burn out’. Ademas, mi a comparti e preocupación di IMF cu Aruba ta demsiado dependiente di tursimo. Danki Dios nos tin turismo ainda, pero esey no ta danki na e minister aki, pasobra e minister no tin ningún visión. Tur loke e ministe rta hasi ta ad hoc. Pues otro mentira mas di e minister.

Lider di MEP a hasi transaccionnan dudoso di miles di florin: Mi a mustra e minister cu e mesun fecha cu un hues imparcial a dicta cu por yama Otmar Oduber pa CORUPTO, riba e mesun dia ey e hues imparcial a dicta cu e transaccionnan ey NO ta dudoso. Si nan NO ta dudoso, nan no ta dudoso pa ningun di esnan cu a of por a ehecuta nan. Ta hopi ironico cu e mesun dia cu nos integridad a wordo confirma, e integridad di minister Oduber a wordo kibra pa un hues imparcial. Pues ta momento pa e minister stop di ganja.

Deficit y MEGA DEBE a wordo causa pa inversion den nos pais: otro mentira. Según rapportnan di Banco Central y di CFT ta apenas 1% di tur e gastonan di gobierno a bai den inversión. Unda e demás 99% a bai? Tur loke bo ta mira eyfo, ta apenas 1% di e total. Ken a bai cu e 99%? Den man di cual amigo of sponsor di campanja e 99% a bai?

CFT lo stop na anja 2018: un mentira flagrante! Ningun, pero ningún caminda den e protocol firma bo ta mira 2018 skibi mes. Mustrami unda e ta skibi, ningún caminda.

ATAKE PERSONAL Y BAHO

Minister Otmar Oduber naturalmente no por a keda sin ofende mi famia, un cantaleta cu sinceramente a cansa hende caba. E tin 5 anja t ayora e mesun cos, pero puntra bo mes dicon te dia di awe e no a bai Ministerio Publico pa denuncia cualquier cos iregular. Ta pasobra NO tin nada iregular. Na fin di e reunion mi mester a pidi presidente di Parlamento pa schors e reunion pa asina mi mes hiba Otmar Oduber pa bai entrega keho na Ministerio Publico, si acaso e tin prueba. Y si en caso e no tin prueba. E mester guli su palabranan. Y na final e minister mester a admiti cu e no tin ningún prueba y mester a guli su palabranan bek.

Minister Otmar Oduber a demostra un nivel di vulgaridad enorme den Parlamento, un berguensa real pa tur, especialmente nos hobennan.

Oranjestad-Den Haag – Un delegacion di Gabinete di Minister Plenipotenciario, encabesa pa un grupo grandi di studiantenan Arubiano, a pone un krans na e monumentale na Waalsdorpervlakte ariba “Dodenherdenking” dialuna 4 di mei 2015. Tambe tabata presente personal di Gabinete di Aruba y studiementor di Tilburg Swinda Venhortst-Thijsen y e mentor di Utrecht Eddy Geerman.

Prome cu esaki a tuma lugar tabata tin un encuentro na Gabinete di Aruba na unda directora Shandra John a yama e publico bon bini y a bisa di ta contente cu asina hopi studiante presente na e programa aki. Sra. John a bisa cu e conmemoracion arina “Dodenherdenking” na Waalsdorpervlakte ta un lugar y un monumento cu un significacion especial, pasobra e monumento ta na e sitio unda durante di Segunda Guera Mundial hopi persona cu tabata forma parti di di e resistencia a wordo fusila. Entre man e horen Arubiano Boy Ecury cu huntomcuhunto otro miembronan a haya su morto pa medio di un peloton di balalaika 6 di november 1944. ‘Ta importante pa pa tene na bisa e memoria y e storia di bisa di Boy Ecury’.

Tambe sra. John a papia den su discurso ariba un parti di historia cu ta den olvido. ‘Esaki ta e parti importante cu Aruba a hunga den Segundo Guera Mundial. E refineria na San Nicolas tabata un distribidor importante pa comustible pa e trupanan di e forzanan aliado cu tabata bringa contra di Alemania. Tabata tin mail militair Americano na Aruba pa defende e refineria contra di atakenan cu submarino Aleman. Ariba 16 di februari 1941 un diez tanker a keda destrui. Tur horen entre 18 y 20 anja mester a drenta servicio militar pa defende e isla.’

‘Mi ta spera cu e programa di awe lo inspirara e generacion hoben tanto na Aruba Como na Hulanda, pa sinja mas di Boy Ecury y cuminsa na prensa kick Reino ta nifica pa nos tur. Pesey ta importante pa nos concentratie mas ariba loke ta uni nos y no loke ta dividi nos. Pa Boy Ecury esaki tabata di mes; e tabata un “koninkrijksburger” y te ainda e ta esaki,’ asina Shandra John, directora di Gaaninete di Aruba a bisa.

Despues Gisele Ecury, sobrina di Boy Ecury e tene un charla hopi impresionante, den cual ela referi na Segunda Guera Mundial y su nificacion ariba nos bida di awe. Naturalmente ela papia di Boy Ecury, pero a bisa cu tambe tabate tin hopi hende cu a lucha pa awe nos por ta disfruta di nos libertad; y hopi di nan a paga esaki cu nan bida. Gisele a bisa cu nos nunca mester lubida kico a pasa den e Segunda Guera Mundial.

ORANJESTAD – Despues di e prome dia di tratamento di presupuesto, lider di oposicion a expresa su desapunto. “AVP ta mes infantil cu semper, tira cu lodo y hasi redashi, en bes di atende cu finansas di nos pais na forma serio y responsabel. Ta obvio cu nan ta totalmente perdi, y cu nan no tin ningun intencion di atende cu e problema real: e bancarota financiero di nos pais y e supervision cu Hulanda kier impone”, Evelyn Wever-Croes a duna di conose.

Tratando e presupuesto di husticia e Lider di MEP a indica cu e situacion financiero di nos pais ta sumamente delicado, cu e Mega Debe di nos pais ta causando pobresa, desempleo, famianan libra, y esaki ta e rais di e problema. Un problema cu el’a compara cu un mata di inseguridad. “E rais ta e Mega Debe, y e ta creando criminalidad, ladronicia, hortamento di auto, violencia, asesinato. Y esaki ta sin conta e lista di 24 medida cu Gabinete Mike Eman a priminti Hulanda cu e ta bin cune. Nos ta hopi preocupa y pesey nos a verwacht cu e Minister di Husticia lo a pone mas atencion na combati criminalidad. Pero e minister tabata masha arogante y a mustra cu cosnan por keda status quo, no tin nodo di cambia nada. Es mas, ela corta mas di 6 miyon florin den e departamentonan encarga cu seguridad di nos pais, Cuerpo Policial, KIA, etc. Pero no por bisa kiko e ta bai hasi pa hasi Aruba mas sigur.

Actitud infantil

Mester remarca cu en bes di atende cu e temanan na forma serio, AVP a cai den su wega di manipulacion y tiramento cu lodo. Minister Dowers en bes di mustra seriedad, a haya necesario pa acusa MEP y su lider di ta esunnan cu a bai Hulanda pidi CFT. Algo cu ta pa cuminsa totalmente incorecto, pero mas alew ta ponebo pensa si di berdad e minister no tin nada otro di papia di dje.

Lider di e fraccion di AVP Baba Herde no a keda atras y kier a cuestiona e casa di lider di MEP tirando asina cu lodo, manera AVP ta bon conosi pe.

Por a nota cu e lider di MEP a contesta Herde bek na forma hopi skerpi: Berdad bo kier papia di mi casa, mientras e pais ta na borde di bancarota? Un bancarot di cual abo sr. Herde tambe ta responsabel? Si bo kier papia di mi casa, ban papia di mi casa. Pero bo kier pa nos papia tambe di bo casa y su envolivimento den e proyecto miyonario di Urirama? Bo kier pa nos papia di bo yiu cu ta traha na Ministerio Publico? Bo kier pa nos papia di bo ruman cu ta coordinador di minister? Nos no ta gasta nos energia riba cosnan infantil asina, nos ta dedica tur nos energia na e crisis financiero di nos pais, y con nos por alivia nos pueblo. Lamentablemente AVP no a mustra seriedad cu nos a spera cu nan lo mustra, nan no a mustra mes cu nan lo kier cambia rumbo di e pais aki”, Lider di MEP a contesta.

OranjestadDurante reunion cu Minister Otmar Oduber tabatin diabierna mainta cu United Airlines na Merca, e noticia positivo a bin dilanti cu nan lo aumenta nan frecuencia di vuelonan di uno pa cinco pa siman durante e zomer aki for -di Houston.

Minister Oduber a indica cu mientras cu den Caribe ta premirando un crecemento di aproximadamente 3% den cantidad di stulnan, na Aruba nos a logra supera e porcentahe aki cu dobel digito, yegando na un aumento di 14% durante e zomer aki.

Papiando di United Airlines, e mandatario a indica cu 3 aña pasa no tabata conta cu e vuelonan aki. Na 2013-2014 a cuminsa cu algun vuelo incidental den temprada halto, pero a base di e confianza grandi cu tin den e mercado turistico di Aruba, na december aña pasa United a dicidi di pone vuelonan frecuente. Nan a cuminsa bula tur diasabra mescos cu Southwest Airlines, for di Houston pa 2015, pero awor nan a anuncia 4 vuelo adicional, bulando tur dia cu exepcion di diamars y diahuebs durante e periodo di juni te cu augustus. Despues di esaki lo sigui negocia e vuelonan adicional, cualnan ta mustra un confianza hopi grandi.

Mas aleu Minister di Turismo a duna di conoce cu pa e temporada aki lo bay conoce un aumento di 12% den cantidad di stul for di Merca, Canada lo tin un aumento di 3%, Latino America (di cual Venezuela tin un rol importante) lo conoce un aumento di 18% y esaki ta significa un total di 112 mil stul adicional cu lo bay mira pa nos isla. Pa e mandatario, e aumentonan aki ta habri posibilidadnan hopi grandi pa nos isla y ta demostra e confianza grandi pa nos isla.

E mandatario a gradici tur e partnernan cu a contribui na e logro aki manera ta AAA, ATA y AHATA, mientras cu el a felicita comunidad di Aruba en general.

Tradicionalmente MEP durante campaña ta tene su parada di auto riba e diadomingo promer cu eleccion y esaki tabata e caso tambe dia 24 di april 1983, esta un dia manera awe 32 aña pasa. E parada manera custumber a pasa den tur bario di Aruba, caminda e hendenan tabata para canto di caminda cu bandera saludando e fila. Pueblo tabata contento y Betico Croes tabata para manera custumber riba e jeep di su ruman Aiky Croes. Na final di e parada, na yegada di veld di Winston, polisnan tabata manda e jeep subi e veld locual a sosode tambe. Na e momento ey un van di polis a core pasa banda di e veld pa blokia e pasada. Un polis (polis Libier) a baha cu pistool den man y ora cu Betico a puntr’e kico ta su intencion, dos tiro tabata e contesta : Uno di advertencia y e otro a traspasa e curpa di Betico y ta perfora su pancreas y su intestinonan. Esnan cu a acompaña Betico den e jeep a lant’e for di suela sin conocemento y a hib’e hospital.

Como cu e parada tabata para, masha poco hende a presencia e tiramento aki.Ora cu mas y mas hende tabata yegando e sitio, e multitud a cuminsa lanta contra e polisnan.

Conmocion den pueblo

Mientras tanto e atencion a cuminsa cambia den preocupacion pa e estado di Betico y e multitud di hende a cuminsa dirigi nan mes pa hospital. E pueblo tabata conmovi pa loke  a sosode cu su lider. Un tension grandi tabata reina y e situacion tabata explosivo. Nos pueblo sinembargo a demostra un civismo enorme y no a comete actonan di destruccion. Alavez tur actividad politico a ser para. Un alivio grandi a pasa den pueblo ora cu Betico a papia for di hospital na television, pidiendo su pueblo trankilidad y pa bay vota su diabierna siguiente. Despues di algun dia Betico su situacion a empeora y el a wordo transporta pa Jackson Memorial Hospital na Miami. Na Miami poco poco Betico a recupera di e herida di bala y dia 26 di augustus 1983 el a bolbe su isla natal, sano y salvo pa continua cu su lucha pa Aruba su libertad. Esaki en corto ta parti di e tragedia lamentabel cu a sosode 32 aña pasa.

E lucha ta sigui

Pues laga e dia di awe – dia riba cual gobierno di Aruba ta bay ricibi for di Gobierno di Reino su di dos KB (Algemene Maatregel van Rijksbestuur) y cu tin como consecuencia cu nos pais ta perde su autonomia financiero – ta un dia di reflexion pa henter comunidad realisa cuanto sacrificio, sodor, lagrima y te hasta sanger a wordo derama door di nos Libertador pa nos ta un pais autonomo den Reino Hulandes y cu pa awe e logro di Status Aparte ta wordo desperdicia door di politiconan iresponsabel di AVP cu no a sa di balora y aprecia e trabaonan inmenso di nos Libertador. Alavez laga riba e dia di awe nos no lubida e palabranan inmortal y historico di Betico Croes: “Si mi cay na caminda, gara e bandera Arubano y sigui lucha pa conserva y preserva nos libertad”.