Johnnyhabibe-Anchorman

Minister di Transporte Otmar Oduber a indica cu e introduccion di ley di ‘haven en redeverordering’ y e desaroyonan den e sector maritimo, lo crea actividad economico pa Aruba.

Minister Oduber a splica cu manera ta conoci a traha riba un ‘haven en redeverordering’ cu lo percura pa trece control riba e situacion di e barconan para pafor den awanan teritorial di Aruba.

Manera por a compronde ta cu mester evita pa esaki bira na cierto momento un menasa pa nos turismo.  Mirando e actividadnan cu ta tumando lugar na e momentonan aki, unda   practicamente no mester autorizacion of notificacion di Aruba pa haci actividad di ‘Ship to Ship transportation’.

Aki ta trata di materialnan manera mineralnan, crudo, petrolio y gas, cu lo keda regla cu e ley aki. Awor cu e landsbesluit ta cla y e rekisitonan ta na su lugar pa loke ta trata tarifanan, control di rekisitonan, obligacion di companianan di barco, a stipula cu desde april 2015 lo cuminsa cobra pa tur actividad cu ta tuma lugar den nos awanan teritorial.

Finalmente awor por procede  na informa tur agencianan cu ta traha aki na Aruba, cu desde april e ley ta drenta na vigor cu su rekisitonan.

 Esaki ta significa cu tur e barconan cu ta  sea ankering, para ta warda e siguiente opdracht lo mester paga  pa haci esaki den awanan di pais Aruba, tambe esnan cu ta haci mantencion den area cu ta cay den nos awanan teritorial,  dor di e bon ubicacion y ta probecha haci asina mantencionan na barconan, limpieza den e barconan etc.  lo tin tarifanan stipula cu mester wordo paga.

Den caso di barconan cu ta haci actividadnan di bunkering tambe ta bay tin resposabilidanan cu pais Aruba no solamente den pago pero tambe den aspectonan di seguridad. Pa loke ta mantencion di barconan aki mester percura pa esaki nunca bira un menasa pa nos industria principal cu ta turismo. 

Esaki lo significa cu automaticamente actividadnan mas grandi haci pa companianan cu ta estableci na Aruba of cu kier establece na Aruba pa e tipo di procesonan aki, transportationnan aki cu ta tuma lugar , lo mester cera un acuerdo manera esun cu a wordo cera den final di aña pasa cu CurOil di Corsou cu tin operacionnan andando akinan. 

Desde prome di april lo cuminsa cu e control aki, e cobransa di esaki lo general mas o menos 3.5 pa 4 miyon Florin directamente pa caha di Gobierno e aña aki y a calcula cu pa aña esaki lo trece un 6 pa 8 miyon Florin den caha di pais Aruba. 

Oranjestad-Algun siman pasa nos fraccion a realisa un bishita na Ecogas. Banda di recycling e compania ta  mantene su mes ocupa tambe cu gasificacion di desperdicio cual despues lo wordo bendi cu WEB unda cu cierto adaptacion lo wordo haci pa e boilernan y pa finalmente esaki wordo converti den energia electrico. Den cuadro di esaki siman pasa diahuebs ministernan de Meza y Sevinger a bin Parlamento pa duna informacion tocante e posibel intencion di haci uso di e facilidad aki. E proyecto riba su mes ta uno positivo pasobra bo ta elimina asina dumpnan ilegal y alivia e situacion di Parkietenbos. Cu algo mester wordo haci cu nos desperdicio ta un hecho pasobra na e forma cu e ta tumando lugar ta uno incorecto y no ta yuda preserva nos medio ambiente.

Actualmente gobierno ta paga alrededor di 5 miyon florin pa aña p’asina por deshaci di e sushi riba Parkietenbos. Remarcabel ta cu e deal di Ecogas esaki lo por bira 2 miyon pa por deshaci di e sushi cu Serlimar lo entrega nan. Lo bo pensa cu Aruba lo spaar 3 miyon florin pa aña, pero e realidad ta cu Serlimar y otro companianan ta recoge 70% di e sushi na Aruba compara cu e 30% cu Ecotech ta recogiendo. 

Nos sa cu den e proceso di recycling y gasificacion tin un margen di ganashi bastante grandi. En conexion cu e hecho cu Serlimar y otro companianan ta recogiendo mas cu 2 biaha mas hopi sushi cu Ecotech gobierno mester tin e responsabilidad pa sondea e posibilidad pa elimina e suma completo cu lo kier cobra gobierno di Aruba y hasta nos ta kere cu lo por duna algo extra na Serlimar. Ademas di esaki nos kier sugeri ministernan pa wak kico ta e posibilidad pa no solamente Serlimar pero tambe otro companianan cu ta eherce e trabou aki lo por haya un recompensa door di entrega nan sushi cerca Ecogas cual den principio ta algo cu por wordo negosha solamente door di gobierno. Nos ta di opinion cu si di berdad bo kier elimina dumpnan ilegal of pone un punto final na converti damnan den dump esakinan lo por tin nan efectonan positivo. 

Ministro Oduber

Oranjestad-Diaranson Minister Otmar Oduber tabatin un conferencia di prensa pa anuncia e cambionan cu lo bay tin den gerencia di Aruba Airport Authority N.V. Aki el a anuncia oficialmente e retiro di e actual Director General Peter Steinmetz, kende lo permanece na Aruba pa asumi un reto nobo riba.
E mandatario a indica cu algun siman pasa ora a anuncia cu lo bin cambio, diferente speculacion a bin dilanti, pero awor el a haya oportuno pa hunto cu e Director General actual, Sr. Steinmetz, na un forma oficial anuncia cu entrante 1 di septemer venidero Sr. Steinmetz no lo ta ocupando e posicion ey mas.
Tambe Minister Oduber a comenta cu e idea aki tabata draai den cabez di Sr. Steinmetz pa algun luna caba y a conversa cune riba dje caminda a toca tambe e tema di su permanencia na Aruba unda cu posiblemente e lo por ta involucra den yuda Gobierno cu diversificacion di nos economia.
Papiando di Sr. Steinmetz, e mandatario a bisa cu el a siña conoce for di oposicion unda cu nan tabatin wowonan hopi skeri hopi biaha riba funcionamento di Schiphol y su rol den aeropuerto y cambionan den statuut y contrato cu tabatin den pasado. Ora Otmar Oduber a asumi posicion di Minister el a siña conoce Sr. Steinmetz di cerca y ta admiti cu den e promer lunanan e no tabata facil, pero despues a cuminsa conoce otro mas, reuni cu otro mas y conversa mas cu otro.
Sr. Steinmetz a yega Aruba na aña 2004 cu un contrato di 2 aña cu posibilidad di extension di 1 aña y awe, 10 aña despues ainda e ta na nos isla. El a forma su bida na Aruba y Minister Oduber a bisa cu ta contento di por mira e trayectoria cu tabatin den nos aeropuerto.
“Un persona cu na tur nivel pa loke ta trata nos aeropuerto, riba e parti organisatorio, riba e parti financiero y riba e parti di embeyecimento di nos aerpuerto a traha cu alma y cuerpo y por a mira cambionan grandi den aeropuerto cu nos conoce awe compara cu aeropuerto di e tempo ey”.
Riba e parti di organizacion por mira un structura completamente nobo di concesion, e core di e business di aeropuerto a wordo identifica y a wordo poni bek riba un liña. Pa e parti financiero a crea un instancia cu ta gana hopi placa, Minister Otmar Oduber a declara. El a añadi cu si mira e sumanan cu ta wordo paga na Gobierno na dividendo, por bisa cu den e ultimo 9 añanan ta papia di riba 48 miyon Florin. Tambe por mira e renovacion cu a tuma lugar cu na momento cu a tuma e decision y bisa cu aerpuerto mester bira uno mas amigabel y mas di servicio, inversionnan cuantioso a wordo haci.

Awe tin un aeropuerto cu no solamente ta funcional y financieramente solido, pero tambe ta representa nos pueblo di Aruba y e “One Happy Island” cu tanto nos ta propaganda.
A menciona cu algun luna pasa a incia un proceso pa loke ta trata e refinanciamento cu mester tuma lugar di nos aeropuerto y e inicio di un masterplan cu a wordo traha riba dje, cual a haya aprobacion di Hunta di Comisario y cu lo mester hiba nos aeropuerto den e proximo 10 pa 15 aña na e siguiente etapa di un aeropuerto moderno, un aeropuerto cu por acapara e cantidad di hende cu nos ta ricibiendo. E refinanciamento aki por ta posibel danki na e pagonan adelanta cu a wordo haci den 2013y awor ta den proceso pa crea un financiamento a largo plazo.
Minister Otmar Oduber a gradici Sr. Steinmetz pa tur e trabounan haci y a desee hopi exito den futuro cu su reto y decisionnan nobo na Aruba mes, cu el a haci su cas, su hogar. “Nos lo purba haci uso mas tanto posibel di su talentonan sigur mirando cu nos kier exporta for di Aruba e conocemento riba turismo y maneho di aeropuerto den e region aki”.
Mientras tanto a identifica e persona cu lo mester bay ocupa e posicion di guia nos aeropuerto den e siguiente fase. Minister a reuni cu e persona aki cu ta sali for di e famia di Schiphol. E tabata asocia na New York cu e operacionnan di Schiphol y den simannan nos dilanti lo wordo presenta na comunidad di Aruba.
Minister Oduber a yama bon bini na e persona cu ta bay carga e responsabilidad di nos aeropuerto bou di e structura nobo. A scohe pa un modelo identico na esun cu tin na Hulanda: 3 director bou di un director general.

Boshi Wever

Oranjestad-Sr. Nico van der Zee a cataloga Mike Eman como un Teflon-politicus.
Teflon ta e capa protector den e panchinan moderno. E capa lo percura pa e cuminda no pega na e panchi y evita cu e cuminda ta kima.
Un Teflon-politico tambe kier evita pa e wordo “kima” door di percura pa no wordo involucra den cualkier escandalo priva of politico. E ta profila su mes como e “Tata di e Pais”. Un persona cu ta para riba tur problema diario y cu un imagen y reputacion inatachabel y impecabel.
Mike Eman ta projecta su mes como e “braafste jongetje van de klas” cerca Hulanda, particularmente si compare cu e politico- y gobernantenan di Korsow y St. Maarten cu no ta ria pa vocifera nan opinion fuerte contra di Hulanda ora cu ta necesario. Den papiamento crioyo nos ta yama esaki “hipocrita”.
Pero manera e dicho ta bisa: “what goes around comes around”. Mike Eman tin un memoria basta cortico. E kier profila su mes como e “bon guy”, e politico cu tin “man limpi” cu ta willing pa aporta directamente na “su pueblo” door di pega bloki y verf cas y cu no kier mete den e discusion riba e situacion fatal di nos economia y finansas, pasobra den su concepto e discusion aki ta bow su nivel.
Mike Eman ta lubida tur e disturbio cu e y su gang di Alibaba a ocasiona na Aruba den pasado. E ta e lider di AVP cu a wordo eligi dos biaha pa lidera e gobierno di Aruba, pero awor cu problemanan ta acumulando pa su gobierno y e apoyo di Hulanda no ta incondicional mas, Mike Eman kier tuma e postura di “yo no fui” y laga otro carga cu e culpa. E ta e persona cu a delinea e maneho pa stimula nos economia di un forma completamente for di control na 2009, y e tambe ta e autor intelectual di e ultimo campaña electoral na unda a priminti di NO lo tuma medida den ningun forma, y cu lo sigui cu e maneho stipula na 2009 pa stimula e economia (Y AINDA FALTA).
Nunca a menciona cu lo mester obligatoriamente start cu un ola di medida contra e clase trahador. Ya for di 2010 y sigur 2012, Hulanda a cuminsa cansa di e “mooie praatjes” di Mike Eman y a exigi pa tuma na serio e situacion financiero defectuoso cu Aruba ta aden y cuminsa tuma medida. Mike a warda te despues di eleccion 2013, pero awor no por huy mas. Pero Mike siendo e Mike real, a cuminsa delinea un forma pa saca su curpa for di e problema aki.
Na prome lugar e ta laga otro carga cu e cacho, den e caso aki e victima a bira Juan David Irausquin y e clase trahado di Aruba. The Green Giant a cay den su trampa cu wowo habri, pero e pueblo trahado a kere den Mike Eman y apesar di ta wordo informa con malo nos ta para como Isla, toch kier dune “the benefit of the doubt”, pasobra Mike ta un bon guy.
Na di dos lugar Mike ta purba di suavisa e critica di Hulanda door di sera contractnan lucrativo pa companianan hulandes manera KLM y Philips. E ”braafste jongetje van de klas” ta bin yuda Hulanda drecha su economia!! Ken por tin algo contra? Esun cu lo sali perhudica ta atrobe Aruba y e clase trahado cu ta perdiendo trabou.
Ban spera cu mescos cu a socede na Hulanda nos pueblo habri su wowo na tempo y no laga hamber, door di e tanto medida cu e gobierno aki a tuma y lo sigui tuma, bira e motibo pakiko lo cuminsa reacciona y exigi tambe cifranan real y un maneho transparente.
Y tur e medidanan aki djis pa e keda “het braafste jongetje van de klas”, y alabes pa e privilegia e companianan grandi hulandes.
Y loke falta ainda!!

Parlamentario Dangui Oduber di Mep

Oranjestad- Den conversacion cu Sr.Dangue Oduber parlamentario pa Mep a informa nos di e  problemanan existente cu tin actualmente na Aruba.Sr.Oduber a cuminsa na bisa den un resumen cu noticia fastioso y con gasolin a subi cu 6 cent y gobierno a escoge pa no subsidia esaki. E costo di bida ta te na plafond caba a yega e momento cu placa no ta  yega mas,otro noticia cu tey awor aki ta cu un ciudadano  a wordo ataca na su cas y bay cu 800 florin. Kiko nos ta constata cu tin un desempleo inmenso na Aruba e ta demonstrando su mes e aumento continuo den criminalidad,tambe tin e caso di joyriding.Ministro di husticia ta core pasa un ley den parlamento pa aumenta castigo ya cu e no tabata sa mas con pa soluciona e problema di joy riding,awor atraconan ta landtando cabes. Tin un situacion di un crimen cu a tuma lugar na Café capri,esey kiermen Aruba ta ariba su cabes.

Sigi amplia e noticia aki mas scuhando e Sr.Dangui Oduber via nos Player: