Johnnyhabibe-Anchorman

Oranjestad – Heart Centered Leadership Foundation di Aruba i K1 Britannia Foundation di Sint Maarten ta e promé dos organisashonnan nominá pa Appeltjes van Oranje 2022 di Oranje Fonds. A anunsiá
esaki durante un ‘pitchday’ spesial na Kòrsou na kua un kantidat di dies organisashon a presentá
nan proyekto sosial dilanti un hurado di Oranje Fonds. Tur organisashon ku a bini na remarke a
demostrá ku nan ta importante. Pero, ku nan proyektonan hubenil inspirativo i distintivo Heart
Centered Leadership Foundation di Aruba i K1 Britannia Foundation di Sint Maarten a sa di gana e
nominashon.
Oranje Fonds ta entregá e Appeltjes van Oranje tur aña na tres inisiativa ku di forma eksitoso ta
konektá diferente grupo di hende òf ta sòru pa otronan bolbe partisipá den komunidat. Tur aña e
hurado ta skohe 10 nominado di kua semper tin dos di e parti Karibense den Reino. Na yanüari 2022
ta presentá e nominadonan di Hulanda.
Oportunidat igual pa tur hóben.

E tema di e aña aki ta Oportunidat Igual pa tur hóben. Desigualdat den oportunidat ta un problema
urgente den nos komunidat, ku pa motibu di e krísis di Corona a bira mas grandi. Ku e Appeltjes e
aña aki Oranje Fonds ke pone atenshon riba proyektonan ku ta atendé e problema aki ku éksito,
pasombra nan meresé sosten i rekonosementu.
Nominadonan
Heart Centered Leadership Foundation ta traha ku yen diferente programa pa empoderá hóbennan
di Aruba. Ademas nan ta guia hóbennan pa bira konsiente di nan identidat, kualidatnan personal i
formanan pa nan aportá na komunidat. Nan aserkamentu ta haña impulso dor di e esfuerso di e
hóbennan mes. Nan ta hasi tur nan trabou ku i pa e hóbennan. Ku nan Scholarship Fund K1 Britannia
Foundation ta brinda hóbennan, ku di ningun otro forma esaki no ta posibel, oportunidat riba un
estudio. Adishonal nan ta enfoká riba hóbennan ku ta krese den kuido di yu di kriansa i òf a bini den
kontakto ku hustisia i polis.

Den primavera 2022 ta anunsiá e ganadónan di Appeltjes van Oranje. Nan ta risibí un eskultura di
bròns trahá pa Prensès Beatrix i un suma di 25.000 euro. Tur aña Reina Máxima ta
entregá e premionan i den e añanan ku ta selebrá un lustro esaki lo ta na enkargo di Rei
Willem-Alexander. Dor ku na 2022 ta e di 20 biaha ku ta entregá Appeltjes e ganadónan
lo risibí nan premio for di man di Rei.

Oranje Fonds no ke pa ningun persona ta nan so i ke pa tur hende den komunidat partisipá. P’esei
nos ta sostené inisiativanan sosial ku ta traha na un komunidat involukrá, ku ta sòru pa esnan ku
temporalmente tin mester di esaki i ku ta traha pa yega na oportunidatnan igual. E sosten aki ta
konsistí di Netwerk, sèn, tempu i rekonosementu. E fondo por hasi esaki danki na e.o. Nationale
Postcode Loterij, Nederlandse Loterij, Amigunan i kompanianan. Rei Willem-Alexander i Reina
Máxima ta e pareha patrosinadó di Oranje Fonds.

Oranjestad – Recientemente Minister di Naturalesa, Sr. Ursell Arends a ricibi un presentacion door di
Santa Rosa y Sr. Delano Ponit, representante di Hydroponic Technologies Suriname, y a
delinea con educacion y cooperacion entre agricultornan y gobierno, por crea un
ambiente nacional cu ta promove agricultura chikito y mediano.
Alabes por stimula esaki via organisacion di un cooperativa caminda por stimula
cooperacion y benta di e productonan.
Sistemanan hydroponico, of agricultura moderno manera algun ta referi na dje, ta E
manera cu paisnan seco por desaroya nan mes pa por provee seguridad di alimentacion,
especialmente den un era caminda clima cu ta cambiando y ta premira disturbio nan
cual lo limita obtenibelidad di varios productonan rond mundo.
E idea ta pa organisa den futuro un cooperativa cu ta enfoka riba cooperacion,
distribuicion y benta di producto, inovacion den tecnologia, asina ta stimula mercadeo y
benta cu lo haci e tipo di inversionnan di escala chikito y mediano financieramente mas
factibel. E agricultor por enfoka riba su produccion, y e cooperativa ta enfoca riba
mercadeo, distribuicion y benta di productonan.
Por premira cu control di calidad di producto, via un “Voedsel en Waren Autoriteit” lo ta
primordial tambe den realisacion di e plan aki, pa asina garantisa e calidad di e producto
cu consumidornan ta cumpra. Lo determina ki puntonan di control lo wordo introduci
via ley, manera ki kimiconan mag wordo utilisa, y cua no. “Asina mester por garantisa un
producto di confiansa na consumidornan”, Minister Arends ta señala.
“Di Hobby Pa Experto”, un proyecto cu lo enfoca riba train agricultornan den metodonan
moderno, lo wordo duna na trahadornan di Santa Rosa prome, kende na nan turno den
futuro lo mester train y yuda agricultornan local realisa proyectonan di agricultura
moderno.
Pronto e workshop aki lo wordo haci pa tur esnan interesa. Participantenan lo ricibi
varios informacion valioso di con pa set-up y mantene nan sistema, y plania plantacion
di diferente mata. Na final cada participante lo ricibi un certificado di Hydroponic
Technologies. Minister Arends ta spera di por conta riba cada participante pa yuda
contribui na Aruba su seguridad di alimentacion. Ministerio di Naturalesa tin como meta
pa aumenta e seguridad di alimentacion na 10% di necesidad nacional dentro di e
proximo 4 añanan. Teniendo cuenta cu SDG #11: Sustainable cities and comunities, y
SDG #12: Responsible Consumption and Production, Minister Ursell Arends ta contento
di por sostene Santa Rosa pa “kick-start” e proyecto valioso aki.

———————————————————————————————————– Bo kier mira bo negoshie crece den tempo rapido,anuncia na Hit 94 FM Stereo.

Jama Hit 94 FM na 5828094 y 5820694 y den tempo rapido bo ta wordo atende y bo ta

jega na un deal special pa bo negoshie bira un exito den nos comunidad.

Crece bo negoshie cu HIT 94 FM.

Oranjestad – E evento a yama bon biní na atministrashonnan fiskal for di 10 pais rònt mundu.
E siman aki, BearingPoint Caribbean tabata anfitrion di su di tres konferensia anual titulá Tax
Administration Performance Summit, yamando bon biní na 10 atministrashon fiskal for di Karibe i
Pasífiko. E eksitoso kumbre a keda anfitrioná personalmente na ofisina di BearingPoint i tambe
virtualmente pa partisipantenan den eksterior.
Delegadonan for di, entre otro, Dominica, Anguilla, Turks & Caicos, Fiji, Samoa i Papua New Guinea a
asistí na e evento di tres dia. Den diferente reunion i diskushon, a trata un gran variedat di tópiko, for di

tendensia i inovashonnan den atministrashon di entrada te implementashon di solushonnan den IT. Ko-
anfitrion dje evento tabata C2D Services, partner di implementashon ku base na Canada, ku ta

responsabel pa data cleansing & migrashon di data, training i coaching, change management i sosten di
komunikashon pa atministrashonnan fiskal.
E partisipantenan a asistí na demostrashonnan di Multi Tax Solution (MTS) i Multi Data Exchange
Solution (MDES). E demostrashonnan a ofresé ideanan balioso i komprondementu detayá di tur dos
sistema desaroyá dor di BearingPoint, kua ta forma parti di e Public Services Suite. MTS ta yuda
modernisá operashon di atministrashonnan fiskal, miéntras MDES ta fasilitá interkambio internashonal
di informashon fiskal entre hurisdikshonnan.
A organisá un seshon spesial den kolaborashon ku Justin Zake, kabesante di IMF su Sekretariado TADAT,
e organisashon ku ta enfoká riba evaluashon di funshonamentu di atministrashonnan fiskal rònt mundu.
Esnan presente a haña un demostrashon di e TADAT dashboard module, un instrumento ku
BearingPoint a desaroyá den estrecho kolaborashon ku Sekretariado TADAT. TADAT dashboard ta
monitoriá funshonamentu di e atministrashon fiskal ku un bista den tempu real, hasiendo uzo di
normanan ophetivo di TADAT.
Avinash Grootens, Direktor General di BearingPoint a bisa lo siguiente: “Nos tabata entusiasmá di por a
yama bon biní na nos partisipantenan despues di planifikashon detayá i kouteloso. Aña pasá, nos mester
a kanselá e evento pa motibu di COVID-19, pues e ta di gran balor di por a rekonektá ku e dies
atministrashonnan fiskal i interkambiá eksperensia i e mihó praktikanan. Finalmente, nos meta ta pa
amplia nos negoshi ku mas kliente di atministrashon fiskal den Karibe, Pasífiko i mundialmente.
Aktualmente, nos ta premirá ku nos lo realisá e metanan akí, i amplia nos portfolio di kliente di 13
atministrashonnan fiskal aktualmente pa 25+ klientenan rònt mundu. Un evento asin’akí ta trese
visibilidat tambe na oportunidatnan ku Kòrsou tin di ofresé relashoná ku IT komo un sektor di
eksportashon.”
Relashoná ku esaki, e partisipantenan a bishitá Blue NAP Americas tambe, e sentro di data sertifiká na
nivel-IV pa multiple hürdó. E grupo a keda anfitrioná pa CEO Danila Zabala i a keda imensamente
impreshoná pa e fasilidat moderno ku ta ofresé servisio na klientenan na Amérika Nort, Sentral i Latino.
BlueNAP ta un di e fasilidatnan di mas avansá di su sorto den region.

Na aña 2018, BearingPoint tabata anfitrion di su promé Kumbre Funshonamentu di Atministrashon
Fiskal na St. Kitts. Na aña 2019 a tene e dos edishon na Kòrsou.

Oranjestad-Diabierna 23 di april Prome Minister sra. Evelyn Wever-Croes a anuncia flexibilisacion
di reglanan di Covid. Esaki ta posibel como cu a mira reduccion den e cantidad di
casonan activo. Te cu diahuebs 22 di april tabata 350 caso activo compara cu dia 1 di
april cu tabatin 704. Ainda tin un average di 36 caso nobo pa dia, cual ta significa cu e
riesgo tey ainda, sinembargo ta bayendo den bon direccion.

E situacion na hospital
Te cu 22 di april tabatin 39 persona den hospital di cual 15 ta den cuido intensivo.
Lamentablemente si tuma nota di e cifranan ta mira cu tin 95 persona cu a fayece cu tabatin
Covid na momento cu nan a fayece.

Vacunacion
Ora cu ta considera flexibilisacion di reglanan, Gobierno no ta tene cuenta cu e cantidad di e
casonan activo solamente, Gobierno ta mira e situacion di vacuna tambe. E sistema di
vacunacion ta bayendo hopi bon y te cu 22 di april tabatin 45 mil persona cu a vacuna cual ta
mas o menos 54% di e poblacion cu Gobierno kier pa vacuna. Si reparti e grupo aki, 46.5% di
esnan bou 60 aña ta vacuna y 72% di esnan riba 60 aña ta vacuna.
No a yega unda cu kier yega, sinembargo e ta bayendo den e bon direccion, Premier Wever –
Croes a remarca.
Cambionan maneho di Covid entrante dialuna 26 di april

• Cambio den orario di ciere: di 9or PM pa 10or PM
• Toque de Queda: di 10or PM pa 11or PM
• Gebiedsverbod: di 7or PM pa 7:30 PM
• Gymnan ta habri bek dialuna 26 di april segun protocolnan estricto
• Ta permiti Drive-by y Drive-thru (den caso di cumpleaño etc.)
  Prome Minister a sigui splica cu a yega na e cambionan aki despues di tabatin hopi bon
  reunion cu e gremionan di e diferente areanan aki. Minister di Economia hunto cu gremio
  comercial y crisis team a delibera riba e pasonan pa mira con nan por yuda pa yega na e meta
  pa 85% di nos poblacion ta vacuna, pa mas o menos medio mei. Minister di Salubridad a reuni
  hunto cu crisis team y asociacion cu ta representa doñonan di gym, y a yega na hopi bon
  palabracion di con e gymnan por habri bek dialuna 26 di april.

“Comunidad di Aruba ta prioridad di Gobierno na e momentonan aki. Pasobra si bin un brote,
henter comunidad mester sacrific atrobe. Consecuentemente lo perde e recuperacion
economico cu ta mirando, cual ningun persona kier”, Premier Wever-Croes a expresa.

Temporada di Eleccion
Faltando 9 siman pa eleccion, no ta e momento pa tin flexibilisacion di medida considerando
cu tin un average di 36 caso nobo pa dia.

Pa loke ta campañamento electoral, partidonan politico ta den consulta cu Cuerpo Policial tur
siman. Na e momentonan aki por cana ‘dos dos’ den un bario pero no bay paden, tambe por
tene actividadnan den consulta cu Cuerpo Policial, manera cu a wordo palabra.

Mas lihe baha e cantidad di casonan activo, mas lihe e cantidad di pashentnan na hospital
reduci y mas lihe comunidad ta vacuna, mas por flexibilisa e reglanan. Prome Minister ta haci
apelacion na comunidad pa bay vacuna pa por yega na e porcentahe di 85% di comunidad
vacuna, pa medio mei.

Willemstad – A raiz di e denuncianan anonimo haci na Colegio di supervision financiero,
a efectua un investigacion independiente riba encargo di su presidente, Sr. Raymond
Gradus. A yega na e conclusion cu no tabatin violacion di integridad ni comportamento
excesivo; loke si a constata ta problema di descuido. Ta necesario pa implementa den
Secretariado di Cft mehoracion den e organisacion administrativo y formulacion mas cla
di e proceduranan interno. E denuncianan anonimo, cu a haci na cuminsamento di e aña
aki, tabata concerni acusacion contra e Secretariado di e tres Kolegionan. E agencia
independiente EBBEN Partners a efectua e investigacion di hecho.

Gradus: “Aunke a haci e denuncianan di forma anonimo, mi a considera cu tabata mi
responsabilidad pa tuma e acusacionnan ey na serio y percura pa un organismo independiente
investiga nan mas pronto posibel. Esey a tuma luga caba y nos a ricibi e relato di e investigacion.”
Gradus ta sigui: “A pesar cu, a base di e investigacion, no a constata violacion di integridad ni
comportamento excesivo, si ta sali na cla e necesidad di implementa den termino general
mehoracion den e organisacion administrativo y di formula mas cla e proceduranan interno.”
Gradus ta señala cu a raiz di e conclusionnan di e investigacion di hecho a tuma diferente decision.
Asina, por ehempel, lo formula mas cla e proceduranan rond di tumamento na trabou di personal
temporal y di biahamento pa exterior, y den futuro lo no duna gratificacion den natura mas.

Ademas, lo elabora e maneho di gratificacion, Presidente lo aprob’e y Secretario lo aplic’e.
Tambe riba un otro tereno lo introduci un coreccion. Esta, te y cu december 2019 tabata paga
anualmente un gratificacion di Pasco di ANG 1.000 netto na tur empleado di Secretariado. Pa e
personal local tabata converti e gratificacion ey na un suma bruto. A keda sin realisa e adaptacion
administrativo ey pa e personal cu a bin djafo. Awor lo consulta cu Ministerio di Asunto Interno y
Relacion den Reino pa determina con por realisa ainda e hacimento bruto pa e empleadonan ey.
Cu un auditoria lo comproba mas despues cu a cumpli corectamente cu e procedura di
administracion di salario.

Gradus: “Resumiendo: Cft tin un funcion ehemplar. Ta importante pa tur hende na Cft mustra un
comportamento di integridad total. A start un trayecto pa sigui aumenta e consenshi di integridad
den e organisacion cu yudansa di un persona confidencial.”

Gobernador

Oranjestad-Dia 20 di April 2021 a tuma lugar dos reunion importante, a haci
entrega di e rapport di cie. Voortgezet Ouderschap y e usb stick cu e
trabounan di 2018 te cu 2021 na Minister di asuntonan Social y Labor sr
Glenbert Croes. Y e mesun merdia ey a tuma un reunion entre e
comision, vice presidente di corte di prome instancia di Aruba, Curaçao,
Sint Maarten y e islanan BES. Meta di e segundo reunion aki tawata pa
informa corte di e progresonan cu e comision a haci cu nan trabounan y
duna splicacion di e vision di e comision pa cu e organo preventivo pa
permiti mayornan cu ta bai separa cu tin inquetudnan y preguntanan
tin un lugar pa bai cu nan preguntanan, pa haña guia for di familie
mediators cu lo por yudanan yega na un Plan di Mayor. Pero tambe
otro tematicanan, pa crea maneho pa guia e grupo di muchanan cu ta
pasa door di e periodo dificil aki di nan bida.

Minister di Husticia a sorpresa e comision door di a firma e concepto di
ley cu a cana su proceso y yega back for di Raad van Advies y awor ta
cla pa bai Gobernador. E sigiente paso ta pa e wordo presenta na
Parlamento di Aruba cu lo mester dicidi si nan ta hañe importante
suficiente pa trata prome cu eleccion.

Na aña 2009, Hulanda a introduci e ley aki y na 2013 a haci un
evaluacion pa mira si tin reduccion di casonan den Corte pa loke ta
1.Alimentacion, 2. gezag / Omgangsregeling y 3.gerechterlijke
procedures omtret het kind. Ta premira cu na Aruba esakinan tambe lo
ta den efectonan di introduccion di “Plan di Mayor’ obligatorio. Pa
confirma si esaki ta asina, mester haci un nulmeting. E comision hunto
cu CBS a prepara un ‘korte nulmeting’ pa haci un “Quick Scan” pa mira

con mayornan ta regla e responsabilidad comparti pa cu cuido di nan
yiunan prome cu nan separa.

Prome cu introduci e Plan Di Mayor Obligatorio, a entrevista un total di
120 mayor di Directie Voogdijraad y Directie Sociale Zaken. E
preguntanan a wordo haci na mayornan cu tin entre 0 pa 5 aña separa
y cu nan ta cliente of conoci na Departamento pa Asunto Social como
tambe na Voogdijraad bayendo bek te cu tres aña atras. Despues di e
120 mayornan cu entrevista ta sigui pa entrevista mil persona.

Departamento pa Asuntonan Social a haci uzo di tablets di CBS pa haci e
trabou aki mientras cu Directie Voogdijraad a haci uzo di laptops. Ta
importante pa enfatisa cu e ley aki ta pa e mucha of muchanan nan
derecho ta salvaguardia. Tratadonan Internacional di Derechonan di
mucha, special articulo IVRK 3 y 9, ta papia di derecho di e mucha y pa
tin ambos mayor den nan bida despues di un separacion. Miembronan
fiho di commission Voortgezet Ouderschap ta Presidente Michella
Steenvoorde-Laclé beleidsmedewerker Ministerio Justicia Seguridad y
Integracion, Bert Wielenga secretario y Director Interino di Centro
Ortopedico Arubano, Aisca Berkemeyer (lid) Directrice Directie
Voogdijraad Aruba, Sra Glenda Hernandez Directora Sociale zaken su
representante Sacha Geerman, Daphne Teckelenborg-Goncalves (lid) di
Directrice saliente di Bureau Sostenemi, Letizia Maduro (lid)
Beleidsmedeweker di Directie Voogdijraad y Debby Angela (lid) Rechter
Familiezaken, Rechter Naftali Engelbrecht(lid), Sra Grace Maduro (lid).
Persona cu a scirbi e ley pa Aruba ta Professor rechter Jan de Boer. Y
sra Ilona Sneek di Directie Wetgeving a finalisa e nader rapport.

Esunan cu a sigui e curso pa Directie Sociale Zaken ta, Shacka Kock,
Alysha Boekhoudt, Marylin Maduro, Lenny Geervliet, Thaisa Thielman y
Gail Solognier. Di parti Voogdijraad ta Letizia Maduro, Marlene van
Putten, Deborah Lejuez y Yorenne Arends.
E Plan di Mayor pa Aruba lo ta un eramienta den forma di un formulario
online cu lo ta vailable pa tur mayor por download, e comision a traha
un version na Hulandes y a laga sra Olga Buckley traduci esaki na
Papiamento. E idea ta cu e lo wordo traduci na e idiomanan Spaño y
Ingles tambe.

Ta di spera cu pronto e plan lo bira un realidad pa tur nos muchanan.
Paso un yui ta un responsabilidad comparti di ambos mayor, y un
mucha tin derecho di wordo cria y cuida dor di ambos mayor.

Comerciante bo tin deseo di mira bo empresa crece tur dia un tiki mas den benta.

E momento a yega bo tuma contacto cu expertonan di Hit 94 FM pa dunabo tur e

forma con pa yega mas serca di e cliente y convence pa bishita bo empresa.

Jama Hit 94 na 5820694 o na 5828094 despues di 10 or di mainta y keda cla.

Nos email ta: hit94fm@gmail.com.

Oranjestad-Despues di varios consulta cu e miembronan di enseñansa riba diferente nivel, mi persona por
indica cu e confiansa ta herida y tin caminda cu hasta e no t’ey mas. Tin ta opina cu ta parce
cu no tin respet mas, pa e profesion asina importante y bunita, cu ta enfoca riba formacion di
un nacion solidario. Falta di motivacion bou di nos profesionalnan pa sigui hiba nos
enseñansa padilanti. Esaki ta algo hopi grave! Sigur pa desaroyo di un pais. 

NOS PROFESIONALNAN
Sinembargo nos hendenan, nos profesionalnan ta hendenan balente y cu no ta perde speransa
asina facil. Nos hendenan ta hende cu tin bon curason pa desaroyo di e pais. Nos hendenan
tin speransa cu un dia nos muchanan ta bay scol feliz y cu e mayornan tambe lo ta feliz. 
Despues di mi prome consulta cu e profesionalnan den enseñansa, mi ta convenci cu mester
traha hopi fuerte riba restauracion di confiansa, comunicacion (dialogo) y respet. Duna e
profesionalnan e speransa firme y contundente cu loke wordo proponi den e proximo
gobernacion, ta wordo cumpli. Duna e profesionalnan e speransa firme cu lo innova
enseñansa di berdad y pone e pasonan firme y duradero na mehoracion di calidad di
enseñansa pa nos por tin un nacion firme y solido. Speransa firme cu hamas lo balota e
profesion di e maestronan, sino al contrario, cu lo balora nan como hende y nan trabou
profesional door di brinda sosten real y duna oido na e.o. e grupo aki. 

PEN2030
E gabinete Evelyn Wever-Croes a percura pa finalisa Plan Educacion Nacional 2030
(PEN2030), cu tabata un proceso intenso, cu ta conta cu aprobacion y envolvimento di
mayoria profesional den enseñansa y di e otro sectornan na Aruba, pues dicho PEN2030
mester haya su balor den un proximo gobernacion. 

PEN2030 ta elabora riba e habilidadnan di siglo 21. Un di e componentenan di esaki ta
comunicacion, pues con por ta posibel cu mayoria di e profesionalnan aki ta sinti cu no tin un
bon comunicacion den enseñansa? Esaki ta algo cu no ta hustificabel ni aceptabel den e siglo
aki, pues como partido MEP nos ta convenci cu mester stipula e structuranan di conseho,
informacion y comunicacion entre e stakeholdernan relevante di enseñansa na beneficio di
enseñansa. Si nos kier inculca habilidad siglo 21 den nos studiantenan, nos como mandatario
mester por demostra cu nos por comunica cu otro. PEN2030 ta nos compas. E plan aki ta un
ambicion grandi y importante. Solamente hunto cu bo nos lo avanza y logra e metanan
stipula. 

Restaurando e comunicacion y aplica un acercamento di respet y confiansa, nos lo traha
incansablemente pa hiba nos enseñansa na un miho nivel. Logicamente tur esaki basa riba
respet mutuo y dunando espacio na traha hunto pa mehora, garantisa y salvaguardia
enseñansa di calidad y igualdad na Aruba.

Oranjestad-Awe 20 di april nos ta recorda cu 30 aña pasa Gabinete Oduber a percura mediante Coastal
Oil Corporation pa reapertura di e refineria na San Nicolas. E refineria aki cu durante mas cu
60 aña tabata forma parti importante den Aruba su desaroyo economico a dicidi pa
motibonan economico di cera su portanan dia 31 di maart 1985, pues na vispera di entrada di
nos Status Aparte. E gobierno di MEP di e tempo ey a haci tur intento pa bolbe habri e
refineria, pero e periodo den gobierno a termina na final di 1985. Na December 1985 AVP a
drenta gobierno y den e añanan cu a sigui ningun intento a wordo haci pa cu reapertura di e
refineria. Echo ta cu dia 29 di januari 1988 Gabinete Eman a firma cu e compania Hulandes
Schotte Sloopwerken B.V. y Westcoast pa desmantela e refineria completamente y bende e
restonan como hero bieu den exterior. E noticia a causa hopi dolor den pueblo, ya cu e
decision aki a trece un fin na e speransa cu e refineria lo bolbe habri un dia.
Salbacion di e refineria na 1989
Sinembargo danki Dios cu na januari 1989 a tuma lugar e eleccion di Staten di Aruba y cu
MEP, PPA y ADN a logra forma un coalicion y cu decision a wordo tuma pa para di
inmediato e desmantelacion di e refineria. Asina cu sr. Nelson Oduber a asumi
responsabilidad como Prome Ministro na februari 1989, el a apunta un team di negociador pa
asuntonan di refineria y petroleo. Dia 28 di maart 1989, apenas un luna y mey despues di a
drenta gobierno, ex-Prome Ministro Nelson Oduber a ricibi representantenan di Coastal Oil
den su despacho. Despues a sigui negosacionnan largo y complica y porfin dia 23 di juni
1989 ambos partido a firma un ‘letter of intent’. E contrato a encera e.o. cu e refineria lo
permanece minimalmente 20 aña na Aruba. Dia 19 di oktober 1989 Parlamento di Aruba a
aproba e contrato cu Gabinete Oduber a firma cu Coastal Oil Corporation. Despues di
trabaonan duro y intensivo e reapertura a bira realidad dia 20 di april 1991, esta riba un dia
manera awe 30 aña pasa.
Gabinete Eman a cera e refineria na 2012
Lamentablemente nos mester constata cu despues cu e refineria a opera durante 20 aña, e
refineria a stop definitivamente cu su operacion y a cera su portanan dia 15 di November

2012. Y despues di 4 aña biahando rond mundo den busca pa un operador nobo di e refineria,
      Gabinete Eman a firma un contrato di mas cu 2000 pagina cu CITGO/PDVSA na juni 2016.
      Sinembargo durante e siguiente añanan no a mira un desaroyo significativo pa cu
      rehabilitacion di e blender ya cu CITGO no tabatin e fondonan necesario pa inverti den e
      blender.
      Un refineria moderno y mas limpi
      Finalmente e gobierno nobo, Gabinete Wever Croes a yega na terminacion di e contrato
      fantasma cu CITGO na mei 2020. Y awe na 2021 Gobierno di Aruba ta den negociacionnan
      serio cu e compania Quanten Consortium Aruba LLC relaciona cu reapertura di e refineria.
      Intencion di Quanten Consortium ta pa cambia e refineria y haci’e uno moderno y mas limpi.
      Pues no ta un coincidencia cu awe nos ta para den e mesun situacion cu 30 aña pasa caminda
      e tempo ey tabata un gobierno di MEP a percura pa reapertura di e refineria cu Coastal y awe

ta un gobierno di MEP atrobe, Gabinete Wever Croes ta haciendo su maximo esfuerso pa un
reapertura real cu Quanten Consortium. Echo ta cu MEP semper ta sigui cu e idealnan di su
lider inmortal Betico Croes: “Si tin 1% di posibilidad pa reapertura di e refineria, mester
explora e posibilidad aki profundamente”.

Bo tin deseo di crece bo empresa den benta..No pensa hopi tuma contacto cu bo amigonan di Hit 94 FM na

telefon – 5828094 y 5820694 of manda nos un Email na. hit94fm@gmail.com y Hit 94 lo splicabo exactamente

con bo empresa su benta lo subi anunciando riba nos frequencia.. No tarda jama of email Hit 94 FM.

DURANTE APRIL Y MEI LO INTEGRA UNIDADNAN DI CORIENTE RIBA ‘IGMS’ Y IMPLEMENTA ‘ILS’

ORANJESTAD – Operacion di e planta di energia di WEB Aruba te ainda pa gran parti ta rekeri
monitoreo y ahuste continuo den forma manual door di operadornan. Pronto lo trece cambio den esaki
cu un sistema cu yama ‘Intelligent Generation Management System’ (IGMS). Durante e proximo 4
simannan, WEB lo integra tur su unidadnan di produccion di coriente y energia den e sistema IGMS. Di
e forma aki lo regula e suministro di coriente automaticamente. Durante e proceso, clientenan lo por
experencia interupcion di coriente corto cu un average entre 15 pa 30 minuut. Ta tuma tur precaucion
debido y ta alinea pa minimalisa e interupcion aki. Hunto cu IGMS lo implementa e sistema Intelligent
Load Shedding (ILS) den cooperacion cu ELMAR. E ‘load shedding’ ta pa evita cualke interupcion grandi
di coriente. Asina clientenan den futuro lo por ripara interupcion na un escala menos grandi y di poco
duracion. Lo mantene pueblo semanalmente informa di e proceso di implementacion via pagina di
Facebook di WEB y di ELMAR.
WEB Aruba ta genera energia cu un combinacion di ekipo di boiler, turbinanan acopla na generadornan,
motornan RECIP, parkenan solar y molinanan di biento. Ademas WEB ta almacena energia na un escala
chikito di fuentenan sostenibel manera solo y biento pero tambe di energia fosil. Te awor, operadornan
di WEB ta maneha e planta manualmente. Esey ta rekeri atencion constante, pero tambe habilidad casi
sobrehumano pa dicidi rapidamente cua ekipo ta lanta na cua momento durante un desbalance entre
demanda y suministro di coriente. Cu IGMS, WEB lo por mantene e suministro y calidad di coriente pa
ELMAR mas stabil y den futuro lo por integra mas unidad pa sostene e operadornan. Tambe lo por actua
mas liher ora di interupcion y of desbalansa den e demanda.
Aunke no ta premira interupcion, ta pidi comunidad di Aruba comprension en caso cu surgi interupcion di
coriente den e simannan venidero. Ta enfatisa cu lo haci tur posibel pa minimalisa e interupcionnan aki.
Di antemano ta pidi disculpa pa inconvenencia cu por surgi, debi na e trabounan necesario di integracion.
Ta recomenda clientenan pa sigui e updatenan via e pagina di Facebook di WEB Aruba y di ELMAR pa
keda na altura di e proceso y di posibel interupcionnan.
IGMS y ILS ta forma parti di e combinacion di proyecto y inversionnan cu WEB a bin ta haci pa por ofrece
awa y coriente na un manera confiabel, pagabel y sostenibel. Implementacion di IGMS ta un logro mas
den e esfuersonan di WEB pa cumpli cu su vision di ta ‘Greener, Cleaner and Fuel Oil Free’. Introduccion
di e sistemanan IGMS/ILS mester a tuma lugar na 2020. E proyecto sinembargo a sufri restraso pa motibo
di upgrading di e sistema na otro proyecto similar y pa motibo di e pandemia den aña 2020. Pa ehecucion
di e proyecto WEB y ELMAR a cera un convenio cu un definicion cla di e rol y responsabilidadnan di cada
compania pa implementa e sistemanan, cu ta asina importante pa suministro di coriente pa nos isla.