Johnnyhabibe-Anchorman

ORANESTAD – Den cuadro di IMF Spring Meetings, diabierna ultimo, Minister Maduro a atende e reunion di IMF Western Hemisphere cu Ministernan di Finansa y Presidentenan di Banco Central di Caribe. Pa Reino Hulandes, Aruba y Corsou su Ministernan di Finansa y Presidentenan di Banco Central tabata presente den e reunion virtual aki di IMF. Den e reunion aki presidi pa e Director di IMF Western Hemisphere sr. Alejandro Werner, a duna un update di e miras global y regional, a brinda informacion riba prospectonan di vacunacion, a papia riba ideanan innovativo pa yuda paisnan den Caribe y a busca pa sa con IMF lo por yuda e Paisnan den nos region.

Paisnan den Caribe hopi afecta pa COVID19 

Mayoria Pais den Caribe ta biba di turismo y e crisis di COVID19 ta afecta e economia di e islanan grandemente. Sin yudansa rapido hopi Pais no lo por recupera. Door di e medidanan pa proteha salud di hende, hopi Pais mester a lockdown y esaki ta trece problema grandi cune. Sigur pa Paisnan den Caribe cu ta biba di turismo, e crisis aki a dal hopi duro y nan a perde entrada grandemente. Pa awor nan economia no lo por produci e entrada necesario y pesey nan ta destina pa por haya yudansa externo pa por cubri nan necesidad financiero. 

Programa di vacuna ta importante pa recupera

Pa e recuperacion economico un programa di vacuna tambe ta hopi importante. Mas hende wordo vacuna y protegi, mas lihe por kita e medidanan pa protege salud di hende cu ta afecta e economia di e Paisnan. Hopi Pais den Caribe mester a bay den lockdown pa asina por tene casonan di COVID19 abou, pero esaki ta afecta comercio y economia di e Paisnan aki grandemente. Mester remarca cu no ta tur Pais den Caribe ainda ta conta cu vacuna y 

esaki ta haci cu nan mester keda aplica medida pa cuida nan salud cu ta afecta comercio y di e manera aki e recuperacion economico lo tarda mas tempo.

Aruba ta conta cu e yudansa necesario pa por recupera

Na Aruba nos ta conta cu yudansa necesario di Reino Hulandes pa nos por recupera. Desde mei 2020, Aruba ta conta cu fiansanan di Reino como sosten di likidez pa por cubri e necesidad financiero cu Aruba su economia na e momentonan aki no por produci. Aruba ta hayando fondo tambe presta pa asina por yuda mantene cupo di trabou y hunto cune comercio na nos Pais. Banda di esaki Aruba ta conta tambe cu yudansa di Hulanda pa vacuna. Aruba ta hayando suficiente vacuna y a set up un programa masha eficiente cu ta percura pa un gran parti di nos poblacion por wordo vacuna y protegi. Esaki ta yuda Aruba su posicion como Pais den Caribe cu ta biba di turismo y ta haci cu nos recuperacion economico por bay mas lihe.

ORANJESTAD – Siman pasa diabierna Minister Xiomara Maduro di Cultura a ricibi un
bishita di cortesia di su homologo Minister Steven Croes encarga cu Enseñansa,
Ciencia, Cultura y Deporte di Pais Corsou. Tabata durante e encuentro di
Vierlandenoverleg di Ministernan di Enseñansa y Cultura di Reino, cu e mandatarionan
por a sera conoci cu otro virtualmente y awor a haya un momento pa por a combersa
personalmente riba e topico di cultura. Durante e encuentro a resalta e atencion cu
cada Minister ta dedica na brinda atencion y honra esnan cu ta carga e cultura di nos
Paisnan. Na final di e encuentro ameno, Minister Maduro a regala Minister Croes e buki
BaluArte, cu ta e prome documentacion na Papiamento di e pilarnan cultural di Aruba.

Anuncia bo Empresa cu calidad y cu un potencial di benta nunca visto.

Anuncia ha HIt 94 FM. Jama libremente na 5828094 of na 5820694

Nos email ta hit94fm@gmail.com

Oranjesatad – Aruba a conoce e aña aki un grupo grandi di 17 persona cu a ricibi un Condecoracion Real pa motibo cu nan a destaca riba diferente tereno y/of a dedica nan mes na nos comunidad. Comision Condecoracion Real Aruba ta informa cu entrante dia prome di juli 2020 pueblo di Aruba por entrega proposicionnan pa personanan ricibi un condecoracion real otro aña, na ocasion di celebracion di aña di Rey na april 2021.

Pa un persona por wordo considera pa haya un condecoracion real mester tene cuenta cu e accento ta cay riba prestacionnan particular pa y den comunidad. Tin dos categoria:

– Trabou boluntario, pues trabounan pa cual e persona no a/ta ricibi salario;
– Prestacionnan particular cu un persona a haci contra pago, pues den su trabou.
  E prestacionnan aki mester ta di un caliber y nivel di e halto ey cu nan ta
  surpasa locual normalmente ta wordo spera di su trabou y mester tin un balor
  excepcional pa desaroyo di Aruba.

Tur persona of instancia cu conoce un persona cu na su opinion ta merecedo di un condecoracion real por entrega un proposicion. Pa haci e proposicion aki mester haci uzo di dos formulario special.
E formularionan aki ta obtenibel entrante 1 di juli 2020 na balie abou na entrada na Bestuurskantoor na Playa, na Bestuurskantoor na San Nicolaas of cerca e miembronan di Decoratiecommissie Aruba. Tambe por download e formularionan for di e website di Gobierno: www.gobierno.aw, www.overheid.aw, www.government.aw.

E formularionan di proposicion mester wordo yena completo y detayadamente y mester wordo firma door di e persona(nan) of e instancia cu ta haci e proposicion (“voorsteller”).

E motivacion di e peticion ta di crucial importancia.

Pa evalua e meritonan di un persona cu ta wordo proponi pa un condecoracion real ta di sumo importancia pa duna tur informacion pidi riba e formularionan y pa menciona tur dato y informacion cu por duna realse na e trabou(nan)/actividad(nan) desplega door di e persona en cuestion.

Comision Condecoracion Real Aruba ta enfatisa cu otorgamento di un condecoracion real mester keda un sorpresa pa e persona concerni. Pa e motibo ey ta di suma importancia pa NO informa e persona concerni cu ta bay haci un peticion pe, ni envolvi’e den e proceso di prepara un proposicion. Mester haci e trabao preparatorio den tur secrecia. Esaki lo evita un desapunto den caso cu e condecoracion no ta wordo otorga.

E entrega di un proposicion pa un condecoracion real mester wordo haci na Decoratiecommissie Aruba
y mester wordo entrega den un envelop cera na Bureau di Minister Presidente di Aruba (Bureau Minister van Algemene Zaken) na atencion di Decoratiecommissie Aruba, Bestuurskantoor, L.G. Smith Blvd. 76, Oranjestad, Aruba.

Proposicionnan pa condecoracionnan real ta wordo trata na Hulanda door di e organo cu ta carga e nomber di “Nederlandse Kapittel voor de Civiele Orden”. Nan ta duna e conseho definitivo pa cu e

condecoracionnan real y nan ta hopi estricto. Por ehempel, den caso cu un persona tin tremendo logronan pa comunidad, pero e tin por ehempel boetnan grave, un persona asina lamentabelmente no ta bin na remarca pa un condecoracion real durante cierto periodo. Por ehempel pa un boet durante un aña y dependiendo di e cantidad di boet durante mas aña.

Semper un peticion mester wordo manda hopi luna adelanta, casi un aña adelanta, pa por keda cla cu tur tramite na Aruba y na Hulanda pa asina e personanan por ricibi nan condecoracion na luna di april di e aña venidero.  E aña aki e ultimo dia pa entrega un proposicion pa un Condecoracion Real pa aña 2021 ta diabierna 4 di september 2020.

Por fabor tuma nota cu proposicionnan incompleto y proposicionnan cu a drenta despues di diabierna 4 di september 2020 lamentabelmente no por wordo trata.

Aruba tin hopi persona cu ta contribui na nos comunidad mediante trabou boluntario y personanan
cu ta destaca realmente den nan trabou. Ta deseo di Comision Condecoracion Real Aruba pa mira hopi

di nan ricibi un condecoracion real na 2021, mescos cu e aña aki. Ta p’esey un peticion na un y tur pa haci un esfuerso pa esaki bira realidad y pa asina Aruba por honra su hendenan balioso. Comision Condecoracion Real Aruba ta spera cu pa aña di Rey 2021 tambe comunidad lo reacciona cu hopi entusiasmo pa reconoce esnan cu ta haci trabou importante pa y den nos comunidad.

Den caso cu tin cualkier pregunta of pa mas informacion por tuma contacto cu e miembronan
di Comision Condecoracion Real Aruba:
  sra. F. Perez-Lopez (tel. 583-8425)
  sr. V. Frank (tel. 587-4979) 
  sra. N. Anthony (cel. 593-1921)
  sra. I. Nicolaas-Ras (tel. 584-8880)
  sra. R. Garrido (cel. 593-1820)
  sr. D. Figaroa (cel. 741-0100)
Tambe por acerca e comision via e-mail:  condeco.aruba@gmail.com

REFINERIA

Oranjestad – Dialuna 8 juni a tuma luga e lansamento di e destaho publico pa un operador nobo pa e refineria di Aruba, of otro desaroyo. Interesadonan tin 6 siman, pues te 17 juli, pa entrega nan expresion di interes. Despues lo tuma 4 siman pa evalua y pa mita di augustus lo anuncia si tin suficiente interes y den ki direccion. Despues lo cuminsa e fase di negocia cu esnan cu a duna e miho oferta, pa yega na cera un contract. E paso aki ta crea confiansa den e esfuersonan di Aruba creando un pilar economico solido y diversifica. 

REACTIVA ECONOMIA

Siman pasa diamars y diaranson e comision encarga cu recuperacion economico, Commissie Herstel en Innovatie Aruba, a organisa dos Town Hall virtual unda cu a duna un update riba e trabounan di e Comision. 500 persona a participa y por a scucha den ki direccion e taskforcenan ta bayendo y nan por a duna nan comentario y contribucion.  

ENSEÑANSA

Alumno, mayornan y maestronan di Skol Paso pa Futuro a bin Bestuurskantoor cerca Premier Evelyn Wever-Croes pa entrega un carta y nan por a expresa nan preocupcion. Premier a gradici nan pa na forma hopi trankil y netjes cu nan a trece nan puntonan padilanti y lo atende cu e puntonan mas pronto posibel

DIA DI FILIPINAS

Diadomingo nos a celebra di 122 aña di independencia di Filipinas cu e comunidad Filipino na Aruba. Un bunita celebracion cu Pastor Juancho na Misa Santa Anna na Noord. Pabien na e comunidad Filipino.

SINDICATO

Siman pasa tabata tin basta inkietud di parti di sindicatonan relaciona cu e tema di cortamento di salario di empleado publico y tambe debi na cambionan den enseñansa. Gobierno y ministernan individual a reuni varios biaha cu sindicatonan y a trece trankilidad. Apesar di e situacion dificil cu nos pais ta atravesando y apesar cu ta trata condicionnan impone pa Hulanda como condicion pa Aruba por haya fiansa, e caminda di dialogo semper ta e miho caminda, contal cu tin respet, comprension y disponibilidad pa yega na otro. 

HOSPITAL

Debi na un candela na dr. Horacio Oduber Hospital diamars ultimo mester a evacua tur pashent, algo cu a pasa pa prome biaha na Aruba. E Situacion na Hospital ta bou di control mientras tanto. Pashentnan por a bay bek paden y ta OK. Atencion di urgencia ta wordo duna na IMSAN den bon cooperacion cu Hospital. Un palabra di danki na tur esnan cu ta traha na hospital, na Brandweer, Marina Real, Crisisteam y tur esnan cu a yuda. E forma con henter e ekipo a lora manga y traha hunto poniendo e pashent central, ta hopi bunita. 

GRADUACION HAVO Y VWO

Na Faro Blanco Restaurant a tuma luga e entrega di diploma di VWO y HAVO di Colegio Arubano. Como parti tradicional di e ceremonia, Prome Minister a entrega e diploma na e miho graduado di VWO Pricilla Quandt y HAVO Denise Mulder. Premier a felicita e graduadonan y nan famia y a desea nan tur cos bon den e etapa nobo cu nan ta drentando. Premier a recorda nan cu unda cu nan bay, nan ta embahado di Aruba. 

REACTIVA TURISMO

Premier Evelyn Wever-Croes a compaña colega Dangui Oduber pa un “approval run” na airport pa mira tur e cambionan haci pa cumpli cu reglanan vigente pa habri frontera. Hopi preparacion y dedicacion. Areopuerto di Aruba ta prepara y cla pa ricibi bishitantenan atrobe. Tur protocol di higiena y distancia social y fisico ta na luga. Hotelnan tambe a cuminsa habri porta y mustra con nan ta atene nan mes na e reglanan nobo. 

Hopi trabou a wordo haci pa e preparacionnan y Premier a keda impresiona. 

Mientras tanto e ultimo patient di Covid a sali for di hospital y Aruba ta COVID-FREE pa algun siman caba. 

Nos ta bay habri nos fronteranan bek. Esaki despues di hopi deliberacion y preparacion. Nos ta sigui tur conseho y lo tuma tur precaucion. E ta costoso, pero nos mester haci’e pa lanta nos pilar economico bek. 

Tin hende ta contento, otro ta preocupa. Ta comprendible. Unico forma pa nos sali di esaki ta si nos tin fe, confiansa y pasenshi. 

–

Oranjestad – Pa surpasa e crisis di COVID-19 Gobierno di Aruba a traha riba varios forma di sosten financiero pa por brinda alivio na tur esnan cu a perde trabou desde 13 di maart 2020 y tambe un yudansa financiero na e empresarionan chikito y mediano cu a sufri perdida di entrada door di e crisis di COVID-19. Gobierno a introduci Plan di Alivio Fiscal, Fondo di Asistencia Social di Emergencia (F.A.S.E.), Sosten Financiero pa kwartaal, Subsidio di Salario pa negoshinan chikito y mediano, y un microcredito cu condicionnan atractivo via Qredits. Durante un reunion publico den Parlamento, Minister Xiomara Maduro a brinda un update di e alivio cu Gobierno a brinda na pueblo di Aruba.

Plan di Alivio Fiscal

Minister Maduro ta informa cu 507 compania a haci uso di e facilidad pa paga e impuestonan di tur luna di april, mei y juni 2020 y 325 compania a haci uso di e descuento di pago di AOV/AWW den luna di april, mei y juni 2020.

FASE

FASE a brinda un ayudo financiero di Afl. 950 na un cantidad di 8.782 persona cu a perde trabou desde 13 di maart 2020.

Sosten Financiero pa kwartaal

Gobierno a brinda na 3.084 negoshi chikito y mediano un sosten financiero di Afl. 4000 pa asina nan por cubri nan gastonan mensual durante 3 luna. 

Subsidio di salario

Un total di 1.647 compania a ricibi un di maximo 60% di gasto di salario pa por a paga un total di 27.180 trahado y asina por mantene nan den servicio.

Microcredito via Qredits

Gobierno a duna un aporte di 250.000 florin na e compania di microcredito Qredits pa asina e compania por brinda un fiansa cu condicionnan atractivo na negoshinan chikito y mediano. Qredits a ricibi un total di 175 peticion di empresarionan cu a aplica pa e fiansa special aki.

Gradicimento

Minister Maduro ta gradici e miembronan di Parlamento pa e apoderacion pa asina por busca e fondonan necesario pa por brinda alivio na Pueblo di Aruba. Tambe e dignatario ta gradici Reino Hulandes pa e fiansanan duna. E mandatario ta gradici tur e profesionalnan cu a traha inalcansablemente durante henter e temporada di COVID19 riba e programanan di Plan di Alivio Fiscal, FASE, Sosten Financiero pa kwartaal, Subsidio di salario. E dignatario ta brinda un gradicimento tambe na e ehecutivonan di Qredits pa e yudansa ofreci na e companianan chikito y mediano.

                                                    ANUNCIA NA HIT 94 FM

3 SPOT DAILY AFL 500,- pa luna

 Email – hit94fm@gmail.com

Oranjestad – Nos compania nacional di Telecomunicacion, SETAR, a haci un donacion di 30 computer nobo na biblioteca awemainta. Entrega oficial a bay den presencia di SETAR su representante sra. Kimberly Boekhoudt y directora di Biblioteca Nacional Aruba, sra. Astrid Britten.

SETAR como un partner importante pa Biblioteca Nacional Aruba, semper a traha hunto cu biblioteca pa modernisa y mehora servicio na comunidad. SETAR, entre otro, a yuda realisa e Centro di Informacion Digital como tambe ta sponsor Wi-Fi gratis na e edificionan di biblioteca y conexion di Internet.

Como parti di e partnership aki, SETAR ta haci un donacion di 30 computer nobo pa e usuario di biblioteca por uza pa busca informacion, adkiri conocemento y tene contacto cu famia, amigo y relacionnan di trabou. Muchanan di scol ta haci hopi uzo di computer na biblioteca pa traha riba tarea di scol y busca informacion. Otronan ta haci investigacion riba diferente topico of ta lesa corant y revista riba computer y ta busca informacion riba Internet. Tin ta sigui curso online pa por siña algo nobo y diferente.

Acceso na computer y Internet ta hopi importante den comunidad di awe y Biblioteca Nacional Aruba ta ofrece tur dos na esnan cu no tin acceso. E computernan ta wordo instala den diferente espacionan di biblioteca su edificionan na Playa, San Nicolas y e Departamento Arubiana, p’asina brinda comunidad di Aruba lo ultimo den tecnologia.

Oranjestad – Premier Evelyn Wever-Croes a wordo invita na e e-Governance Conference di eGA Academy di Estonia cu a tuma luga siman pasa. Aña pasa Minister President a ricibi un invitacion pa ta un orador na e conferencia aki . E aña aki Minsiter President a bolbe ricibi un invitacion pa participa na e conferencia pero pa motibonan conoci esaki a tuma luga den un forma digital. 

Durante e conferencia aki, Minister President a duna un splicacion amplio riba e importancia cu digitalisacion tin pa Aruba. Segun Premier Wever-Croes digitalisacion no ta solamente un manera di modernida sino un manera pa sobrevivi. Gobierno di Aruba, mirando e importancia di digitalisacion den e servicionan di Gobierno, tin esaki como prioridad ya cu sin digitalisacion Aruba no lo sobrevivi un otro crisis manera COVID-19. 

Digitalisacion di servicio gubernamental y di tur otro sectornan ta un aspecto importante pa cu e recuperacion economico di nos pais pasobra esaki lo crea transparencia y eficiencia den e servicio cu Gobierno ta duna na comunidad. Digitalisacion tambe lo facilita desaroyo economico y yuda baha gastonan operacional di Gobierno pa un tempo largo. 

Mirando e crisis economico cu Aruba ta experenciando na e momentonan aki despues di COVID-19 ta di suma importancia pa introduci digitalisacion den e departamentonan lo mas pronto posibel. Gobierno a cuminsa cu e transformacion digital un aña y mei pasa y conhuntamente cu otro ministerionan a crea un grupo di trahado multidisciplinario pa apunta e prioridadnan di Gobierno tumando na cuenta e necesidad di nos hendenan especialmente despues di e crisis di COVID-19. Esaki ta di suma importancia pa asina por aloca e fondonan necesario. 

E crisis COVID-19 a eleva e nivel di emergencia pa cu e implementacion di e plan di e-Government. Gobierno tawata finalisando e road-map pa cu e plan aki na momento cu e coronacrisis a toca Aruba. Mirando cu Aruba su pilar economico ta turismo, a converti nos den un di e paisnan mas afecta economicamente pa cu e crisis aki ya cu mester a cera nos fronteranan pa evita e virus aki di sigui drenta. 

Afortunadamente Gobierno por a tuma decisionnan necesario pa cu e procesonan digital pa motibo cu durante e 1 aña y mei hopi trabou riba e topico aki ya tawata den proceso. Como resultado Gobierno por a cuminsa ofrece servicionan gubernamental mas critico di un manera digital den un par di dia. 

E crisis COVID-19 a confirma Gobierno di Aruba e importancia di por brinda servicionan digital na nos comunidad. Esaki lo permiti Gobierno pa maneha e pais y duna e servicionan necesario sin interupcion den futuro. Pa loke ta e perspectiva riba e fondonan, e pensamento ta pa crea un “multi-year budget” cu lo wordo maneha pa e departamento di finansas pa cu e proyectonan digital mas importante. 

“Ni maske nos ta den crisis e trabounan pa cu e-Government no a stop. Gobierno ta sigui traha riba esakinan pa asina por brinda e miho servicio posibel na e comunidad di Aruba”, Minister President Evelyn Wever-Croes a enfatisa.

Oranjestad – Despues cu Aruba a conoce mas di un siman sin casonan nobo di Corona Virus, Aruba ta cuminsa prepara pa re-activa nos economia.

E forma con Aruba a atende cu e crisis te awor ta motibo pa hopi elogio y cu e mesun confiansa Aruba lo drenta den e siguiente etapa.

Aruba su exito ta pasobra a prepara bon pa e crisis prome cu el a bati na nos porta.

Ya desde 2018 Prome Minister Evelyn Wever-Croes a institui un fondo den presupuesto pa momento di crisis, un “crisis paraatheids fonds” di 1.9 miyon florin, cu ta locual a permiti nos pa nos haci tur preparacion. A determina e strategia agresivo di test mas tanto persona posibel y den nos region nos ta un di e paisnan cu e cantidad di test mas halto per capita.

Den 6 siman nos a test 1600 persona, di cual 100 a resulta positivo. Mientras tanto tin 25 caso activo y lo sigui monitorea e casonan aki.

ETAPA NOBO

Den conferencia di prensa e siman aki, Gobierno a presenta e cuadro pa e etapa nobo. Lo cuminsa habri economia interno gradualmente, bou di condicionnan estricto. Lo evalua cada nivel cu habri pa dos siman y si e desaroyo ta bon, ta bay pa e siguiente nivel. Si no, mester frena e habrimento di sectornan den nos economia.

Reglanan general ta: Tur hende mester atene nan mes na distanciamento social, mester atene nan mes na reglanan di higiena. Den e Decreto ministerial “Bijlage B” tin e exgiencianan defini.

NIVEL 1 TE CU 4

Nivel 1 lo cuminsa 4 mei – 17 mei, y ta permiti te cu max. 15 persona, incl. personal den un establecimento cu habri. Nivel 2 lo cuminsa 18 mei – 31 mei y ta permiti te cu max. 50 persona, incl. personal. Nivel 3 lo cuminsa 1 juni – 14 juni y ta permiti te cu max. 125 persona, incl. personal. Nivel 4 lo cuminsa 15 juni en adelante, y lo wordo determina ainda

ESTABLECIMENTONAN CU POR HABRI

Entrante dialuna 4 mei e siguiente establecimentonan por habri, bou condicion cu nan ta tene cuenta cu e reglanan general: tienda di paña, sapato, hoyeria, etc.; Ttruck di cuminda; museo y centro di arte; construccion bou condicion aun mas estricto. Ademas, tur tienda y oficina cu no ta riba e siguiente lista y cu a cera boluntariamente. Departamentonan di Gobierno tambe lo cuminsa habri otro siman cu 25% di capacidad, mas tanto funcionnan esencial.

LOCUAL NO POR HABRI AINDA

Scolnan, shopping malls, mercado, bar, night club, restaurant, misa y iglesianan, recreacion, excepcion: museo y centro di arte, salon di beyesa, barbero, sauna, massage, lotto no por habri ainda. Tampoco tiendanan cu mester mas di 15 hende den e tienda. Esakinan mester warda e siguiente nivelnan.

Oranjestad – Hopi biaha nos ta puntra nos mes ta kiko ta pasando realmente aki na Aruba.

politiconan Arubano na hopi ocacion ta trece nan critica adilanti y ta bisa cu ta nan semper tin razon.

Mientas cu di otro banda di un otro color politico ta bisa no ta nos tin razon.

Aki nos ta mira cu bienestar personal y di partido semper ta bin na prome lugar.

masha poco biaha bo ta mira politiconan ta bin dilanti y trese solucionan cu berdaderamente ta pone un pueblo sintie bon cu desicionnan politico cu ta hasi cambio den e comunidad.

cuanto tempo Aruba ta spera pa mira homber y muhernan cu saber politico pa cambia e situacion aki y hasie algo mas mehor pa un y tur.

Si nos pone bon atencion den pasado nos por corda den decada di 90 dos partido politico Arubano kier a forma gobierno pero pa capricho di uno esaki no a tuma lugar y te cu awe a keda un pensamento cu esaki no por.

Awe den siglo 21 na aña 2020 tur gritonan ta sali cu mester tin un union entre e dos partidonan grandi pa Aruba sigi den un bon rumbo.

Pero e pregunta ta sinta awor kiko pa kere!!.

E pensamento riba su mes no ta malo,pero kiko ta pasa  ja den pasado esaki a wordo

daña y e confiansa no tey mas,e miedo pa un biaha mas faya otro ta keda existie.

Hopi biaha mi persona como Persona den media ta conversa cu hopi persona y nan ta bisami cu nan confiansa ta birando poco pa e politiconan den actualidad,nan deseo ta di cu Aruba ta jega e momento cu nos politiconan cuminsa pensa riba su pueblo y no riba poder di partido y ta escoge pa domina un pueblo y probecha di su rikesa.

Proximo aña ta e aña di elleccion ban mira con pueblo lo vota y kiko ta e cambionan cu lo bin.

Den actualidad nos ta sperando cu e pandemia aki di Corona Virus yega su fin y cu Aruba por bay un biaha mas den su rutina di bida manera semper ja conoci.

Finalisando ta spera cu cada un di nos como habitante di e gran pais pone un poco di nos amor nos inteligencia y saber y juda e pais aki sigi dilanti y pone un biaha mas unda e tabata y kisas mehor..

Aruba bo ta un isla bendicion y nos lo sigi keda bendiciona…

Aruba lo bira un biaha mas e isla den Caribe mas gusta y mas bishita.

Oranjestad – Parlamentario Endy Croes ta splica cu den temponan hopi dificil e gobierno aki ta logrando cosnan grandi. Figurabo si Mike Eman y AVP no a desgracia Aruba na e manera cu nan a haci’e con mihor nos lo por ta awe. Mike Eman y AVP a percura pa un Mega Debe y un desaster financiero nunca bisto mientras momento cu pueblo a core cu nan, nan a baha na awa lagando dos mensahe pa pueblo cual porcierto ta prohibi pa lubida. Uno tabata ta cu Mike Eman y AVP ta orguyoso di e debe y e debe t’ey pa nos tur pag’e pa futuro. E di dos: Benny y AVP den nomber di Mike Eman a splica cu “Nan, esta AVP no ta give a damn” cu locual nan a haci cu e pueblo! Esaki ta refleha e responsabilidad y e stimacion cu Mike Eman y AVP tin pa e pueblo aki.

Desaster laga atras pa AVP

No solamente nan a desgracia e pais aki financieramente pero tambe a laga un desaster social atras. Por ehempel, e ex-minister Social di AVP tabata mucho ocupa ta bende permiso y cu su negoshi di 2000 onheffingen, enbes di tabata atendiendo problemanan social di pais  Aruba. Pues cu cambio di gobierno tur e bagamunderianan aki a pasa pa pasado. Gobierno actual – bao di condicionnan sumamente desfaborabel – mester a busca formula pa saca Aruba dilanti. No mester  perde for di bista e hecho cu banda di e desaster cu AVP a laga atras nos tin un Hulanda cu ta pone hopi presion y condicionnan despropocional pa Gabinete Wever Croes. Hulanda ta co-culpabel di e situacion actual. Alabes e situacion delicado di Venezuela.

Logronan positivo

Den tur e turbulencia aki Gobierno a percura den menos di dos aña pa diferente cos positivo sosode. Uno a percura den 2018 pa un presupuesto budget neutral y no a bin presta extra placa den luna di december manera cu AVP a haci pa 8 aña largo. Gobierno a percura pa amplia canasta basico buscando e alivio pa pueblo. Gobierno a aumenta minimunloon y a baha loonbelasting. Tras di trabaonan duro di Ministernan por mira cu Aruba tin por ehempel un Turismo creciente cual porcierto den un publicacion recien Aruba ta na number 4 den e top mundial pa cu RevPAR esta Revenue per Available Room (entrada pa kamber disponibel) pa locual ta trata e promer 6 lunanan di aña na un balor di $259.47 dollar. Pa locual ta trata economia tambe a cuminsa duna tendencia di mehoracion y ta creciendo. Last but not least, trabaonan duro riba e tereno di labor. Nos por a tuma nota di un rapport recien publica unda a confirma cu desempleo na Aruba a conoce un rebaho substancial den comparacion cu aña 2017 y esaki hustamente ta refleha bek riba e trabaonan cu ta wordo desplega. Sigur nos no ta ainda unda nos lo kier ta y sigur esaki lo tuma mas tempo promer cu por tin Aruba riba rails atrobe despues cu AVP a “ontspoor” Aruba. Nos lo percura pa sigui traha dia y anochi pa rescata Aruba y garantisa e trankilidad y felicidad bek di nos pueblo.

Gabinete Wever Croes haciendo lo imposibel bira posibel den corto tempo. Croes ta termina pidiendo pueblo e comprension necesario pa hunto nos persevera pa lo mihor, anto Sin Miedo!