Arubadag 2014
Rijswijk-Oranjestad – Minister di Turismo y Cultura sr. Otmar Oduber den su discurso pa bisa cu e di 37 edicion di Arubadag ta un bon momento pa mira bek ariba e importancia di 18 di maart pa e celebracion di nos dia nacional. Segun e mandatario 18 di maart ta un dia importante pa tur Arubiano. ‘Un di e caracternan mas importante di e Arubiano ta cu e amor pa su isla ta incondicional y cu e no conoce frontera. Nos himno y bandera no unicamente ta simbolonan, pero nan ta forma e basis di nos cultura. Nan ta inspira nos na tur momento, bou tur circumstancia y ariba tur tereno pa nos por eccelera, E fecha di 18 di maart tambe ta simbolo di nos autonomia y cu nos por para ariba nos mesun pia den Reino. Ariba e dia aki nos ta recorda e lucha largo di hopi generacionnan pa nos Status Aparte asina anhela. Nos no por lubida tur e trabao y sacrificionan di e lidernan di e tempo ey y nos antepasadonan,’ asina e mandatario a bisa.
Sr. Oduber a bisa cu e Status Aparte di Aruba ta encera mas cu unicamente un relacion estatal den Reino. ‘Nos Status Aparte ta e resultado di un deseo grandi y hancra den un nacion pa dicidi ariba su mesun destino. Ta nos tarea y nos obligacion pa segura cu e logronan di nos Status Aparte yega na e generacion di awor. Den cuadro di esaki mester rindi honor na cuater lidernan politico di Aruba y nan rol den e lucha cu a culmina den e Status Aparte pa Aruba ariba prome di januari 1986. Esakinan ta Henny Eman, Shon A Eman, Juancho Irausquin y Betico Croes. Danki na nan vision, curashi, motivacion y nan inspiracion como lider cu awe nos por celebra Arubadag. Tambe danki na e Status Aparte cu Aruba na e momento aki ta un di e paisnan mas prospero den e hemisfera occidental.’
‘Desde e segundo mitar di anjanan ochenta di e siglo pasa, turismo a bira e pilar economico mas grandi di Aruba. Den e luz di e nesesidad pa trece diversificacion economico, Gobierno di Aruba den e proximo anjanan lo duna atencion special na e desaroyo di Aruba como Gateway entre Europa y e mercadonan creciente den America Latina. Cu esaki lo pone e basis pa actividadnan economico nobo na unda lo contrentra principalmente ariba conocemente, sciencia, technologia y e imagen di Aruba como isla duradero. Nos posicion strategico, infrastructura, stabilidad politico, un clima di inversion hopi ventahoso, e network regional atrabes di cooperacion cu embahadanan, un poblacion multi lengual y e experencia cu e custumbernan di e paisnan den e region ta haci di nos un partner di negoshi interesante pa inversionistanan Hulandes, Europeo y Latino Americano. Gobierno lo sigi traha ariba e actividadnan economico aki durante di e periodo 2013 pa 2017, loke ta crea mas trabao ariba nivelnan halto pa e Arubiano y sigur e Arubiano cu ta biba na Hulanda,’ segun minister Otmar Oduber.
E mandatario a termina na desea tur presente un bunita celebracion di nos dia akin a Hulanda.
Johnnyhabibe-Anchorman 