Johnnyhabibe-Anchorman

Oranjestad-Na momento cu e atencion di Aruba tabata dirigi riba e yegada di KLM riba biofuel, den prensa Hulandes tabata circula e noticia cu KLM, Erasmus Medisch Centrum di Rotterdam y AZV a sera un deal pa transporta patiënt di Aruba pa Hulanda pa recibi tratamento medico specialisa. Na Aruba e Ministernan Eman y Schwengle a papia di medida di AZV y a keda keto riba e deal aki cu KLM y Erasmus Medical Centrum a sera, siendo cu ta Pueblo via AZV tin cu paga.

Den e articulo “KLM gaat zieke Arubanen naar Nederland transporteren” di e corant Hulandes Parool di 18 mei 2014, a keda publica cu KLM y Erasmus Medical Centrum a sera cabes pa cuminsa transporta patiëntnan di Aruba cu mester cuido specialisa pa Hulanda. Den e articulo ta menciona cu for di 1 di juli 2014, KLM lo transporta un promedio di 150 patiënt pa aña di Aruba pa Erasmus Medical Centrum riba gasto di AZV. Ta trata aki di un prueba cu KLM kier haci den transporta enfermo for di Aruba cu e miras pa haci transporte di enfermo for di tur Pais na mundo pa Hulanda.

Remarcabel ta cu algun dia atras AZV y Minister Schwengle a bin reuni cu Parlamentarionan pa papia riba e medidanan cu dentro di poco lo keda introduci. Ta trata aki di e medidanan di 3 florin pa receptregel, e 15 florin pa bishita na Huisartsenpost y tambe e 50 florin pa uso di Eerste Hulp den e oranan scur di anochi. E instancianan aki a indica cu e medidanan aki ta necesario pa cubri gasto di cuido medico y tambe pa frena abuso di nos sistema medico. Na ningun momento a papia riba e deal entre KLM y Erasmus Medical Centrum cu AZV mester paga. No a informa Parlamento ni Pueblo di esaki siendo cu ta bisto cu e deal aki lo significa costo adicional pa AZV. Algo cu ta pone hende pensa cu si ta pa cubri e deal aki ta impone medida di e forma aki.

Ta bin aserca cu AZV den su relato anual di 2013 cu a keda publica na maart 2014, no ta menciona nada di e deal aki. Locual si ta wordo menciona ta e esfuerzonan cu AZV a haci na 2012 pa sera contract nobo cu 4 top hospital na Colombia pa su aseguradonan por recibi atencion medico specialisa. AZV a indica tambe cu pa cuido na hospitalnan na Hulanda tin un convenio cu Stichting Holland Intercare. Pues AZV tin e cuido specialisa regla caba na Hulanda y Colombia y pesey ta masha cuestionabel con diripiente prensa Hulandes ta indica cu tin un deal traha pa transporta enfermo di Aruba pa Hulanda cu KLM pa Erasmus Medisch Centrum.

Nos lo haci pregunta awor na Ministernan Schwengle y Eman pa trece claridad den e asunto aki. Specialmente awor cu tur e medidanan di AZV ta keda introduci Pueblo tin derecho di sa ta di unda a bin cu e deal aki cu KLM y si esaki lo ta mas barata of lo costa e Pueblo aki mas placa. Pasobra Ministernan ta papia di medida di AZV y ta keda keto riba e deal cu KLM y Erasmus Medical Centrum a sera y cu Pueblo via AZV tin cu paga.