Oranjestad-Minister Otmar Oduber ta indica cu na e momentonan aki ta tumando lugar un inversion pa mehoracion di Baby Beach pa un total di 1.6 miyon Florin. Den e fase aki ta mehorando infrastructura di Baby Beach y esaki ta wordo financia dor di Fondo di Mehoracion di Producto Aruba (TPEF).
E proyecto aki a inicia den luna di februari y ya por mira diferente parti di dje ta biniendo cla. Intencion ta pa por ofrece un mihor producto na tur esnan cu ta desea di pasa un rato of un dia na Baby Beach, haciendo di dje un atraccion mas grandi ainda di loke e ta caba.
Baby Beach ta un di e atraccionnan di nos isla cu tanto turista como local ta disfruta di dje y na momento cu e proyecto di renovacion keda cla, e lo haci di e beach aki uno mas atractivo y lo keda similar na esun di Arashi.
E lo conta cu lugar di parkeo amplio y asfalta, ademas di un muraya chikito separando e beach for di e area di parkeo, protehando asina nos naturaleza.
Minister Oduber a duna di conoce cu esaki ta un di e proyectonan cu ta tumando lugar na e momentonan aki y di varios mas cu lo bin pa logra e meta estableci pa Gobierno di haci di San Nicolas e di dos capital turistico di nos isla y asina por sigui engrandece economia di nos isla.
E proyecto aki ta parti di un serie di inversionnan cu a y ta wordo realiza na San Nicolas pa haci di e distrito aki e di dos capital turistico di Aruba, ademas di bira e centro di nos herencia cultural.
For di aña pasa Ministernan Oduber y de Meza a reuni cu diferente inversionista pa mustra nan vision y plan di maneho pa loke ta San Nicolas, unda nos herencia cultural ta hunga un rol central y ta enfoca riba esaki tambe pa loke ta e aspecto turistico.
Despues di e reunion cu e inversionistanan potencial, na cuminsamento di maart tabatin un fact finding mission pa New Orleans, unda cu mas di 20 inversionista tabata presente y a wak con a desaroya New Orleans den un ciudad turistico manteniendo su aspectonan cultural.
Diferente reunionnan a tuma lugar despues di e biahe aki y awor ta asina leu cu ya caba varios inversionista a cumpra, ta den proceso di compra of huur diferente localidad na San Nicolas, mientras cu e propietarionan di edificionan ta cla pa inverti den nan lugar.
Siman pasa Ministernan Otmar Oduber y Mike de Meza a reuni tambe cu Aruba Investment Bank (AIB) y San Nicolas Business Association (SNBA) riba e business plan pa Carubbian Street na San Nicolas.
E mandatario di Turismo a finaliza bisando cu importante di e desaroyo aki ta cu ta bay crea un boost economico pa San Nicolas cu diferente atraccionnan pa tur edad, unda e turista lo mezcla cu e local y hunto por conoce mas di nos historia, di nos cultura, di nos tradicionnan y di nos herencia como isla multicultural.
Johnnyhabibe-Anchorman 