Oranjestad-Den e caso di e proyecto di Hard Rock Hotel di famia di Tico Croes, den cooperacion cu e minister van Turismo, Otmar Oduber, señor Huez dia 20 di januari 2014 a dicta cu minister Otmar Oduber dentro di 2 luna mester entrega na mi persona tur datonan di e proyecto aki. Minister Otmar Oduber sinembargo ta persisti den nenga di entrega na mi persona 1) e asina yama “Transfer of Shares Agreement” y 2) e “Corporate Agreement” (“Shareholders Agreement”).
Recientemente Directie Wetgeving en Juridische Zaken (DWJZ) a invitami pa dia 5 di februari 2015 mi bin weita (haya “inzage” den) e “Transfer of Shares Agreement”, c.q. e “Confirmation of Corporate Agreement Execution” di dia 28 di september 2012, esaki den nan oficina den e anterior edificio di Interbank!
Sinembargo, dia 3 di februari via e-mail e invitacion a wordo anula. Pakiko?
Minister Otmar Oduber lo a prohibi DWJZ (crioyamente bisa na Hulandes, DWJZ a wordo “terug gefloten”), pasobra diripiente – a base di articulo 8, inciso 2 sub A di e Landsverordening Openbaarheid van Bestuur (LOB) – e “inzage” den e registro di accionista di Southwest Horeca Development no por a sigui!
Articulo 8 ta trata e unidad/union di e gobierno, cu no mag core peliger, y e seguridad di e Pais cu no mag sufri daño.
Inciso 2 ta bisa acerca cu no tin obligacion di duna informacion, si e interesnan economico of financiero di e Pais no ta permiti esey.
Ya desde 15 di october 2012 minister Otmar Oduber – no obstante instruccionnan di huez – ta nenga di anuncia kendenan ta e accionistanan di Southwest Horeca Development, pasobra esey lo ta bay contra e union/unidad y seguridad di Pais Aruba, y pasobra esey lo no ta den e interes financiero y economico di gobierno!!!! Y den caso cu Otmar mes ta un di e accionistanan, e NO kier admiti esey, y mucho menos weita esey anuncia y haci publico!
Traduci den Papiamento cla, pa mi esaki ta nifica cu Otmar Oduber kier bisa:
“mi no mag di duna mas publicidad na e corupcion y e fraude den e proyecto Hard Rock Hotel, y mi mester tene e pruebanan di fraude scondi, pasobra sino e unidad/union di gobierno, e seguridad di Pais Aruba, y e interesnan financiero of economico di nos pais ta core peliger”.
Aparentemente e corupcion y e fraude cu mi a constata cerca minister Oduber, ta cay bao di e interes financiero y economico di Pais Aruba!!
Ta sumamente tristo cu un minister den gabinete Mike Eman 2 ta trata democracia riba Aruba di e manera aki, continuamente ta pone sentencianan di huez un banda, y kier tene scondi kende(nan) ta esun(nan) cu a comete fraude den e proyecto di Hard Rock Hotel!
Gobernador di Aruba, Banco Central di Aruba, Hoofdofficier van Justitie, Parlamento di Aruba y “Vertegenwoordiging van Nederland in Aruba” di mes a wordo informa di e asunto aki!
Aruba, 16 februari 2015
Jan de Ruijter
janderuijter@yahoo.com
Johnnyhabibe-Anchorman 