Enter a caption
Oranjestad-Semper na fin di un aña ta momento cu hopi ta tuma nan tempo pa reflexiona riba cosnan bon cu por a pasa durante trayectoria di e aña pero sigur tambe riba cosnan menos bon. Semper agradecido pa cosnan bon cu ta pasa nos pero nos mester gradici tambe pa loke ta pasa nos cu ta menos bon. Bida tin hopi les cu nos ta supone di siña y hopi biaha ta netamente cosnan menos bon ta siña nos e lesnan aki. Pa un pais esaki no ta diferente.
Den e aña cu ta bin, mas ainda ta anticipa cu Aruba lo tin retonan grandi atrobe pa enfrenta. Riba dje ta bay ta un aña di eleccion na unda pueblo lo bay tin e oportunidad atrobe pa scoge un gobierno basa riba nan opinion y gusto di ki desaroyo lo tin deseo di wak riba nos isla.
Mi deseo ta pa pueblo di Aruba naturalmente desea ambiciosamente pa Aruba pero semper teniendo na cuenta cu desaroyonan realistico y sostenibel. Cu por ta desaroyonan na unda efectonan positivo por dura pa tempo largo y lo tin consecuencianan beneficioso na bienestar y progreso general di pais Aruba. Mi ta spera di curason cu nos hobennan, nos grandinan y comunidad en general lo sa di uza e oportunidad aki pa uza nan huicio na momento di haci nan escogencia.
Mi deseo ta cu henter pueblo di Aruba por pasa feliz dianan di fiesta semper recordando e significacion real di Pasco. Feliz aña 2017 yena cu amor, felicidad, prosperidad y bendicion di e Ser Supremo. Esnan cu tin ambundantemente comparti cu esnan cu tin menos recurso p’asina purba trece felicidad den mas hogar na Aruba… na e manera aki nos por contribui na felicidad comparti na Aruba. Ay nobe!
Johnnyhabibe-Anchorman 