Parlamentario Sue-Ann Ras (MEP): Seminario ‘Project Broken 2018’ a presenta varios tema interesante relaciona cu abuso y violencia di mucha

Posted: August 29, 2018 in Uncategorized

LAMPE-SUE ANN

ORANJESTAD – Durante 3 dia, varios profesional, cu ta traha den veld social y enseñansa, a atende e Seminario titula ‘Project Broken 2018’. E seminario aki tabatin como meta pa trece e oradornan internacional premia di prome categoria, como tambe otro orador di region. Di e forma aki nan ta comparti nan conocemento y contribui na e meta urgente, pa conecta esunnan cu ta tuma decision, y e actornan relevante pa adresa abuso y violencia contra nos muchanan den nos comunidad. Parlamentario Sue-Ann Ras (MEP) tabata invita y a presencia e evento importante aki recientemente.

VULNERABEL

Durante varios di e presentacionnan di e oradornan internacional, por conclui cu e mucha ta keda esun di mas vulnerabel y perhudica den cualkier tipo di abuso y violencia. “Nos cultura mes ta un reto cu e topico aki, mirando cu nos tin cu educa nos muchanan hopi mas dirigi y structura riba e forma- y ehempelnan kico ta abuso y con nan por sali for di e situacion fastioso ey, specialmente ora ta trata di un hende di su circulo di confiansa”, Ras a cuminsa na bisa. Segun e oradornan, hopi biaha un mucha no sa kico no ta bon of con pa expresa kico a pasa.

MARVAL

Ras ta splica cu sra. Lily Marval recientemente a publica un articulo tocante su investigacion cu el a haci, unda ta indica cu 1 di cada 3 hende muhe na Aruba a sufri di abuso emocional of psicologico.  “E efecto cu esaki tin riba un persona ta hopi mas grandi cu nos ta imagina y ta keda un marca pa semper p’e ser femenino si e no haya ayudo y/of tratamento”, Ras a sigui bisa. Pero loke sigur ta haci e asunto di abuso y violencia domestico mas preocupante y alarmante, ta cu 1 di cada 4 hende muhe na Aruba a experiencia un of mas forma di violencia domestico. “E pregunta cardinal lo ta: Cuanto di e casonan aki tabata den presencia di mucha?”, Ras ta puntra.

RETO 

Otro reto cu tambe nos tin segun Ras, ta raporta of no raporta, mirando cu tin hopi inseguridad y falta di conocemento tocante e asuntonan relaciona cu confidencialidad, kico por pasa despues, miedo, norma y balor cultural, sentimento di iritabilidad, reservacion pa comparti informacion.

‘SURVIVORS’

Interesante segun Ras, tabata e parti di investigacion, unda cu 1 di cada 3 mucha ta considera como ‘the survivors’. “Kiermen a pesar di a lanta den un ambito di abuso y violencia, toch nan a logra surpasa tur obstaculo y ta exitoso den nan bida”. E parlamentario ta mustra cu ta importante, pa enfatisa cu e factornan cu a hunga un rol cerca e muchanan aki tabata: un temperamento facil, habilidad di comunica y resolve problema, un imagen propio positivo y capaz di scoge of crea un ambiente adecuado. Ta increibel cu un mucha traumatisa, den varios ocasion nan mes ta logra sali for di e trauma. “Pero tin caso cu despues di tempo, e mucha cu a sali di su mes di e trauma, ta pasa den un experiencia di bida, cu ta bolbe lanta e emocionnan di trauma cerca dje”.

LUGAR PELIGROSO

“No ta pornada cu e cientifico Albert Einstein a bisa cu ‘Mundo ta un luga peligroso, no door di esunnan cu ta haci malo, sino door di esunnan cu ta wak y no ta haci nada’”, Ras a sigui bisa. “P’esey mes nos ta trahando incansabel riba diferente aspecto legal y con pa implementa e aspecto legal aki na e miho manera posibel, unda cu nos tur tin obligacion, pa protega nos muchanan di tur forma di violencia y abuso”. E parti moral segun Ras, ta hunga un rol enorme y ningun tipo di violencia contra mucha ta hustificabel y tur por ta preventivo. “Na momento cu un criatura su bida inicia, e funcion primordial di e mayornan ta pa protega, cria y educa su yiunan”, e parlamentario a finalisa bisando.

 ADVERTISE 3

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s