Johnnyhabibe-Anchorman

Oranjestad-Durante conferencia di prensa di MEP lider di MEP Evelyn Wever-Croes a expresa su preocupacion pa cu e falta di atencion pa ensenjansa. Aa escolar ta cabando y ainda nada a cambia.

 

Apesar cu tur cos tabata cla caba na 2009 pa construi e scol MAVO/HAVO/VWO na Noord, te dia di awe no a cuminsa cu e scol na Noord. Mientras tanto e gobierno di AVP a coi tur e placa cu tabata tin destina pa e scol, y hink’e den un tram, cu ta un proyecto fracasa. Awe nos no tin ni un scol ni un proyecto di embeyesemento di Caya Betico Croes cu ta cla.

Aparte di esaki tin masha hopi problema den ensenjansa mes. E aña escolar 2013/2014 ta cabando y nunca antes cosnan tabata asina bruha den ensenjansa.

 

Colegio Cristo Rey, un proyecto cu a sufri masha hopi tardansa mes. Y ainda no tin bista ki dia e ta keda cla. Minister Hooijboer-Winklaar no por a cumpli cu su palabra duna na Parlamento cu na april e scol lo a muda.

 

Colegio San Antonio tin un aña caba cu nan a muda, y tampoco a cuminsa hasi trabou ainda. Muchanan ta haya les y docentenan mester duna les bou circumstancianan hopi hopi malo mes. Pero gobierno no ta pone atencion.

 

Colegio Frere Bonifacius ya ta cumpli 2 aña cu a muda e muchanan pa Burumbundu, pero te dia di awe no a ni cuminsa cu e trabounan.

 

Mon Plaisir Basisschool y Kleuterschool tampoco ainda no por muda pa bai bek, sin cu ta conosi ta pakiko tanto tardansa.

 

Arco Iris Kleuterschool ta hinca den un Shopping mall di famia di minister, pero aki tampoco no ta hasiendo ningun trabou na e scolnan.

 

Mientras tanto gobierno ta paga masha hopi placa mes na huur di diferente edificio, en bes di cuminsa traha na drecha e scolnan aki. Tin placa si pa traha cantidad di caminda nobo, manera Green Corridor, ringweg, centronan multifuncional, pero no tin placa pa drecha scolnan? Of acaso ta boluntad e gobierno aki no tin pa drecha scolnan?

 

ADMISION PA HAVO

Otro problema serio ta e cantidad limita di alumnonan cu ta wordo permiti pa sigi un estudio secundario avansa manera HAVO fo VWO. Esaki pasobra no tin suficiente lugar, y pasobra e normanan di admision ta pone cu e gran mayoria di alumnonan di zedse klas no ta haal e test. Kiko ta e problema? En bes di hinca asina tanto miyones den companianan pa hasi propaganda y pa skibi press releas epa e minister, dicon no ta hasi un investigacion kiko e problema real ta?

Gobierno ta hinca miles y miles di florin den Rietveld Academie y awor den un Scheepvaartschool , estudio pa capitan di barco, pa studiantenan di exterior bin studia un tempo na Aruba. Esaki ta bunita, pero ki ubo di nos mesun muchanan? Ki ubo nos hinca e miles di florinnan ey pa brinda nos mesun muchanan un mihor nivel di ensenjansa? Cuanto placa ta bai den Rietveld y awor e estudio pa capitán, y dicon e placa ey no por bai den ensenjansa di NOS muchanan?

Nos pais ta pasando den e peor crisis cu nos a yega di conoce. Un crisis traha pa AVP cu decisionnan equiboca desde cu nan a sinta, cu a aumenta nos MEGA DEBE na nivelnan nunca antes visto. Y ta pesey nos ensenjansa a wordo neglisha.

Pa MEP ensenjansa tin prioridad halto contrario na e gobierno aki cu a kita tur placa di ensenjansa y a hinke den proyectonan cu ta blink e wowo, mientras ta stroba nos muchanan bai padilanti.

“Nos ta kere den amplia e posibilidadnan pa nos mesun hobennan sigi desaroya, pero prome mester duna nan un base amplio. Nos ta conbensi cu nos hobennan merese mihor. Nos hobennan merese un nivel digno di ensenjansa. Y ami lo sigi traha pa esaki wordo realisa” lider di MEP Evelyn Wever-Croes a duna di conose.