Oranjestad-Minister Otmar Oduber y Ministerio di Cultura den su totalidad ta sumamente contento di por a forma parti di e di 4 edicion di Paseo Monumental den centro di Oranjestad cu a demostra di tabata uno hopi exitoso, bishita pa miles di persona cu a sostene nos cultura.
Paseo Monumental IV a brinda e oportunidad pa comunidad completo cana libremente den 11 edificio monumental y asina aki yuda concientiza comunidad en general pa aprecia nos herencia, historia y cultura. Nos por logra e concientizacion hunto, Minister Oduber a indica. Pesey ta importante pa promove, rescata y mantene e edificionan monumental, cu ta forma parti di nos patrimonio cultural.
Durante dia por a conta cu miles di persona cu a demostra nan interes pa conoce mas di nos herencia tangibel. E publico a varia for di e persona di mas grandi cu bin honra e pasado, pa familiarnan cu a biba antes den e monumentonan, pa maestronan, famianan y gruponan di mucha y hoben cu a participa cu e speurtocht.
Minister Otmar Oduber hunto cu su famia y amistadnan a pasa un dia ameno conociendo nos edificionan monumental y a bisa cu por conclui cu nos cultura ta uno rico den historia y herencia y cu nos por ta sumamente orguyoso di ta biba riba e pida baranca aki. “Mi ta kere cu nos por categorisa e Paseo Monumental den centro di Oranjestad como un exito. Tanto pa e cantidad di hende cu a atende pero tambe pa e entusiasmo cu cada ciudadano a demostra pa sa mas di e historia di cada monumento.
Nos herencia, historia y cultura ta algo cu nos cada un por ta orguyoso di dje, ban uni pa sigui sostene y preserve”.
Minister Oduber a felicita e comision encarga cu organisacion di un tremendo Paseo Monumental IV den Oranjestad y ta gradici tambe cada un voluntario, arkitecto y partnernan cu a haci e dia aki uno exitoso!
Johnnyhabibe-Anchorman 