Proyecto Resona lo percura pa documenta nos musica folklore pa futuro generacionnan

Posted: January 8, 2015 in Johnny Habibe

RESONA

Oranjestad-Diahuebs merdia Minister di Cultura Otmar Oduber hunto cu Departamento di Cultura (DCA), Sra. Vicky Arens, Michael Lampe y artistanan local a presenta un proyecto cultural folklorico cu lo percura pa preserva y documenta musica clasico, tipico di Aruba.

Minister Oduber a indica cu despues di a tene e Cumbre Nacional di Cultura aña pasa, hopi puntonan importante a bin dilanti pa cu e maneho di Aruba su Cultura y bou di encargo di Departamento di Cultura a percura pa traha un lista di puntonan di accion cu lo bay tuma lugar proximamente. Tin puntonan cu tin hopi di haber cu e sinergia cu mester existi entre e diferente instancianan.

Tin mas o menos 22 proyecto adicional cu sea a wordo disminui den añanan cu a pasa of ta trata di proyectonan completamente nobo of proyectonan cu a pone paro riba nan durante añanan y cu tin un balor hopi importante pa cultura di Aruba.

Despues di a reuni cu e Director di DCA, unda a papia di e presupuesto pa 2015, a aloca fondo necesario pa e proyectonan aki, poniendo asina aki atencion hopi grandi riba e trabounan cu DCA tabata haci. Poniendo tur proyecto di DCA hunto ta papia di un total di 28 proyecto, caminda varios di nan tin di haber cu e resultadonan di Cumbre,  Minister Oduber a bisa.

E mandatario ta splica cu e proyecto ‘Resona’ ta un di e proyectonan cu ta cay den e cuadro aki. Ta trata di un proyecto cu tin hopi necesidad di dje pa por mantene e importancia di e aspecto cultural, folklorico, musical di Aruba  cu lo wordo escohi den e prome fase di e proyecto aki.

Mirando cu hopi di nos cultura no ta wordo documenta na Aruba y ora ta trata di elementonan historico cultural cu ta herencia di un pais, ta hopi importante pa esakinan wordo documenta un caminda pa asina aki por comparti esakinan cu e siguiente generacionnan pa por mantenenan na bida y naturalmente expande esakinan. Esey ta un di e trabounan principal di e proyecto Resona, Minister Oduber a splica.

‘Resona’ lo scohe 13 cancion tipico di Aruba cu lo wordo treci bek den un bachi nobo, di nos artistanan local hoben. Lo documenta esakinan pa di e forma aki tin esakinan pa educa e hobennan pa laga nan participa cu henter e proceso aki.

Minister Oduber a splica cu DCA lo prepara proyectonan na scol unda lo presenta  ‘Resona’ na e studiantenan. Tambe lo tin presentacion pa tanto hoben y hende grandi pa asina comunidad completo por experencie.

Mirando e cantidad di artistanan local cu lo ta envolvi den e proyecto, a dicidi pa pone Cas di Cultura disponibel pa asina e hobennan por yega eynan y no solamente mira kico ta wordo haci pero tambe educanan riba dje.

‘Ta trata aki di un proyecto cu produccionnan hopi importante y di un balor asina grandi cu kier pa e generacion hoben por aprecia esaki cu ta algo di nos mes y transmiti esaki pa futuro generacionnan cu ta bin,’ e mandatario a bisa.

Manera a compronde di Minister Oduber a tene cuenta cu e celebracion di 18 maart, mirando e hecho cu e lo ta sigur hopi bunita si nos comunidad por goza di esaki na Cas di Cultura, caminda nan por mira nos artistanan local presenta esaki y asina aki duna un balor tambe na nos propio artistanan. Tambe den cuadro di celebracion di e dia nacional, lo inicia cu e parti educativo na e diferente scolnan .

Minister Otmar Oduber ya caba ta invita comunidad completo pa sostene e proyecto aki y pa brinda sosten no solamente na e musico y artistanan cu lo bay presenta, pero tambe pa forma parti di e momento unico aki unda lo por mira con cancionnan cu no por ni wordo toca na radio mas pa motibo di e sistema cu nan ta graba den dje of no ta documenta mas y ta pone esaki awor den un produccion di nivel, caminda locutornan tambe por pasa esaki bek na radio emisoranan.

spot 3

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s