Oranjestad-Awe 20 di april cu nos ta recorda cu 24 aña pasa nos pais a conoce un reapertura di su refineria ta e momento propicio pa nos reflexiona riba importancia di presencia di un refineria na Aruba y cu tur esfuerzo lo mester wordo haci pa logra un biaha mas reapertura di esaki. Den e rapport ultimo di IMF ta describi lo siguiente: “Aruba’s growth trend decreased markedly again, mainly because of a structural decline in productivity, partly reflecting the closure of the oil refinery”. Alavez tanto instancianan local como internacional ta mustra riba e hecho cu den un tempo sumamente cortico nos economia lo crece cu por lo menos 12% na momento cu logra habri e refineria.
Argumentonan valido
E motibonan pakico MEP ta boga y lucha pa reapertura di e refineria ta lo siguiente:
E reapertura ta percura pa Aruba recobra su di dos pilar economico solido;
E ta percura pa un crecemento substancial di nos economia cu por lo menos 12%;
E ta percura pa entradanan substancial den caha di gobierno;
E ta crea miles di cuponan di trabao duradero y bon paga;
E ta stimula nos hobennan pa sigui estudionan den e ramo tecnico avansa;
E ta revitalisa principalmente e parti pariba di Aruba, San Nicolas y vecindario;
E tin su ‘spin off effect’ positivo riba e demas sectornan den comunidad;
E ta evita cu nos debenan nacional lo sigui crece den e añanan venidero;
E ta percura pa un aumento substancial di nos reservanan di divisa;
E ta percura pa stabilidad den balor di nos florin Arubano.
Esakinan ta 10 argumento valido y suficiente pa – mescos cu na 1989 – para e desmantelacion di e refineria inmediatamente.
Unico salbabida
Awor cu tin por lo menos 3 compania petrolero di exterior cu kier cumpra e refineria na San Nicolas y habri esaki, Gabinete Eman mester pone capricho y interesnan personal y familiar un banda y den forma serio percura conhuntamente cu Valero pa un reapertura di e refineria.
Reapertura di nos refineria ta e unico salbabida pa rescata nos economia riba termino cortico y asina rescata nos pais. Reapertura ta e unico manera pa evita tur e medidanan cruel cu Gabinete Eman tin prepara pa nos pueblo. Palabra awor ta na Gabinete Mike Eman pa demostra e mesun curashi, determinacion y amor patrio cu Gabinete Oduber tabata tin 24 aña pasa.
