Johnnyhabibe-Anchorman

Oranjestad-Na 2011 AVP a motiva e re-apertura di e refineria cu argumentonan cu e re-apertura lo stimula economia, crea cuponan di trabao bon paga, crea divisa extra pa Aruba y contribui cu un suma grandi na caha di gobierno. E tempo ey MEP a nenga di reconoce tur e argumentonan ey. MEP a bay completamente contra di e re-apertura di e refineria. Awe e mes un MEP ta usa e mes un argumentonan di AVP pa un re-apertura di e refineria. Hasta nan kier haci comosifuera AVP lo ta contra. Tur lo contrario. E argumentonan di AVP ta mes valido awe cu nan tabata na 2011. Ta e oportunismo di MEP a haci cu nan tabata contra na 2011 y awe nan ta “bisa” cu nan ta na fabor di e refineria. AVP ta contento cu MEP ta reconoce en todo caso e argumentonan racional na fabor di e re-apertura di e refineria. Nunca ta laat. Nan ta welcome pa awor si sostene e re-apertura. Ban wak si nan ta para firme!

2011

Na juni 2011 ora gobierno di AVP a presenta e ley pa yega na acuerdo cu Valero pa habri e refineria cu a sera for di 2007 bou di gobierno di MEP, AVP a presenta un cantidad di argumento pakico mester habri e refineria. Nan tabata argumentonan racional cu a mustra riba e importancia pa crea actividad economico, trabou y mas entrada pa famianan pariba di brug. Esey tabata na momento cu Aruba ya tabata sali for di e crisis financiero, economico y social cu MEP a laga nos pais aden despues di ocho aña di mal maneho. Nos pais tabata tin mester di mas inversion for di sector priva, pa no depende tanto di iniciativa di gobierno. E tempo ey caba gobierno a inverti hopi pa saca Aruba for di e crisis. E apertura di e refineria lo tabata un inversion y un estimulo nobo grandi cu lo tabata tin efectonan extenso den nos economia. AVP a argumenta cu e apertura di e refineria lo nifica un crecemento economico di alrededor 12% riba base anual. E lo emplea entre 1000 pa 1500 trahado directamente. Indirectamente e efecto laboral lo tabata ainda mas grandi. Famianan di trahadornan lo a haya un bon entrada. Mas cu den otro sectornan di nos economia. Na final gobierno tambe lo haya mas entrada cu lo nifica cu gobierno lo mester a gasta menos y fia menos. E actividad economico di un refineria lo a trece mas divisa pa nos pais. Kier men cu riba tur tereno e efecto di e apertura di e refineria lo tabata grandi. Ta pesey AVP a haci tanto esfuerso pa habri e refineria.

CONTRA !

Contra tur espectativa e partido MEP a critica e re-apertura y a vota contra di e ley pa haci e re-apertura posibel. Comosifuera hende no tin memoria, awor na 2015, MEP a cuminsa usa e mes un argumentonan cu nan a rechasa na 2011. Kico a cambia? Ta MEP a bin realisa e importancia di e refineria? MEP a bin realisa cu nan tabata fout na 2007 pa sera e refineria of na 2011 pa vota contra di su re-apertura? Kico a cambia? E contesta ta MEP y su lidernan so por duna. Pero hasta hende serca y den MEP ta bisa cu un cierto berguensa, cu MEP tabata fout na 2011 pa vota contra. Nan ta bisa cu contrario cu den AVP, den MEP no tin lidernan pa reconoce nan fout. E motibo pakico MEP a bolter, si ta keda un pregunta importante pa pueblo. Pueblo ta puntra si ta pasobra si e refineria habri, MEP por wel di lubida eleccion pa awor? Si e echo cu tin hotelnan interesa pa establece na San Nicolas y habri un desaroyo nobo pariba di brug, ta loke ta preocupa MEP? Pasobra den e caso ey tambe MEP por lubida eleccion pa awor. Den tur esey tambe tin e pregunta pakico MEP y PDR ta insisti den envolve un persona (Nelson English) den e asunto aki, mientras cu tin un team di 6 experto Arubiano y un Hulande, encarga cu e tarea pa busca tur forma di reapertura di e refineria riba un base solido. Pronto nos lo haya sa e motibo real di e cambio di 180 grado di MEP. Pronto lo haya sa si nan ta traha na interes di Aruba of djies ta wak nan chensnan den eleccion. Pueblo keda pendiente!