Ephrem
Oranjestad-Kòrsou. Djasabra tras di lomba e kantoutor Ephrem J un biaha mas a keda risibí den gran forma na Madrid. Despues di su presentashon algun siman pasá na e evento Bachatea na Madrid, fanátikonan a keda ku hopi gana i a pidi pa e regresá pronto. Djasabra ei den e prestigioso diskoteka The Host na Madrid, Ephrem J a sòru un biaha mas pa un sala yen.
Durante e presentashon den The Host na Spaña, Ephrem J a estrena su ultimo kansion tambe. Ta trata di e kansion den género di bachata titulá “No hay imposibles”. E kansion aki ta un komposishon di Ephrem J ku areglo di Martires de León, ku ta mesun areglista di kansionnan manera “Amor en la Luna”, “Me Entrego” i otro eksitonan internashonal di pasado. E kansion nobo “No hay imposibles” a ya ta zonando rònt mundu, speshalmente na Spaña, Belgika, Italia i Hulanda. E kansion ya ta optenibel rònt mundu via iTunes i Amazon.com.
Ephrem J den fin di siman aki lo ta den otro presentashon internashonal na momentu ku e subi tarima na Paramaribo na Surnam. Espektativa pa e presentashon di Ephrem J na Surnam ta haltu, ya ku no ta trata su prome presentashon na Paramaribo. Den pasado ya Ephrem J ku su banda Loading a duna diferente presentashon na Surnam.
Pa un reportahe fotográfiko di e presentashonnan na Madrid i Hulanda por bishita e página www.facebook.com/EPHREMJMUSIC.
Pa informashon: Alvin Daal, Mènèdjer di Ephrem J, tel. +5999.5227742
