Johnnyhabibe-Anchorman

Oranjestad-Declaracionnan haci pa lider di Democracia Real,  sr Andin Bikker, relaciona cu desaroyonan rond di posibilidad pa un re-apertura di e refineria na San Nicolas, a hala atencion di fraccion di AVP.

Parlamentario Marlon Sneek durante conferencia di prensa a mustra cu a tuma nota di expresion haci di parti di sr Bikker kende entre otro a mustra cu e impresion ta ser duna dor di AVP, cu ta oposicion tin cu goberna e pais aki pa asina logra e re-apertura di e refineria.

“Nos a scucha cu sr Bikker ta declara cu Gobierno lo kier pa oposicion goberna pero e ta masha simpel mes ya cu no tin nada di haber cu gobierno kier pa oposicion bay goberna.

Gobierno a mustra bon cla cu e ta moviendo y oposicion ta insisti cu nan tin 7 y 8 grupo interesa cu kier cumpra anto e ora trece e companianan aki pa Gobierno, esey ta locual a wordo bisa na sr Bikker.

Nos por corda e reunion cu sr Bikker a jama dia 11 di Mei cu como invitado e grupo di cual hopi hende a papia di dje cu tabata Concord Aviation International and Fuel Inc, a meldt ziek e dia di reunion. Awe  nos ta mas convenci cu nunca cu e mailnan cu nos a mira di e compañia aki ta un wega politico  di partidonan di oposicion caminda nan ta inventa e companianan fantasma aki y ta manda mail pa loco.paso te dia di awe nos no a yenmde mas di e compañia aki cu a meldt ziek

Ora cu sr Bikker a invita e grupo aki cu supuestamente ta un grupo multi miyonario cu ta bay inverti riba 3 biyon dollar den pais Aruba, e grupo a bira meldt ziek y no a presenta pa e reunion.

Un compania cu ta multimiyonario cu kier inverti 3 biyon dollar no tin un solo persona cu por a bin Staten pa duna informacion  caminda cu ta Staten ta hefe di Gobierno  ta haya e informacion y despues lo informa Gobierno cu esaki ta un grupo serio y lo ta bon pa sinta cu nan.

Pero nan a meldt ziek!!

Y tin un otro compania tambe cu sr Bikker a presenta  dia 12 di October di 2012 caminda den un publicacion el a declara cu Pro Diesel ta interesa pa bin Aruba pa papia cu comision fiho riba nan intencion pa cu e refineria.

E compania Pro Diesel aki tambe a meldt ziek, kiermen cu e gruponan interesa di sr Bikker, ta meldt ziek nan ta meldt ziek y aki nos mester ta sincero  y serio sr Bikker.

Si kier hunga politica nos por haci esey ya cu AVP tambe ta bon den esey pero ta serio ya cu dos grupo cu abo Bikker a papia di nan, cu ta Pro Diesel y Concord Aviation, tur dos a meldt ziek na momento cu nan mester a bin reuni pa duna informacion na Parlamento riba nan interes pa cumpra e refineria.

Bikker ta para na banda hunto cu bo partner den oposicion cu ta MEP ya cu mescos cu lider di MEP tres aña pasa a grita den Staten cu “portanan cu ta habri pa Evelyne Wever Croes, no ta habri pa Mike Eman,” y ainda nos ni a mira e portanan ey habri y e no tin un compania cu por yega Arba cu e placa pa inverti den e caso aki e refineria na San Nicolas.

Locual ta referi na dje ta e nombernan di tur e companianan cu Bikker a bin ta menciona, pa pone riba mesa pa mira kico por haci y esey ta e situacion.

Gobierno a haciendo su maximo esfuerzo den henter e proceso aki y sr Bikker a bin c’un mocion y ta kere awor cu el a bin salba mundo, ta hunga rol di  ta e rey pero pa algun aña caba tin hendenan ta moviendo riba henter e proceso aki.

Ta cual Gobierno lo no kier habri e refineria cu por garantisa 200 miyon florin den su economia sr Bikker, laga nos ta sincero cu otro si, laga nos stop di hunga politica y si di berdad bo ta stima e pais aki y bo tin un compania cu no ta meldt ziek, trece pa Gobierno papia cune anto nos por habri e refineria bek y garantiza asina continuidad y cosnan positivo pa nos pais y laga un banda e politica barata  boso a bin ta hungando riba e topico di refineria,” Marlon Sneek a mustra.