Oranjestad – Mirando e caos cu tin den Gabinete Mike Eman II, Sr. Eman tin cu pidi Parlamento pa baha su gobierno y yama eleccion den cuadro di nos leynan nacional. Un Gobierno manera esun actual no tin derecho di existencia mas. Nos pueblo no por wanta mas desorden politico y trato inhumano pa falta di bon gobernacion. E Gabinete no tin un compas moral mas. Den menos di dos siman GE II ta perde dos Ministro. Esaki ta mustra claramente cu Sr. Eman no por funciona debidamente den e funcion di Prome Mandatario, consecuentemente Mike y AVP tin cu bay cas!
Masacre y mas masacre
Desde 2013 GE I a sconde e desaster pa e pueblo Arubano. A sconde e rapport di IMF pa pueblo no ripara e mal maneho desde 2009—2013. Na 2014 GE II a haya un KB di Reino Hulandes y despues un Supervision financiero (Parlamento di Aruba a ser poni un banda) imponi pa mal maneho. Minister Mike De Meza a haci un masacre cu finansa publico y hala di su bagamunderianan tin cu sali na cla ainda. Minister Juan David Irausquin no por a saca su som y a cay den e trampanan Machiavellino di Mike Eman y AVP. Niun hende riba lista berde a tribi di bay drecha e desaster di Mike De Meza y a busca un vakminister den persona di Angel Bermudez cu tampoco a resulta, ya cu el a sigui masacra e pueblo humilde enbes di crece nos economia. E deal spirito di Citgo a salba GE II su presupuesto di 2017. Medida tras di medida, cu costo di bida haltisimo a crea mas y mas incertidumbre y pobresa den e ultimo 8 añanan. Adictonan ambulante mas y mas riba caya y ta sigui crece. Miles di hende no por paga nan recibonan di awa y coriente pero tin placa si pa e di 7 Green Conference.
E drama ta sigui
Un Gobierno totalmente bruha despues cu Richard Visser a drenta y a hiba un mal maneho den salubridad publico, Lainda Westerhof a wordo cori pa falta di transparencia, Andy Lee no tawata kier ta mas den e team di Alibaba di Mike, Juan David a cobra su cheque diki diki di Overbruggingstoelage y a haya studieopdracht despues di e welga di hamber di su lider fracasa. Na final di e drama politico, Alfonso Boekhoudt a bula afor despues cu Gobierno no a sigui e proceduranan pa nombra un Gobernador nobo.
Pero e drama ta sigui: Salud publico cu problemanan serio, no tin material pa duna nos pueblo cuido medico adecuado, problemanan den educacion, deramento di Asbest na San Nicolas contra tur regla, protesta masal contra Minister di Husticia pa e criminalidad cu ta asotando nos pueblo y corupcion masal den e Ministerio di Benny Sevinger y awo e Minister di Turismo Otmar (600.000 Turista) Oduber a entrega su retiro pa falta di su lider Mike Eman kende a keda ignora e problemanan serio di nos pais y e decadencia cu nos pueblo ta pasando aden.
Sr. Mike Eman mester entrega su retiro per direct y debolbe nos pueblo su derecho di autodeterminacion.
HIT 94 FM SINTONIA NACIONAL
24 HORA E MEHOR PROGRAMACION RADIAL NA ARUB
94.1 MHZ
Johnnyhabibe-Anchorman 